тамақ

Қазақстандықтардың тамаққа қанша ақша жұмсайтыны белгілі болды

904
(Жаңартылды 18:52 26.12.2018)
Қазақстандықтар ақшасының 40 пайызын азық-түлік сатып алуға жұмсайды, ал мәдениет пен бос уақытына бөлетіні 2 пайыздан кем.

АСТАНА, 17 желтоқсан — Sputnik. Қазақстандықтардың тамақ пен бос уақытына қанша ақша жұмсайтыны белгілі болды. 

Еуропа елдері, Ресей, Қазақстан мен Түркия тұрғындарының шығысының құрылымына РИА Рейтинг агенттігі зерттеу жүргізген. 

Белгілі болғандай, қазақстандықтардың шығысының 40 пайызы азық-түлікке кетеді. Мәдениет пен бос уақытқа бар болғаны 1,9% жұмсалады екен. 

Люксембург тұрғындары тамаққа ең аз ақша жұмсайтыны анықталды. Азық-түлік сатып алуға олар 8,7% ғана жұмсайды. Екінші орында Ұлыбритания, бұл көрсеткіш оларда 10%, ал үшінші орында 10,6%-бен Нидерланды тұр. Ирландия, Финляндия, Австрия, Норвегия мен Швейцария тұрғындары азық-түлікке шығыс ақшасының 12%-ын бөледі. 

Өткен жылдың қорытындысы бойынша ресейліктер тамаққа ақшасының 31,2%-ын, украиндар 50,9%-ын жұмсаған. 

Зерттеу жүргізген мамандар ұлттық статистикалық қызметтер мен Халықаралық валюта қорының мәліметтеріне сүйенген. Олардың айтуынша, тұрғындардың жалпы шығысының ішінде тамаққа бөлінген қаржының аз болуы отбасылардың өмір деңгейі жоғары екенін көрсетеді. 

Халықтың тұрмысы жақсы елдерде көбінесе ақшаны мейрамханаға баруға, саяхатқа шығуға және білім алуға жұмсайды. Дегенмен, үйден тыс жерде тамақтану тарихи әдетпен байланысты болуы мүмкін. 

Ресейліктердің мейрамханалар мен қонақүйлерге бөлетін шығыны шамамен 3,3%, қазақстандықтар да осы көлемде жұмсайды. 

Зерттеу қорытындысына сәйкес, мәдениет пен бос уақытқа ең көп ақша жұмсайтындар Швеция (18,7%), Ұлыбритания (13%) мен Австрияда (11,5%) тұрады. Қазақстанда бұл көрсеткіш — 1,9 %.

904
Кілт сөздер:
зерттеу, мәдениет, қазақстандықтар, азық-түлік, тамақ
Тақырып бойынша
Kaspi bank клиенттердің шотынан ақша неліктен "жоғалғанын" түсіндірді
Сенат депутаты: кімнің қолында ақша бар, сотта сол жеңеді
Астанада қомақты ақша шешіп алған зейнеткерді банктің жанында тонап кетті
Дәрігер ота кезінде науқастан қомақты ақша талап еткен
Қасымов қылмыскерді ұстап берген тұрғындарға ақша төлемек
Конькиге ақша жинап жүрген чемпион қыздың оқиғасы ешкім күтпеген жалғасын тапты
Загрузка...