Санкт-Петербургте Әлия Молдағұловаға ескерткіш ашылды

Санкт-Петербургте Әлия Молдағұловаға ескерткіш ашылды фото

512
Биіктігі 3 метр қоладан құйылған мүсіндік композиция қызғылт гранитті тұғырға орнатылған

НҰР-СҰЛТАН, 6 мамыр — Sputnik. Бүгін Ұлы Жеңіс күні қарсаңында Санкт-Петербургте қазақтың қайсар қызы, Кеңес Одағының батыры Әлия Молдағұловаға ескерткіш ашылды, деп хабарлайды Қазақстанның Ресейдегі елшілігінің баспасөз қызметі.

Ескерткіштің ашылу салтанатына Қазақстанның Ресейдегі төтенше және өкілетті елшісі Иманғали Тасмағамбетов қатысты.

"Батырлық – басқа қонатын бақ емес, жүректен ерлік болып шығатын сындарлы шақ. Ал біздің халқымыз үшін бұл – ұланына ғана емес, қыздарына да бірдей дарыған ұлттық қасиет", - деп атап өтті ол.

Тасмағамбетов атап өткендей, тарихымыздың әрбір беті ел басына күн туғанда ерлермен иық теңестіріп, жауға шапқан батыр рухты апаларымыздың есімімен хатталып, ел есінде сақталып келеді.

Қазақстанның Ресейдегі төтенше және өкілетті елшісі Иманғали Тасмағамбетов
© Foto : Қазақстанның Ресейдегі елшілігі
Қазақстанның Ресейдегі төтенше және өкілетті елшісі Иманғали Тасмағамбетов

"Бүгін, міне, сол даңқты дәстүрді жалғастырушы, қазақтың қайсар қызы – Әлия Молдағұловаға Санкт-Петербург қаласының төрінен еңселі ескерткіш ашылып отыр", - деп сөзін сабақтады елші.

"Біз ержүрек жерлестерімізді еске алып қана қоймай, Ұлы Отан соғысының барлық батырларына, соның ішінде Ленинградты қорғаушыларға құрмет көрсетеміз!", - деді Иманғали Нұрғалиұлы.

Төтенше және өкілетті елші сол қайғылы жылдар мен миллиондаған адамның қасіреті әрдайым есте сақталатынын айтты.

"Сөз жоқ, бұл шара – Ұлы Жеңіс мерекесі қарсаңында қаһарман апамыздың рухына көрсетіліп отырған ұлы тағзым ғана емес, екі елдің бірлігі мен ерлігін, айбыны мен даңқын паш ететін дара дүние", - деп аяқтады сөзін.

Батыр қыздың ескерткіші қоладан құйылды

Әлия Молдағұлованың ескерткіші Санкт-Петербургтің батысындағы скверлердің бірінде, Красногвардия ауданындағы өз атына берілген көшенің 5-інші үйінде орналасқан. Биіктігі 3 метр қоладан құйылған мүсіндік композиция қызғылт гранитті тұғырға орнатылған. Онда батырдың есімі мен батырдың жапсырма жұлдызы бедерленген. Постаменттің сыртқы жағында мерген қыздың ерлігі қысқаша қашап жазылған.

Ескерткішті тұрғызу Санкт-Петербург үкіметінің, Қазақстанның Ресейдегі елшілігінің, Ақтөбе және Атырау облысы әкімдіктерінің ынтымақтаса күш жұмсауының арқасында жүзеге асты.

3 метрлік ескерткіш қоладан құйылып, қызғылт гранитті тұғырға орнатылған
© Foto : Қазақстанның Ресейдегі елшілігі
3 метрлік ескерткіш қоладан құйылып, қызғылт гранитті тұғырға орнатылған

Шығармашылық жобаның авторы – белгілі қазақ мүсінші Едіге Рахмадиев.

Оның айтуынша, ескерткішті жасауда Әлияның қанығырақ сақталған фотосуреттері пайдаланылған. Постамент Алматы облысындағы Күрті кен орнынан алынған сапалы граниттен жасалған. Қола да Қазақстанда шыққан. Сәулет композициясы  Алматы облысының Жамбыл ауданындағы Қарғалы ауылында құйылды.

Әлия Молдағұлованың ерлігі жайлы не білеміз

Әлия Молдағұлова Қазақстанда дүниеге келген, бірақ Ұлы Отан соғысының алдында Ленинград қаласында тұрып, оқыды. 1941-1942 жылғы үрейлі блокадалық қыста аман қалған.1942 жылдың наурыз айында Ярослав облысына эвакуацияланған. 1943 жылы орталық Әйелдер снайперлік мектебін бітіргеннен кейін 18 жастағы қыз 54-ші жеке атқыштар бригадасының 4-ші батальонының (22-ші әскер, 2-ші Балтық жағалауы майданы) мергені болды. Жауынгерлік іс-қимылдар барысында ол жаудың 78 солдаты мен офицерін жойды. Әлия Молдағұлова 1944 жылы қаңтарда Ленинград-Новгород операциясын өткізу кезінде Псков облысының Казачиха ауылындағы шайқаста ерлікпен қаза тапты.

512
Кілт сөздер:
ескерткіш, Әлия Молдағұлова, Санкт-Петербург
Тақырып бойынша
Елордада соғыс ардагерлеріне 500 мың теңгеден табысталады
Ресей ауылында жалғыз қалған қазақ отбасы қалай өмір сүріп жатыр?
Елордалық ардагерлер әкімге соғыста бастан кешкендерін әңгімелеп берді
Кеңес Одағының екі мәрте батыры Талғат Бигелдинов жайлы не білеміз?
Загрузка...