АСТАНА, 7 қараша — Sputnik. Қырғызстанда сот ит ұрлаған адамға үш жылға шартты түрде жаза кесіп, 35 мың сом көлемінде (500 доллар шамасында) айыппұл салды. Бұл жөнінде иттің қожайыны Гуля Алмамбетова хабарлады.
"Бұл – үлгі боларлықтай жағдай. Мен соттың әділдігіне таңғалдым", — дейді Алмамбетова.
Ол сотталушы Қылмыстық кодекстің "Ұрлық" бабы бойынша айыпты деп танылды дейді. Сот үкімі күшіне енген күннен бастап, сотталушы Бішкектен тыс аймаққа шыға алмайды, деп жазды centralasian.org.
Осыған дейін итті ұрлап, өлтіру ісі Қырғызстан сотында бірінші рет қаралып жатқаны айтылған. Алмамбетова бұл істі соңына дейін алып шығуға бел буған едім дейді.
Курцхаар тұқымды Спайсик атты ит Бішкекте биыл жазда жоғалып кеткен. Кейін видеобақылау камерасы арқылы иттің ұрланғаны белгілі болған. Сот барысында айыпталушы "итті қожайынына қайтарып берем" деп алдым деп ақталған. Ол итті ауылына алып кетіп, шынжырға байлап ұстаған. Бірнеше күн өткен соң, ит өліп қалған.
