Сал ауруын жеңген Меруерт Тілебалды

Қазір адамдар жанымнан дұға оқымай өтеді сал ауруын жеңген қыздың әңгімесі

820
(Жаңартылды 13:48 10.04.2018)
Меруертке сонау бала кезінде ешқашан жүре алмайды, тұра алмайды, сөйлей алмайды деген диагноз қойылған. Алайда ол табандылығының арқасында бұл кеселді жеңіп шықты

АСТАНА, 26 наурыз — Sputnik, Кенжекей Тоқтамұрат.  Меруерт Тілебалды бала кезінде сал ауруына шалдыққан. Сол кезде дәрігер ата-анасына "балалар үйіне тапсыра салыңыздар" деп ақыл айтыпты. Бірақ, әке-шешесі қаршадай қыздарының ертең-ақ жазылып кететініне сенген және сол жолда көп қиындықты бастан кешірген. Кореядағы Паралимпиада ойындарында Қазақстан спортшыларына қолдау білдірген  рухы биік Меруертпен Ыстамбұл әуежайында сөйлескен едік. Ол АҚШ-қа бара жатқандықтан уақыт өте тығыз болды, дегенмен басты сұрақтарымызға толық жауап беріп, мамыр айында елге оралған соң, арқаны кеңге салып сұхбат беремін деп уәде етті. 

Қазір Меруерт – ҚР Ұлттық паралимпиада комитетінде спорт жөніндегі менеджер. Білімі – жоғары. КИМЭП-тің "экономика" факультетін тәмамдаған. Енді, АҚШ-та оқып келмекші.  

– Меруерт, ең алдымен Сізді шын жүректен құттықтағым келіп отыр, сіз Америкамен арадағы  Global Sports Mentoring Program on Disability Rights атты білім алмасу бағдарламасын жеңіп алыпсыз. Көпшілік бейхабар болғандықтан, осы бағдарлама туралы толығырақ айтып берсеңіз. Оқуыңыз қанша уақытқа созылады?

– GSMP бағдарламасы, яғни, спорттағы жаһандық тәлімгерлік бағдарламасы – бұл АҚШ-тың Мемлекеттік департаменті мен ESPN (Американың кабельдік спорт телеарнасы – авт.) бірлесе әзірлеген бастама. Бұл бағдарлама екі негізгі бағыттан тұрады. Яғни, бірінші бағыт – "Қоғамдастықтарға арналған спорт", ал екіншісі спорт арқылы әйелдердің құқықтары мен мүмкіндіктерін кеңейту (Sport for Community and Empower Women through Sports) бағыты. 

Бұл бес апталық тәлімгерлік бағдарлама халықаралық делегаттардың мүмкіндіктерін кеңейте отырып, олардың өз отанындағы спортқа үлес қосуын мақсат тұтады. 2012 жылдан бері Теннесси университетінің Спорт, бейбітшілік және қоғам орталығы АҚШ-тың Мемлекеттік департаментімен ынтымақтастық орнатқан. 2017 жылдан бері мен айтқан "Қоғамдастықтарға арналған спорт" бағыты АҚШ-та адам құқықтарын қорғап, мүмкіндігі шектеулі адамдардың өзгелермен тең өмір сүруі үшін жағдай жасап келеді. Осы "Қоғамдастықтарға арналған спорт" бағдарламасында АҚШ-тағы беделді ұйымдардың лауазымды адамдары халықаралық делегаттарды мүгедектерге арналған спорт секторымен таныстырады. Тәлімгерлік бағдарлама болған соң, бізді, яғни, халықаралық делегаттарды қабылдайтын ұйым мен тәлімгерлер делегациядағы көшбасшыларға Американың спортындағы басқаруды, жүйелі іс-әрекет орнатудың қыр-сырын үйретеді. Ал, біз америкалық әріптестерімізге өз еліміздегі жағдайды, мүмкіндігі шектеулі адамдардың алдынан шығатын қиындықтарды айтып және сол қиындықтармен қалай күресіп жүргенімізді үйретеміз. 

Ал, бұл тәлімгерлік бағдарлама әлем бойынша барынша ұзақ уақыт жұмыс істеп, нәтижесін беруі үшін әрбір делегат өз тәлімгерімен бірге стратегиялық жоспар әзірлейді де еліне оралған соң сол жоспарды іске асыруға міндеттеледі. Бұндағы мақсат – мүгедек адамдардың спортқа етене араласып, қоғамда, мансапта өзге адамдармен тең дәрежеге жетуі үшін жағдай жасау. Қорыта айтсам, бұл бағдарлама спорттағы мүмкіндігі шектеулі адамдарды шабыттандырып, әлемдік бір жүйе қалыптастыруға бағытталған. 

Ал, оқуым бүгін басталады және айтқанымдай, бес аптаға жалғасады. 

Сал ауруын жеңген Меруерт Тілебалды
© Sputnik / Кенжекей Тоқтамұрат
Сал ауруын жеңген Меруерт Тілебалды

– Сіз Қазақстанның Паралимпиада комитетінде жұмыс істейсіз. Жоғары білімді, жан-жақты және тәжірибелі мамансыз. Жазбаларыңыздың бірінде "адамдардың "сау" мен "сырқат" деп бөлетін ойын мәңгіге жойғым келеді" деген екенсіз. Комитеттегі жұмысыңыз осы арманыңызға жеткізді ме?

– Мені аяқ-қолы сау қызметкерлермен қатар қойып, қатар бағалайтындай деңгейге жеттім. Жалпы, менің ойымша, мүгедек адам өзін аямай еңбек етуі керек. Әрине, мен жаныңды жеп, қолдан келмейтін дүниелерді істе демеймін. Тек, ең алдымен өзіңді басқалармен тең дәрежеде ұстап, соған талпынсаң, халық та сондай көзқарас танытады. Менің жұмыс орным өте ыңғайлы, Паралимпиада комитетінің ғимараты мүгедек қызметкерлерге арналған халықаралық шарттардың бәрін сақтай отырып, салынған. Оның үстіне, бізді үйімізден әкетіп, жұмыстан соң жеткізіп тастайтын көлік бар дегендей. Бұл үшін, әрине, мен Қазақстанның Ұлттық паралимпиада комитетіне алғыс айтамын. Сондықтан, "мүгедекпін" деп, тағдырға налып отыратын жайым жоқ. Мен өз білімімнің, тынбай еңбек еткенімнің арқасында осы дәрежеге жеттім. 

– Меруерт, өкінішке қарай, Қазақстанда сал болып туатын балалар саны көбейіп кетті. Сіз қазір 28 жастасыз, дегенмен, бала кезде жан-жағыңыздағы адамдардың саусақпен шұқып көрсеткен кездері санаңызда әлі сақталып тұрған шығар. Солай болғанын өзіңіз де айтып, жазып жүрсіз. Бірақ, осы жылдар ішінде қоғамдағы сал балаларға деген көзқарас өзгерді ме, қалай ойлайсыз?

– Міне, бес жылдай болды, маған көшедегі жұрт саусағымен нұқып көрсетіп, жанымнан өтіп бара жатқанда "Алла сақтасын" деп, дұғасын оқымай өтеді. Ал, бұрын көңіліме тиетін сәттер көп болды ғой. Бұны тек сабырмен жеңе аласыз… Ең бастысы, өзіңнің мүгедек екеніңді іштей қабылдап, адамдарды да түсіне білу керек. Өйткені, көбі мүгедек адамды ренжітіп алмайын деп, үндемей тұра береді. Сондықтан, ең дұрысы қысылсаң да көмек сұрап, адамдарға расымен мүмкіндігің шектеулі екенін түсіндіре білу. Көп болса, бес минут қысыласыз, бірақ, көмек аласыз. Мысалы, маған көмек керек болса, мәселен, дала тайғанақ, ғимараттың сатысы биік болса, мен біреуден көмек күтемін. Қалған дүниелердің бәрін өзім жасап, өзім кіріп-шыға аламын. Ешкім көмектеспей жатса, өзім айтамын. Ал, біреулермен араласып, сөйлесіп кетсем, олар тіпті бір күн ішінде менің сал екенімді ұмытып да кетеді және бұл қалыпты жағдай. Әрине, жүріп-тұруы қиын, тіпті мүмкін емес науқастардың барын да білемін, түсінемін, және оларға сарқылмас сабыр мен үміттерінің үзілмеуін тілеймін. Үмітсіз шайтан деген…

– Сөз соңында Пхенчхан Паралимпиада ойындары туралы пікіріңізді сұрасақ. Оның үстіне Қазақстан тарихта тұңғыш рет алтын жүлдеге ие болды емес пе?!

– Спорт әлемін дүр сілкіндірдік деп осындайда айтуға болатын шығар. Бірнеше жыл бұрын спортшыларымыз паралимпиада ойындарына жүлдеден үміттенбей, кезекті бір халықаралық жаттығуға барғандай қатысатын еді. Ал қазір олар жан-жақтан қолдау көріп, жандарын салып еңбек етуге кірісті. Спортшыларымыз халықаралық оқу-жаттығуларға барып, халықаралық медициналық тексерістен өтіп жүр. Ұлттық құрамамыз толық жабдықталып, шетелден жаттықтырушылар алдыра бастадық. Биылғы жетістігімізге қарап, өзге елдердің спортшылары мен жаттықтырушылары бізден ақыл сұрай бастады. Біздің батырлар ел намысын қолдан берген жоқ, ал ҚР Ұлттық паралимпиада комитеті, мәдениет және спорт министрлігі, спорт басқармалары сияқты тараптар осы алтын медаль жолында көп еңбек етті. Ең бастысы, отандастарымыз Паралимпиада ойындарына қызыға бастап, спортшыларымызды демеу үшін Кореяға барды. Біздің спортшылар қатысқан әрбір жарыс кезінде "Қазақстан" деген ұран алыстан-ақ естіліп тұрды. Нағыз қолдау сол болды. Ал, осы қызу өмірдің арасында жүру мен үшін бақыт, Қазақстандағы паралимпиада қозғалысының осындай тарихын жазып жатқанымызға қуаныштымын. Қазақстанның пара-спортына титтей де болса үлес қосып жатқаным көңілге қуаныш ұялатады.  

– Сұхбатыңызға көп рақмет. Өзіңіз сияқты жандарға, әсіресе, сал балаларға мотивация сыйлап жүре беріңіз. 


820
Ермек Тұрсынов

"Бұлардың істеп жүргені - мазақ": Ермек Тұрсынов ашық сұхбат берді

4191
(Жаңартылды 23:20 07.08.2020)
Кинорежиссер бір жылдан бері қандай ұсынысы әлі де жүзеге асырылмағанын, кімнің фильмдері көңілінен шықпайтынын айтты

АЛМАТЫ, 7 тамыз – Sputnik. Қазақстандық кинорежиссер, сценарист, Қазақстан кинематографистер одағының төрағасы, ұлттық қоғамдық сенім кеңесінің мүшесі Ермек Тұрсынов ұлттық кеңестегі ұсынысынан кейін мәдениет министрімен қандай қарым-қатынаста екенін, сондай-ақ, қазіргі кино жайлы ойын Sputnik Қазақстан тілшісіне айтып берді.

Ұлттық кеңестегі ұсыныс

"Ұлттық қоғамдық кеңес құрылған кезде көбіне саясатқа байланысты мәселелер көтерілген болатын. Біраз нәтижелі жұмыс жүргізілді. Әсіресе, митингіге байланысты сұрақтардың жауабы шешілді. Бірнеше салмақты, маңызды шешім қабылданды деп айтуға болады. Ал мен мәдениетке байланысты мәселені көтердім", - дейді Тұрсынов.

Ермек Тұрсынов
© Photo : Ермек Тұрсыновтың жеке архивінен алынды
"Министрмен келіспей қалдық"

Ұлттық қоғамдық сенім кеңесінің 2019 жылы өткен отырысында Ермек Тұрсынов мәдениет және спорт министрлігін бөлуді ұсынды. Тұрсыновтың айтуынша, содан кейін мәдениет министрі Ақтоты Райымқұлова режиссерға қоңырау шалған.

"Ол кісіге менің ұсынысым ұнаған жоқ. Мәдениет пен спортты бөлуді ұнатпады. Сөзге келіп қалдық деп айтуға келмес, бірақ пікіріміз екі түрлі болды. Келіспей қалдық. Ал көпшілік менің айтқанымды өте жақсы қабылдады. Қазірге дейін сол отырыста айтқан сөзімді желіде жариялап отырады", - дейді режиссер.

Ермек Тұрсынов сол отырыстан бері бір жылға жуық уақыт өтсе де, ұсынысының еш нәтиже бермегенін айтып өтті. Алайда республика аумағын аралаған кезінде адамдар ілтипат танытып, режиссер пікірімен толық келісетінін жеткізетін көрінеді.

"Ұлттық кеңес мүшелері мәдениет пен спортты бөлу туралы ұсынысымды өте жақсы қабылдады. Мен қазір де солай ойлаймын. Бәрі мәдениеттен басталады", - дейді Тұрсынов. Ең өкініштісі – сол ұсыныс тек сөз болып қалды, деп толықтырды ол.

"Кино үйі" төңірегіндегі дау

Қазақстан кинематографистер одағының төрағасы одақ жұмыс істейтінін, алайда "Кино үйі" төңірегіндегі даудың екі жылдан бері шешімі табылмай жатқанын айтты.

"Кино үйі" мәселесі бір орыннан жылжымай тұр. Екі жылдан бері соттасып жатырмыз. Қара шаңырағымызды өзімізге қайтара алмай жүрміз. Сот жалғасып жатыр, қашан бітетіні тіпті белгісіз. Оны ешкім айта алмайды. Бармаған жерім жоқ. Қазір одақ мүшелері отырып жұмыс істейтін орын жоқ. Кейде "Қазақконцерт" ғимаратында, кейде мейрамханада кездесіп, жиналыс өткіземіз. Кейде "Қазақфильмнің" бірінші қабатындағы аядай бөлмеде жиналамыз", - дейді Тұрсынов.

Айтуынша, бұл мәселе кеше туындаған жоқ. Бір кездері одаққа басшылық еткен кісі "Кино үйінің" жартысын сатып жіберген. Одан кейін де басшылыққа келгендер қалған жарты бөлігін жалға беріп қойған. Содан бері сот процесі жүріп жатыр.

"Қазақфильм" басшылығы туралы

Ермек Тұрсыновтан бір салада жүрген әріптесі Ақан Сатаевтың "Қазақфильмге" басшы болып тағайындалғанына қатысты пікірін де сұрадық. Алайда режиссер бұл шешімнің артында жаман оқиға тұрғанын, алайда дәл қазір ашып айта алмайтынын жеткізді.

"Мұны дәл қазір ашып айта алмаймын. Себебі бұл мәселе қазір талқыланып жатыр. Қай жаққа шығаратынын айта алмаймын. Бірнеше аптада бұл мәселе шешіледі. Сатаевтың алдында "Қазақфильмді" Арман Әсенов басқарды. Оны бұл қызметте тоғыз ай қызмет істегеннен кейін орнынан алып тастау, меніңше, қате. Не болатынын көреміз", - дейді Тұрсынов.

Айтуынша, "Қазақфильмді" экономикадан хабары бар маман басқаруы керек.

"Қазақта "қисық аяққа қызыл кебіс не керек?" деген сөз бар. Режиссер – өнердің адамы, ал бұл қызметке есептің адамы, экономиканы білетін адам керек", - деді Ермек Тұрсынов.

"Істеп жүргені - мазақ"

"Тақиялы Періште", кешегі "Қыз Жібек" фильмдері ақша үшін жасалған жоқ. Бұл киноның авторлары ең алдымен елдің көңілін, елдің санасын ойлады. Ақша жағына келер болсақ, ол кейінгі заманның "модасына" айналып кеткен ұғым. Иә, ақшаға да мән беру керек, бірақ ақшадан басқа ешқандай мақсат болмаса, ол шедевр болмайды", - дейді Тұрсынов.

Премьера фильма Томирис
© Sputnik / Владислав Воднев
"Томирис" фильмінің премьерасы

"Ал арзанқол фильмнің миллиондап табыс табуы – көрерменнің надандығын көрсетеді, - деп жалғастырды Тұрсынов. - Қоянбаевтың түсіргенін кино деп айтуға болмайды, осыны адамдарға айтып түсіндіру керек. Баян Алакөзова да кітап жазды, бірақ ол әдебиет емес. Нұртас Адамбаев, Нұрлан Қоянбаев, Қайрат Нұртас пен Төреғалидің түсіріп жатқаны кино емес. Кино деп "Тақиялы періште", "Атамекен", "Қыз Жібекті" атауға болады. Ал бұлардың істеп жүргені – мазақ".

Сонымен қатар Тұрсынов "Томиристі" кино деп санамайтынын, бірақ оған әртістік құрамның еш кінәсі жоқ екенін айтты.

"Томирис" – кино емес. Бұған басқа алып-қосарым жоқ. Әртістердің еш жазығы жоқ, қойылған тапсырманы орындауға тырысты. Негізгі жауап беретін – режиссер", - деп түйіндеді сөзін Тұрсынов.

Режиссер Ермек Тұрсынов
© Photo : Ермек Тұрсыновтың жеке архивінен алынды
Ермек Тұрсынов режиссерлік мансабын "Келін" фильмінен бастаған. 2012 жылы режиссердің "Шал" фильмі шықты

Ермек Тұрсынов 1961 жылы Алматы облысында дүниеге келген. Режиссерлік мансабын "Келін" фильмінен бастаған. 2012 жылы режиссердің "Шал" фильмі шықты. Сонымен қатар Тұрсынов бірқатар фильмге сценарий жазған.

4191
Кілт сөздер:
Ермек Тұрсынов, режиссер
Тақырып бойынша
"Томиристің" қазақшасы қайда?": Ақан Сатаев халықтан кешірім сұрады
"Қыз Жібекті" үш жыл түсірдік": актер әрі режиссер Асанәлі Әшімов жайлы не білеміз
Тұрсынов Димаштың жетістігіне ортақтасатын шенеуніктерді сынап тастады
Режиссер Ақан Сатаев басшылық қызметке тағайындалды
Белгілі режиссер Ақан Сатаев тұңғышын ұзатты – фото 
Айдар Тұрғамбек

Айдар Тұрғамбек жағымды жаңалығын бөлісті

4791
(Жаңартылды 15:20 30.07.2020)
Әнші халыққа сапалы ән тыңдауға мүмкіндік беретін жаңалығымен бөлісті. Мұның арқасында өнер адамының да еңбегі бағаланады, дейді ол

АЛМАТЫ, 29 шілде – Sputnik, Айгерім Таубай. "Жігіттер" тобының әншісі Айдар Тұрғамбек қазақ әндері жүктелетін сайт туралы қуанышты хабарым Sputnik Қазақстан тілшісімен бөлісті. Карантин кезінде әншінің өзі де екі ән жазған.

"Карантин уақытында шығармашылықпен айналыстым. Енді бірнеше күннен кейін сайт та іске қосылады. 2002-2003 жылдары қазақ эстрадасында әндер кассета күйінде сатылатын, яғни өнер, шығармашылық бағаланатын. Қазір интернет арқылы әнді жазып алу тегін болып кетті", - дейді әнші.

Айтуынша, мұндай сайт ашуды ұзақ уақыттан бері ойланып жүрген. Себебі кей ән өзіне жұмсалған ақшаны ақтамайды.

"Той мен концерт өткізуге қашан рұқсат берілетіні белгісіз. Сол себепті біздің өнім сайт арқылы сатылуы керек. Соған сәйкес, қазақ эстрадасында сапалы әндер шығатын болады. Тойдың әндері, сапасыз әндер болмайды. Халық та сапалы ән тыңдайды, өнер адамының да еңбегі бағаланады", - дейді Тұрғамбек.

Әнші сұхбат барысында жас өнерпаздардың эстрадаға қандай мақсатпен келетіні жайлы айтып берді. Айтуынша, жас әншілердің үлкен қателігі – бір ән жазып танымал болуды ойлау.

"Қазір көп адам тойдың әнін жазып, тойға шығып қаржы табамын деп өнерге келеді. Ондай адамдар ұзаққа бармайды. Өнерге ақша үшін келуге болмайды. Біз өнерді университетте оқыдық, магистратураны да бітірдік. "Жігіттер" тобы құрылған кезде қаншама қиындық болды, түрлі байқауға қатыстық. Жетістікке жету үшін тер төгілді. Біз басында ақшаны ойлаған жоқпыз, ән айтқымыз келді", - деп еске алды әнші.

Айдар Тұрғамбек
© Photo : Айдар Тұрғамбектің жеке архивінен алынды
"Тойдың әндері, сапасыз әндер болмайды"

Ол өнер адамы халыққа қандай пайдалы ән сыйлаймын деп келу керек дейді. Алайда біздің қоғамда тойсыз да болмайтынын атап өтті. Тойда айтылатын ән де қажет, бірақ мақсат той болып кетпегені жақсы. Өнерге хобби ретінде қарау керек, негізгі табыс басқа жерден түсіп отырғаны жөн, дейді ол.

Әр адамның жеке қоры болуы керек

"Концерт пен тойдың ертерек басталғанын қалаймыз. Халықпен жүздескіміз келеді, концертке барып, өнер көрсеткіміз келеді. Алайда концерт пен тойдан бөлек қаржы түсіп тұратын жұмыстарым бар", - дейді әнші.

Ол әр отбасының табысы мен шығыны әртүрлі екенін де айтты. Кез келген жағдайға дайын болып, бір-екі жылға жететіндей қаржы қоры болғаны дұрыс, дейді ол.

"Карантин кезінде табысым әдеттегіден айтарлықтай азайды, бірақ білімге инвестиция құйып, қаржылық сауаттылық жағынан дамыдым. Қандай кәсіппен айналысу керек екені жайында көп оқыдым. Карантиннің арқасында отбасымның жанында көбірек уақыт өткізіп, балалардың қалай өсіп жатқанын көріп жатырмын", - дейді Тұрғамбек.

Әншінің арманы

Сұхбат барысында әнші той жасау мәселесі мен бағасына да тоқталды. Әнші өзін тойға шығатын танымал әншілердің ішінде ең арзан бағаны айтатын өнерпаз деп есептейді.

"Халық қай әншіні ұнатса, сол адамды тойына шақырады. Ұнамаса, қинап ешкім шақырта алмайды. Менің қойған бағам қымбат емес. Тойға шығып жүрген танымал әншілердің ішіндегі ең арзан баға десе де болады. Өйткені "Жігіттер" тобымен де тойға шығамын, жеке де өнер көрсетемін. Жеке шығатын бағам халыққа қолжетімді. Ол карантиннен бұрын да солай болды, карантиннен кейін де солай болып қала береді", – дейді Айдар Тұрғамбек.

Ал тойды әркім өз шама-шарқына қарап жасау қажет деген әнші өзінің де қыздарын ұзатып, той жасағысы келетінін жасырмады.

"Тойды шамасы келетін адам жасауы керек. Барлық ата-ана баласын үйлендіріп, қызын ұзатқысы келеді. Мен де қызымды қолымнан ұзатқым келеді. Сондықтан басқа адамға балаңды үйлендіргенде той жасауға болмайды деп қалай айтасың?", - дейді әнші.

Қазір бәсекелестік кезеңі, біреудің тойы үлкен мейрамханада өтті, менікі де солай өту керек деп ойлайды. Кредит алып, қарызға той жасаудың қажеті жоқ. Шамасы келетін деңгейде өткізу дұрыс деп санаймын, деп толықтырды Тұрғамбек.

4791
Кілт сөздер:
ән, той, әнші
СҚО тасжолында КамАЗ бен Тойота соқтығысты

Солтүстік Қазақстанда жантүршігерлік жол апаты болды: жеңіл көлік жапырылып қалды  

0
Апат Челябі – Новосібір  тасжолында Пеньково ауылының маңында болды. Соққыдан кейін КамАЗ жол жиегіне ұшып түсті, ал шетелдік көлік металл үйіндісіне айналды

ПЕТРОПАВЛ, 12 тамыз – Sputnik. Солтүстік Қазақстан облысында екі адамның өмірін қиған жол апатына қатысты тергеу жүріп жатыр, деп хабарлады Sputnik Қазақстанға облыстық полиция департаментінің баспасөз қызметі.

Жол апаты Челябі – Новосібір автожолында Қызылжар ауданындағы Пеньково ауылының маңында болған.

"Мағжан Жұмабаев ауданының 62 жастағы тұрғыны Toyota Camry көлігімен қарсы жолаққа шығып кетіп, Булаево қаласының 56 жастағы тұрғыны жүргізіп келе жатқан КамАЗ автокөлігімен соқтығысқан. Жол апаты салдарынан Toyota Camry жүргізушісі мен оның 1957 жылы туған жолаушысы алған жарақатынан оқиға орнында көз жұмды. КамАЗ жүргізушісі зардап шеккен жоқ", - деп хабарлады полиция.

КамАЗ и Тойота столкнулись на трассе в СКО
© Photo : пресс-служба департамента полиции Северо-Казахстанской области
СҚО тасжолында "КамАЗ" бен "Тойота" соқтығысты

Солтүстік Қазақстан облысы полиция департаменті бастығының бірінші орынбасары полковник Қанат Айтбаевтың айтуынша, барлық қажетті сараптама тағайындалды.  

Осы жылдың жеті айында Солтүстік Қазақстан жолдарында 98 жол апаты болып, салдарынан 13 адам көз жұмып, 129 адам жарақат алды.

0
Кілт сөздер:
Солтүстік Қазақстан облысы, жол апаты
Тақырып бойынша
Ақтау – Жаңаөзен тасжолында бірнеше адам көз жұмды – видео
Атырау облысында болашағынан үміт күттірген үш боксшы қаза болды  
Қостанай облысында 7 жасар бала полициядан қашқан әкесінің көлігінде көз жұмды
Алматыда дрифт жасаған жүргізуші ірі апатқа себепкер болды