АСТАНА, 5 қаз – Sputnik. "Бомба" туралы телефон шалғаны үшін екі жылға сотталған физика пәнінің мұғалімі Юрий Пак анасының жерлеуіне күзетші айдауымен, қолы кісендеулі күйінде қатысты, деп хабарлайды агенттік тілшісі.Мұғалімнің анасы үкім шығарылғаннан бір күн бұрын көз жұмған еді.
5 қазан сәрсенбі күні Қарағандыда Юриф Пактің анасы жерленді. Людмила Пак тез асқынған онкологиялық ауру салдарынан үкімнің шығуына бір күн қалғанда қайтыс болды. Туысқандарының айтуынша, ұлын ойлап уайымдағандықтан, марқұмның дерті асқынып кеткен екен.
Юрий Пактің әйелі Ольганың өтінішімен, Қарағанды облысы Қазыбек би ауданының соты мұғалімнің анасын соңғы сапарға шығарып салуына рұқсат беріпті. Бірақ әлеуметтік желілерде Юрий Пак анасымен қоштасудан бас тартты деген сыбыс тараған болатын.
Жерлеу күні Юрий Пак тегреу изоляторынан рәсімге жеткізілді, күзетшілер оны мұқият қорғап, мұғалім солардың біріне кісендеулі тұрды.
"Күзетшілер бізге оларды суретке түсірмесін деп айтқан еді. Суреттеріміз тарап кетпесін деп адамша өтінген болатын. Көлік нөмірін де түсірмеңіздер", — деп сұрады Ольга Пак журналистерден.
Қоштасу рәсіміне марқұмның туған-туыстары, достары және Юрийдің көптеген оқушылары қатысты.
"Юрий Дмитриевич, анаңыз сізді қалай тәрбиелесе, біздің балаларымызға да сондай тәлім бергеніңіз үшін рахмет. Сіз сияқты мұғалімдер өте аз. Соңына дейін сізбен боламыз, отбасыңызды жалғыз қалдырмаймыз", — деді ата-аналардың бірі.
Бірсағаттық жаназадан кейін күзетшілер Юрий Пакті арнайы көлікке отырғызып, жазасы өтеліп жатқан ТИ-16 орнына жеткізді. Ол изоляторда апелляцияға дейін болады. Қоштасарда Пак қолдау көрсеткен жандарға "рахмет" деп қана үлгерді.
