тұрғын үй, архив

Жаңа бағдарлама: Алматыда көпбалалы отбасылар арзан ипотекаға өтініш беріп жатыр

6060
Алматыда көпбалалы отбасыларды арзан ипотекалық баспанамен қамту үшін өтініштер қабылдау басталып кетті. Электронды түрде қабылданған өтініштер қазір 200-ден асты

 

АЛМАТЫ, 12 наурыз – Sputnik. "Көпбалалы отбасы" санаты бойынша баспанаға мұқтаждар есебінде тұрған азаматтарға жеңілдетілген несие беру үшін өтініштер қабылдау басталғанын және оның шарттарын Алматы қаласы Тұрғын үй саясаты басқармасы жария етті, деп хабарлайды Sputnik Қазақстан.

Несиенің жылдық сыйақы мөлшерлемесі - 2 пайыз

Өтініштерді қабылдау мерзімі шектеулі: 11 наурыздан бастап 15 наурызға дейін.

"Көпбалалы отбасылар "Бақытты отбасы" бағдарламасы аясында тұрғын үй жеңілдігін ала алады. Ол бойынша "Тұрғынүй құрылыс жинақ банкі" АҚ-тан 15 млн теңгеге дейін несие беріледі. Несиенің жылдық сыйақы мөлшерлемесі 2 пайыздан төмен. Бастапқы жарна – сатып алынатын пәтер құнының 10 пайызы", - деп хабарлады басқармадағылар.

Ол үшін алдымен www.baqytty-otbasy.kz сайтына кіріп, "Өтініштерді қабылдау" бөліміне арыз жазып қалдыру керек.

"Жылдық сыйақы мөлшерлемесі 2 пайызбен бұған дейін пәтерді несиеге берген емеспіз. Бұл өте жақсы мүмкіндік", - дейді Тұрғын үй құрылыс жинақ банкіндегілер.

Пәтерді өздері таңдайды

Банктегілердің айтуынша, өтініші қабылданған көпбалалы отбасыға пәтер таңдау үшін бір ай уақыт беріледі әрі оны таңдауға өздері де көмектеседі.

"Қазір банктің Алматы қалалық филиалында көпбалалы отбасылар баспанасы өлшеміне сәйкес келетін пәтерлердің тізімі жасалып жатыр.  Егер берілетін қарыздың ең жоғарғы сомасы 15 млн теңге деп алатын болсақ, онда несие төлеушінің ең қымбат ай сайынғы төлемі 79 мың теңге боп қалады", - дейді банктің тегін қызмет көрсету желісіндегі кеңесшілер.

Табысыңыз 25 мың теңгеден асса болғаны

Жеңілдетілген несиемен үй алу үшін, әрине көпбалалы отбасының қаржылық жағдайы есепке алынады. Бірақ оған көп алаңдаудың қажеті жоқ. Өйткені бұл әлеуметтік топтың табысына қатысты көп талап қойылмайтын боп шықты.

"Бағдарламаға қатысушы ай сайын борышын өтеу үшін, әрі күнкөріске қажетті ең төменгі сомасы барын нақтылауы үшін белгілі бір мөлшерде табыс табатынын дәлелдеуі керек. Бұл бір ересек адамға 5 айлық есептік көрсеткіш немесе 12 625 теңге.  Мысалы, күйеуі мен әйелін алсақ, онда бұл 25250 теңге болады. Бұл арада қарызды өтеу қабілеттілігін есептеуде балалар есепке алынбайтынын баса айта кеткіміз келеді", - дейді банктегілер.

Салыстыру үшін айта кетсек, мәселен қатардағы азаматтардың қарызды өтеу қабілеттілігін есептеуде отбасындағы бір ересек адам 15 айлық есептік көрсеткіш көлемінде, яғни 37 875 теңге табыс табатынын дәлелдеуі тиіс. Одан бөлек балалары болса, банк оларға да есеп жүргізеді екен.

Қандай құжаттар керек

"Бақытты отбасы" сайтына кіріп, өтінішті тіркету үшін азаматтардың электронды кілті болуы керек. Оны Халыққа қызмет көрсету орталығынан алуға болады.

  • Сонымен қатар өтінішке қоса азаматтар мынандай құжаттардың сканерленген нұсқасын өткізуі керек:
  • 2008 жылға дейін дүниеге келген баланың туу туралы куәлігі;
  • 2008 жылға дейін тіркелген неке туралы куәлігі (немесе некенің бұзылғандығын растайтын құжат), жолдасының/жұбайының қайтыс болғандығы туралы куәлік;
  • Некеде тұрмайтындығы туралы нотариалды бекітілген арыз.

Алматыдағы ХҚКО-да қарбалас байқалмайды

Әрине, бұл құжаттарды жинау үшін де белгілі бір уақыт керек. Сондықтан алматылық көпбалалы отбасылар құжатын өткізіп үлгермей қала ма деген қауіп те бар. Өйткені уақыт шектеулі ғой. Бірақ бүгін біз Алматы қаласы Алмалы аудандық Халыққа қызмет көрсету орталығына барғанымызда қандай да бір қарбаласты байқамадық.

Әлбетте, көпшілік бұл ақпараттан дер кезінде құлақтанбай қалған жоқ па деген күмән туындады бізде. Бірақ бұл күмәндімізді банктегілер былай сейілтті:

"Пәтер әкімдікте кезекте тұрған көпбалалы отбасыларға берілмек. Олар құжаттарын әлдеқашан бірнеше қайтара жинап қойған болуы керек. Тек оларға электронды кілт алып, сайтқа кіріп, соның бәрін өтінішпен қоса тапсырса жетіп жатыр".

Демек, мемлекеттік бағдарлама бойынша пәтер кезегі бар көпбалалы отбасыларға ғана беріледі.

Басқарма мәліметі бойынша, бүгіндері Алматыда 1276 көпбалалы отбасы кезекте тұр екен.  Ал сайтта кешелі бері өткізілген өтініштер саны қазір 218-ді көрсетіп тұр. Бұл - қаладағы көпбалалы отбасылардың 18 пайызы ғана.

Осы жайтқа қатысты туындаған сауалдарыңыз болса, онда Алматы қаласы Тұрғын үй басқармасының  мына 8 (727)2 25 12 04, 8 (727)2 25 14 57, 8 (727)2 25 14 44 немесе Тұрғын үй құрылыс жинақ банктің тегін желісі: 300, 8 8000 801 880 нөмірлеріне қоңырау шалып, жауап ала аласыздар.

6060
Кілт сөздер:
Алматы, Тұрғын үй құрылыс жинақ банкі, тұрғын үй бағдарламасы, баспана
Тақырып бойынша
Депутат баспана алу үшін жастардың жасын көтеруді ұсынды
Қазақстанда "Баспана Хит" бағдарламасы бойынша өтініш қабылдау басталды
Зейнеткерлер мен оралмандар тегін баспана алушылар тізімінен алынып тасталады
Мемлекеттік бағдарлама аясында баспана алушылардың тізімі жарияланды
"7-20-25" бағдарламасы арқылы баспана алуға бес қадам
Астанада 3 көпбалалы отбасыға тосынсый жасалмақ: оларға баспана беріледі
Ақша, теңге

Тоқаев: экономиканы әртараптандыру үшін жаңа реформаларды жүзеге асыру қажет

25
"Астана" халықаралық қаржы орталығы президентке жылдық есеп мен 2025 жылға дейінгі даму стратегиясын ұсынды

НҰР-СҰЛТАН, 2 шілде – Sputnik. Құнды қағаздардың ішкі нарығын дамыту үшін сенімді әрі нақты шаралар қабылдау керек. Президент Қасым-Жомарт Тоқаев "Астана" халықаралық қаржы орталығы басқару кеңесінің кеңейтілген отырысында осылай деді.

Кеңейтілген отырыс қорытындысы бойынша "Астана" халықаралық қаржы орталығының жылдық есебі мен оның 2025 жылға дейінгі даму стратегиясы қабылданды. 

Мемлекет басшысының пікірінше, АХҚО экономикалық бастамаларды жүзеге асыруға белсенді атсалысуы керек екенін айтты. 

"Ірі инвесторларды бір ғана ел аса қызықтырмауы мүмкін, ал сауда және өнеркәсіптік салалар бойынша байланысы мығым Еуразиялық одақ пен Орталық Азияның бүкіл аймағын елемеу қиын.  Инвесторлар осы елдердің біріне қызығушылық танытса, бұл өзге мемлекеттерге де табыс әкеледі. Осыған орай АХҚО өңірдегі елдерді байланыстыратын әмбебап платформа ретінде қызмет атқара алады", – деді президент. 

Қасым-Жомарт Тоқаев қаржы орталығы шетелден тікелей инвестиция тарту үшін өзінің әлеуетін толық пайдаланатынына сенім білдірді.

"Өзгеріс енгізетін уақыт келді. Сондай-ақ инвестиция портфельдері күшейту қажет. Құнды қағаздардың ішкі нарығы әлі толық дамыған жоқ. Сондықтан сенімді әрі нақты шаралар қабылдау керек. Қаржы нарығын реттеу және дамыту агенттігіне АХҚО-мен бірігіп, құнды қағаздардың ішкі нарығын ықпалдастыруға және дамытуға бағытталған жаңа әрі нақты нормативтік база әзірлеуді тапсырамын", – деді Тоқаев. 

Онлайн форматта өткен жиында қаралған негізгі мәселелердің бірі - Қазақстанның экономикалық өсімін қайта қалпына келтіру. 

Президент өз сөзінде АХҚО биржасына былтыр Полиметалл, "Қазатомөнеркәсібі" ҰАК»" АҚ және Halyk Bank секілді ірі корпоративтік компаниялардың акцияларының сәтті орналастырылғанын атап өтті.

Мемлекет басшысы пандемия мен мұнай бағасының құлдырауынан туындаған жаһандық дағдарыс жағдайында және дамушы елдердің нарығынан капиталдың кетуі кезінде ұлттық экономиканы әртараптандыру үшін жаңа реформаларды жүзеге асыру қажет екенін айтты.

25
Кілт сөздер:
реформа, экономика, Қасым-Жомарт Тоқаев
Тақырып бойынша
Тоқаев теңге бағамына қатысты бірқатар тапсырма берді
Вирустың екінші толқыны: сарапшылар экономика мен теңгенің тағдыры не болатынын айтты
Тоқаев Нұрсұлтан Назарбаевтың мінезі туралы айтты
Баспасөз хатшысы Елбасының денсаулығы туралы жазба жариялады
Тоқаев Назарбаев туралы жазды
Теңге бағамы

Тоқаев теңге бағамына қатысты бірқатар тапсырма берді

2508
(Жаңартылды 15:43 01.07.2020)
Президент Ұлттық банк пен Қаржы нарығын реттеу және дамыту агенттігіне шағын және орта бизнес пен экономиканы кредиттеуді ұлғайтуды тапсырды

НҰР-СҰЛТАН, 1 шілде — Sputnik. Президент Қасым-Жомарт Тоқаев Ұлттық банктің есебін қабылдады, деп хабарлайды Ақорда.

Ұлттық банк төрағасы Ерболат Досаев және басқарма мүшелері екінші деңгейдегі банктер активтерінің сапасын бағалау бойынша өткен жылғы қаржы-несие саясатына қатысты жүргізілген жұмыстардың қорытындылары, Ұлттық банктің алтын-валюта резервінің ахуалы және Ұлттық қордың активтері туралы есеп берді.

Қасым-Жомарт Тоқаев айырбас бағамы тұрақтылығының маңыздылығына тоқталды. 

"Бұл мәселеде үкімет пен Ұлттық банк үйлесімді жұмыс істеуі қажет екенін атап айтқым келеді. Квазимемлекеттік компаниялардағы басы артық валютаны ішкі нарыққа сату тәжірибесін жалғастыра беру керек. Ұлттық банк қажет болған жағдайда айырбас бағамын тұрақтандыру үшін қосымша шаралар қабылдайды", – деді Қасым-Жомарт Тоқаев. 

Ломбардтарды тексеру

Президент Ұлттық банкке Қаржы нарығын реттеу және дамыту агенттігімен бірлесіп, кепілсіз тұтыну несиесіне қатысты мәселені ұдайы бақылауда ұстау жөнінде тапсырма берілді. Мемлекет басшысы қаржы ұйымдарының жұмысын ашық жүргізу маңызды міндет екенін атап өтті. Бұл мәселе жалған ломбардтар мен микроқаржылық ұйымдардың алаяқтық іс-әрекеттері жиілеуіне байланысты өте өзекті болып отыр. 

"Бұл жұмысты жылдамдату керек. Тексерулердің қорытындысы негізінде Қаржы нарығын реттеу және дамыту агенттігіне Бас прокуратурамен бірлесіп, аталған саланы реттеу жұмыстарын жүйелі түрде жүргізу және тұтынушылардың құқығын қорғау жөнінде ұсыныс енгізуді тапсырамын", – деді мемлекет басшысы.

Қаржы нарығындағы заманауи технологиялар

Ақпаратта пандемия кезіндегі әлемдік үрдістер мен еліміздегі жағдай қаржы саласына заманауи технологияларды енгізу қажеттігін көрсеткені туралы айтылған.

Осыған байланысты президент Ұлттық банкке үкіметпен және "Астана" халықаралық қаржы орталығымен бірлесіп, 2025 жылға дейінгі қаржы технологиясы мен инновациясын дамытудың тұжырымдамасын бекітуді тапсырды.

Экономика мен бизнесті кредиттеу

Сондай-ақ, Ұлттық банкке экономика мен бизнесті белсенді несиелеу міндеті қойылды.

"Соңғы үш жылда экономиканы несиелеудің өсімі аса байқалмады. Банктер жұмыс барысында барынша қолайлы және тиімді жағдай ұсына отырып, әрбір клиент үшін белсенді күреспейді. Сонымен қатар қазіргі жағдайда бизнеске қаржы ресурсы қажет және оны жылдам алуы керек", - деді президент. 

2508
Ресейдің СІМ ғимараты

"Бізге дәлел қажет": Ресей New York Times мақаласына баға берді

0
Таяуда New York Times басылымы Ауғанстандағы Ресей мен тәлібтердің "келіссөзіндегі" "делдалды" атаған мақаласын жариялады

АЛМАТЫ, 2 шілде – Sputnik. Ресейдің сыртқы істер министрлігі Ресейдің тәлібтермен "сөз байласқанына" қандай да бір дәлел бар екеніне қатысты түсініктеме берді. Ресей Федерациясы президентінің Ауғанстандағы арнайы өкілі, Ресей СІМ екінші Азия департаментінің директоры Замир Кабуловтың айтуынша, мақалада тек бос айыптаулар жазылған.

"Бізге дәлел қажет, ал олар жоқ. Бұл бос пайымдау ғана", - деп мәлімдеді Кабулов Sputnik радиосына. 

Ол сондай-ақ, мақалада есімі аталатын контрабандист Рахмат Азизи жайлы ешқашан естімегенін айтты. Басылымның мәліметі бойынша, ол екі тараптың арасында бас делдал болған.  

Сонымен қатар Кабулов мақаланы оқып отырған кезде жауаптан гөрі сұрақ көп туындайтынын атап өтті.

"Жалған дүниені де мұқият дайындау қажет",- деп толықтырды ойын Кабулов. 

Айта кетейік, таяуда New York Times басылымы Ауғанстандағы Ресей мен тәлібтердің "келіссөзіндегі" "делдалды" атаған мақаласын жариялады. Мақала авторының айтуынша, делдал – контрабандист Рахмат Азизи деген азамат.

Бұған дейін NYT басылымы атауы көрсетілмеген арнайы қызметтерге сілтеме жасап, Ауғанстандағы америкалық сарбаздарға шабуыл жасағаны үшін Ресейдің тәлібтермен байланысы бар жауынгерлерге сыйақы ұсынғаны жайлы мақала жариялады. Алайда мақалада ешқандай дәлел көрсетілмеген.

"Талибан" қозғалысының өкілі Забиулл Муджахид америкалық басылымның бұл сөзін жоққа шығарды. Ал Трамп бұл мақаланы тапсырыспен жазылған болуы мүмкін деп бағалады.

0