АСТАНА, 18 қар — Sputnik. National Geographic Traveler (Ресей) журналының редакциясы Қазақстан елордасы – Астананы қарқынды дамуы мен жоғарғы туристік әлеуеті үшін "Болашақ қаласы" арнайы сыйлығымен марапаттады, деп хабарланады Үкімет басшысының ресми сайтында.
"Келесі жылы Астанада ең үлкен көрмелердің бірі – "Болашақ энергиясы" атты ЭКСПО-2017 көрмесі өтеді. Осындай жаһандық шара Қазақстан астанасына әлемнің барлық жерінен туристерді тартады деген сенімдемін", — деді марапатты алғаннан кейін «Астана ЭКСПО-2017» ұлттық компаниясының ілгерілету және туризм департаменті директорының орынбасары Роза Асанбаева.
Ол көрме қонақтарына 3 мың тақырыптық және ойын-сауық шаралары, соның ішінде есте қаларлық шоулар, концерттер, шерулер және арнайы қойылымдар ұсынылатынын айтты.
"Биыл сыйлықтың серіктесі Қазақстан болды, нақтырақ айтсақ, «Астана ЭКСПО-2017» ұлттық компаниясы болды. Қазақстан – туризмді дамытудың үлкен әлеуеті бар, перспективті бағыт. Оған деген қызығушылық артуда, және де біз туризм мен саяхат жөніндегі жетекші халықаралық және ресейлік басылым ретінде, осы дерекке назар аудармай өте алмадық", — деп мәлімдеді National Geographic Traveler бас редакторы Ольга Яковина.
