Қазақстан Республикасының еңбек сіңірген қайраткері Майра Ілиясова

Майра Ілиясова: Ринат айтыста профессор болсын, ал Димашта жұмысы болмасын

10089
(Жаңартылды 11:35 07.02.2019)
Майра Ілиясова қазақ қазақты мойындау үшін Қытайды мойындатуы керек болды деген пікірмен түбегейлі келіспейтінін айтты

АЛМАТЫ, 23 қаңтар — Sputnik, Айгерім Таубай. Қазақстан Республикасының еңбек сіңірген қайраткері, "Құрмет", "Парасат" ордендерінің иегері, "Алтын жүрек" номинациясының лауреаты Майра Ілиясовамен Sputnik қазақстан тілшісі әншінің шығармашылығы, 2019 жылға жоспары, Димаш Құдайбергеннің өнері жайында әңгімелесті. 

Ең алдымен Астананың төрінен Алматыға екі күнге келсеңіз де, уақыт тапқаныңыз үшін көп рақмет. Әңгімемізді шығармашылығыңыздағы жаңалықтардан бастасақ. Келген 2019 жылға жоспарыңыз қандай?

Жаңалық көп. Соның ең үлкені биыл менің "Сағындырған әндер-ай" жобама – 10 жыл. Концерт 2 мамырда өтеді. Қазірден бастап қызу дайындыққа кірісіп кеттік. Менің бірінші болып шақыратын әншілерім – Бибігүл апа, Нағима Есқалиева, Роза Рымбаева, Мақпал Жүнісова, Ескендір Хасанғалиев, Нұрғали Нүсіпжанов. Одан кейін жастар, орта буын шақырылады. Концертті биыл ерекше өткізгелі жатырмыз. Жастар бұл жолы аз қатысады. Мен әдетте облыстан танымал емес, дауысы жақсы жас әншілерді шақырып тұрамын. Олар хабарласып, бізді ешкім сахнаға шығармайды деп ренжіп жатады. Жас күнімізде өзіміз де "бізді қай режиссер шақырады екен" деп отырушы едік. 

Көпшілік "Сағындырған әндер-ай" жобасын Қазақстандағы нөмірі бірінші бренд концерт деп айтады. Осындай пікірді үлкен кісілерден жиі естимін. Еркеғали Рахмадиев ағамыздың бір Алматыға келгенінде "Майра, қалқам! Осы теледидарды қосып не көрерімізді білмей отырушы едік. Қазір "Сағындырған әндер-айды" көреміз" деп еді. Осы 10 жылда жинаған тәжірибеміз көп. Биыл қызыл кілем жасайын деп жатырмыз. 10 жылдан бері еңбегі сіңген әншілерге арнайы сыйлығымыз бар. "Сағындырған әндер-айға қосқан үлесіңіз үшін" деген алғыс хат пен арнайы статуэткамыз бар. Концерттің тағы бір ерекшелігі — үлкен әнші мен жас әншілердің бірге ән айтуы. Бұл жолы орта жастағы әншілер бірге ән айтуы мүмкін. Одан кейін 8 наурызда жылдағы әдетімізден жаңылмай, "Жан анам" қайырымдылық концертін өткіземіз. Жыл сайын жиналған қаржыны бір науқас баланың еміне беріп отырамыз. 

Майра Ілиясова Sputnik Қазақстан тілшісімен сұхбаттасып отыр
© Sputnik / Тимур Батыршин
Майра Ілиясова Sputnik Қазақстан тілшісімен сұхбаттасып отыр

Білуімше, Қазақ ұлттық өнер университетінде дәстүрлі өнер факультетінің деканысыз. Әнші әрі продюсер, авторлық жобаларыңыз бар. Астанаға қоныс аудардыңыз. Тағы қандай жобаларыңыз бар?

Иә, дәстүрлі өнер факультетінің деканымын. Ректорымыз – Айман Мұсаходжаева. Сол кісінің сұрауымен Астанаға көштім. Келген бойда маған үш бөлмелі пәтер берілді. Қазір сол жерде жұмыс істеймін. Деканмын әрі сабақ беремін. Бір өкініштісі, қол байлаулы. Декан болғандықтан кабинетте отырасың, құжаттарға қол қоясың. Ол творчестволық жақтан қол байлайды. Факульетте жиі кездесу мен ән кештері өтеді. Ректор шақырғанда болуың керек. Студенттердің тәртібін қадағалайсың. Кейде тыпырлап қалам. Факульетте декан болуға лайықты кісілер бар. Осы жайында басшылыққа айтып, декан болудан бас тартсам ба деп жүрмін. "Сағындырған әндер–ай" мен "Жан анамнан" бөлек тағы екі авторлық жобам бар. Соның бәріне уақыт керек.

Тағы оқыңыз: Министрлік Роза Рымбаеваның мәлімдемесіне қатысты жауап берді

Ол қандай жоба?

Алматыда 2000 жылы ашқан балалар мектебім бар. Астанаға көшер кезде сенімді шәкіртіме тапсырдым. "Жұлдыз болғың келсе" деген конкурс өткіземіз. Мектептің ашылуына ата–аналар себепші болды. "Қандай конкустар бар? Балаларымызды қайда апарамыз?" деп жиі келетін. Қарасам, балалар махаббат жайлы ән айтады. Сахнада өзін қалай ұстау керек екенін білмейді. Қазір ойлап отырсам, құбылмалы кезеңде мектеп ашыппын. Дағдарыс кезінде "Сағындырған әндер–айды" қолға алдым. Бұйыртса биыл Астана қаласынан менің өнер мектебім ашылады. Дайындық үстіндеміз. Одан бөлек тағы 5 облыстан ашып жатырмыз. 

Менің мектебімнен бөлек елімізде балаларға арналған түрлі мектеп бар. Ашылып жатыр. Бірі жабылып жатыр. Мектеп ашу үшін білім керек, өнер керек. Ақша табудың жолы деп емес, өнерге тәрбиелейтін мекен деп қарау қажет. Менің жаңадан ашылып жатқан мектебімдегі өзіндік ерекшелік ол жерде эстетикалық бөлім бар. Эстрадалық вокал, көркем сөз, қара сөз бар. Эстетикалық бөлімге журналистиканы, ұл бала мен қыз баланың тәрбиесін қостым. Жүріп тұру, тағамды қалай ішу, қолөнерге үйретеді. Ұлы сөзде ұят жоқ, кейде күйеуге шығатын қыздар гигиенаның не екенін білмей жатады. Бүйрегі ауыратын қыздар тұрмысқа шығып, бүйрегі ауыратын бала туады. Соның бәрін бала күннен, мектеп кезінен бастап үйрету керек.  

Эстрада мен дәстүрлі өнерді қатар алып жүрген жансыз. Ұстаз екеніңізді жоғарыда атап өттік. Сізге жиі сын айтыла ма?

Иә, менің эстрадаға келгеніме 15 жылдан асты. Оған дейін мен Құрманғазы мен Отырар оркестрімен ән айттым, Сазген ансамблінде 20 жыл әнші болдым. Ансамбльмен айтып жүрген адамға эстрада таңсық емес. Алайда мен эстрадаға келген кезде "Майра домбырасын тастап, жырық көйлек киіп, эстрадаға шығыпты" деген пікірлер айтылды. Мұны айтқан кісілер мені эстрадаға қимаған шығар деп ойлаймын. Алайда мен домбырамды тастаған жоқпын. Жырық көйлекті одан кейін кимейтін болдым. Сахнаға кең етек көйлегіммен шығамын. Менің әр концертімде домбырамен бірнеше ән айтатынымды тыңдармандарым біледі. Үлкен кісілер де етегі жабық деп мені жақсы көреді. Менің әнімді жақсы көреді.

Тойға жиі шақыра ма? Қандай тойға көп шақырады?

Мен қазір Астанада тұрамын. Алматыға келуімнің бір себебі – той. Мені барлық тойға шақырады: тұсау кесер, үйлену той. Менің өлеңімді, өнерімді сүйетін тыңдарман қандай той екеніне қарамайды. Көп байқайтыным, мені 50 жас, 60 жас, 70 жас секілді тойларға жиі шақырады. Мені үлкен буын жақсы көреді. Шақырған жерден қалмаймын десем болады. Мен ертеректе облысқа 4 мың долларға, Алматыда 3 мың долларға тойға барып жүрген кезде бір сайт "Майра Ілиясова мың долларға шығады екен" деп жазды. Сол журналистерді табуға уақытым да болмады.

Ал қазір ол бағадан төмен түстік. Халықтың жағдайына қараймыз. Кейде үлкен жастағы кісілер хабарласады. Арасында көп балалы анамын деп жатады. Қазір мың жарым, 2 мың долларға барамын. Тойға барсақ балаларын алып келіп, аузына түкірші дейді. Мен гигеналық жақтан болмайды деп маңдайынан, бетінен сүйемін. Қарақат Әбілдина тұсау кесу орталығын ашып қойды ғой. Ол да мәдениеттің бір түрі. Қыдырәлі продюсер ретінде жақсы шешім қабылдаған. Кейінгі кезде "ауызға түкір" деген орталық ашсам ба екен деп қалжыңдап қоямын (күледі).

Сөз арасында әншілердің ішінде мен және Ұлықпан Жолдасов бақытты адамдармыз деп қалдыңыз. Неге? 

Ұлықпан – Димаштың кіндік әкесі, Айған – кіндік шешесі, ал мені Қытайға Димашпен бірге мәдениет министрі мен ректор Айман Мұсаходжаева жіберді. Мен ылғи Димаштың жанында жүрмін. Америкаға да бірге бардық. Өзім Димашты өте жақсы көремін. Өткен жылы біздің өнер университетін аяқтады. Димаш – өте ақылды, ғажайыптан туған бала. 

Әңгімемізді Димаш Құдайбергеновке аударсақ. Ринат Зайытов бір сұхбатында "Димаштың образын қалыптастырған кім? Қытай… Олар біздің баланы өзімізге қарсы пайдаланып жатыр. Мұның дәл осылай болатынын білгенмін. Бұл – болған практика. Бірақ Димаш Қазақстанда жүргенде бір адам қолынан жетектеп, сол байқауға апарды ма? Ал енді мақтануға мәзбіз. Біздің бала деп жатырмыз… Ал қазір Димаш Құдайбергенов – Қытай саясатының құрбаны" деген болатын. Және "Саз әлемінегі" Ринат Зайытовтың пікірі әлі күнге дейін ғаламтордан түспей келе жатыр. Осы жайында не айтасыз?

Бұл – Ринаттың сауатсыздығы. Егер Ринат әнші болса, өнерге бір табан жақын болса, ондай әңгіме айтпас еді. Бүкіл дүниені мойындатып жатқан, мықты профессор, әлемдік деңгейдегі мамандардың бағасын алып жүрген Димашқа неге ондай пікір айтады? Бұл өзі біздің қазақтың тарихында бар. Болсын демейміз, етектен тартамыз. Димашқа мүлдем қатысы болмаса да, аузына келгенді айтып жатыр. Ал оған қара халық бетке айтты деп қол соғады. Кейбіреу оның сөзін де түсініп жатқан жоқ. Ринатқа ондай сөз айту ұят. Қандай Қытай Димаштың шоқпарын соғып отыр?

Қытайға дейін біздің Димаш "Славян базарына" барып гран–при алып келді. Оның алдында Димаш президенттік шәкіртақы алды. Димаш – мен сабақ беретін факультеттің, мен сабақ беретін оқу ордасының шәкірті. Біз оған тіл тигізуге жол бермейміз. Ринат өз саласында, айтыста мейлі профессор болсын, ал Димашта жұмысы болмасын. Егер Димаштың дауысын білмесе, онда оған сын айтудың қажеті жоқ. 

Бұл жерде журналистердің де қателігі бар. Рейтинг, шоу үшін айтылмағанды айтты деп, түймедейді түйедей етіп жетізеді. Сол секілді Димаш халықаралық конкурсқа Қытайда емес, Англияда қатысса да дәл солай танылушы еді. Дәл солай өзіне лайық бағасын алушы еді. 

"Әйел дауыстыларды жек көремін" деген Ринаттың тағы бір пікірі бар. Ол әйел дауыс емес. Ол біздің тарихымызда бар. Бізде жоғары нотада айтатын Ерік Құрманғалиев болды. 

Біз – әншілер деген үлкен қоғамбыз. Біз – бір армиямыз. Егер осы ісін қоймайтын болса, біз оны тоқтата аламыз. Ринат – семейлік менің жерлесім, бауырым. Жарқырап шыққан кезде барлығымыз Ринатжан деп қолдадық. Құрмет көрді. Қазір дәл сол құрметті Димаш көріп жатыр. 

Тағы бір өкініштісі, көрермен әртүрлі болады. Үйде отырған адам, оқымағандар да, делебесі қозып қол соғатындар да бар. Әр адам өз саласының хирургі, сол саланы сынауына болады. Ешкім өзі білмейтін саланы қозғамағаны дұрыс. Бүкіл әлем мойындап отырған Димашты түкке тұрмайтын арзан әңгімемен сынаудың қажеті жоқ. Димаштың да жүрегі ауырады ғой. Осы әрекеті үшін мен Ринат үшін ұялдым. 

Димаш алдымен өзін қазаққа танытты. Ал Қытай мен Ресейдің, Англияның жасаған жарнамасына біздің шашымыз жетпейді. Қазақ қазақты мойындау үшін Қытайды мойындатуы керек болды деген пікірмен түбегейлі келіспеймін. Бізге жарнама жетіспеді. Мысалы Бибігүл ападай бұлбұл әлемде жоқ. Апай он шақты жыл болып қалды халықаралық конкурс ұйымдастырады. Мен өз еркіммен демеуші болдым сол конкурста. Қарап отырсам, бір шетелдік әнші Бибігүл апаның "Бұлбұлын" орындай алмайды. Бір қазақтың әншісі орындай алмайды. Бұлбұлдың шықылықтауын тек Бибігүл апайға ғана берілген. 

Тағы оқыңыз: Бибігүл Төлегенова туралы не білеміз?

Ешкімге ұқсамайтын мектеп ашуды қолға алып жатқаныңызды айтып қалдыңыз. Тағы қандай арман, жопарларыңыз бар? Бала армандарыңыз орындалды ма?

Қазіргі арманым — мектеп ашу. Жоспарыма жазып қойдым. Ендігі бір арманым "Әнші Майра ауылын" салғым келеді. Атын бала күнімде қойғанмын. Ол жерде менің театрым, менің мейрамханам болса деймін. Концерт көруге келген халық ұлттық тағамнан дәм татып, қымыз ішуге келетін болса деймін. Бала кезден тағы бір арманым бар, ол бір тағамымның аты – Бибігүл, бірі – Роза, бірі – Мақпал, бірі – Нағима болса деймін. Келген жұрт әнші Мақпалдан дәм татайық десе, жақсы емес пе?! Әзірленетін астың құрамын да өзім ойлап тапсам деймін. Екіншісі – "Әнші Майра театрын" ашу. Дәстүрлі музыка, фольклорлық өнердің ошағы болуын қалаймын. Мүмкін үкімет көмектесіп қалар. Көпшілік "Сағындырған әндер–айға" қарап бір министрліктің жұмысын істеп жүрсіз деп жатады.

Қандай әжесіз?

Мен керемет әжемін. Дүние жүзінде екі әже болса, ең жақсысы мен болар едім. Оны салыстырмалы түрде айтып отырмын. Егер қазір маған "Мектеп ашуды тоқтат, декандықтан шық, сабақ беруіңді қой, барлық жобаңды тоқтат, 4 немереңе қара десе", мен немерелерімді бағамын. Менің алақаныма салып өсірген бір ғана қызым бар. Өзі бір тал қызға ұқсамайды, ерке емес. 

Мен "Сазген" ансамблімен шетелге ерте шықтым. 1986 жылдар болуы керек. Ағылшын тілін білмейміз. Шетелде су, нан сұрап жей алмаймыз. Қызым Тоғжан екінші сынып оқып жүрген кезде соңғы ақшамызды оның ағылшын тілін үйренуіне жұмсадық. Ол кезде күйеуім екеуміз пәтер жалдап тұратынбыз. Қызым үмітімізді ақтап үш тілде жетік сөйлейді. Қызымның өнер жолына қызығушылығы болған жоқ. Өзі таңдаған мамандықта білім алды. Бірнеше жыл өз саласында жұмыс істеді.

Немерелеріңіздің өнер адамы болғанына қалай қарайсыз?

Менің жекеменшік бір немерем бар. Қыздан туған немере жиен болады, бірақ мен жиен деп қарамаймын. Құдам екінші немерені шын көңілімен "мынау сіздің балаңыз" деп берді. Ол да менен басқа ешкімді мойындамайды (күледі). Ән айтады, би билейді. Биылдан бастап маманмен арнайы дайындыққа барып жүр. Төртеуі де өнерге бейім. 10 айлық немерем де ыңылдап жатады. Кезінде қызым Тоғжанды биге бердім, ол бір күннен кейін биге бармай–ақ қояйыншы деді. Мен ештеңе деген жоқпын. Баланы қинауға болмайды. Мен еркіндік беріп өсірдім, қызым одан жаман болған жоқ. Балалар да өз таңдауын уақыты келгенде жасайды. 

Әңгімеңізге көп рақмет! Шығармашылық табыс тілеймін! 

10089
Кілт сөздер:
"Сағындырған әндер-ай", өнер, сұхбат, әнші, Майра Ілиясова, Ринат Зайытов, Ескендір Хасанғалиев, Мақпал Жүнісова, Димаш Құдайберген
Тақырып бойынша
Халық әртісі Мақпал Жүнісова Димаш туралы не ойлайтынын айтты
Қырғыздың халық әртісі Димаш Құдайберген туралы не ойлайтынын айтты
Мұхамеджанов: Димаш қытайлардың қазақтар туралы пікірін өзгертті
Мейрамбек Беспаев туралы не білеміз?
Ернар Айдар туралы не білеміз?
Махаббаттың жасқа қарамайтынын дәлелдеген қазақстандық жұлдыздар
Қазақстандық жұлдыздар балаларына қандай ерекше есімдер қойып жүр?
Қазақстанда ажырасқан жұлдыздар кімдер?
Ермек Тұрсынов

"Бұлардың істеп жүргені - мазақ": Ермек Тұрсынов ашық сұхбат берді

4067
(Жаңартылды 23:20 07.08.2020)
Кинорежиссер бір жылдан бері қандай ұсынысы әлі де жүзеге асырылмағанын, кімнің фильмдері көңілінен шықпайтынын айтты

АЛМАТЫ, 7 тамыз – Sputnik. Қазақстандық кинорежиссер, сценарист, Қазақстан кинематографистер одағының төрағасы, ұлттық қоғамдық сенім кеңесінің мүшесі Ермек Тұрсынов ұлттық кеңестегі ұсынысынан кейін мәдениет министрімен қандай қарым-қатынаста екенін, сондай-ақ, қазіргі кино жайлы ойын Sputnik Қазақстан тілшісіне айтып берді.

Ұлттық кеңестегі ұсыныс

"Ұлттық қоғамдық кеңес құрылған кезде көбіне саясатқа байланысты мәселелер көтерілген болатын. Біраз нәтижелі жұмыс жүргізілді. Әсіресе, митингіге байланысты сұрақтардың жауабы шешілді. Бірнеше салмақты, маңызды шешім қабылданды деп айтуға болады. Ал мен мәдениетке байланысты мәселені көтердім", - дейді Тұрсынов.

Ермек Тұрсынов
© Photo : Ермек Тұрсыновтың жеке архивінен алынды
"Министрмен келіспей қалдық"

Ұлттық қоғамдық сенім кеңесінің 2019 жылы өткен отырысында Ермек Тұрсынов мәдениет және спорт министрлігін бөлуді ұсынды. Тұрсыновтың айтуынша, содан кейін мәдениет министрі Ақтоты Райымқұлова режиссерға қоңырау шалған.

"Ол кісіге менің ұсынысым ұнаған жоқ. Мәдениет пен спортты бөлуді ұнатпады. Сөзге келіп қалдық деп айтуға келмес, бірақ пікіріміз екі түрлі болды. Келіспей қалдық. Ал көпшілік менің айтқанымды өте жақсы қабылдады. Қазірге дейін сол отырыста айтқан сөзімді желіде жариялап отырады", - дейді режиссер.

Ермек Тұрсынов сол отырыстан бері бір жылға жуық уақыт өтсе де, ұсынысының еш нәтиже бермегенін айтып өтті. Алайда республика аумағын аралаған кезінде адамдар ілтипат танытып, режиссер пікірімен толық келісетінін жеткізетін көрінеді.

"Ұлттық кеңес мүшелері мәдениет пен спортты бөлу туралы ұсынысымды өте жақсы қабылдады. Мен қазір де солай ойлаймын. Бәрі мәдениеттен басталады", - дейді Тұрсынов. Ең өкініштісі – сол ұсыныс тек сөз болып қалды, деп толықтырды ол.

"Кино үйі" төңірегіндегі дау

Қазақстан кинематографистер одағының төрағасы одақ жұмыс істейтінін, алайда "Кино үйі" төңірегіндегі даудың екі жылдан бері шешімі табылмай жатқанын айтты.

"Кино үйі" мәселесі бір орыннан жылжымай тұр. Екі жылдан бері соттасып жатырмыз. Қара шаңырағымызды өзімізге қайтара алмай жүрміз. Сот жалғасып жатыр, қашан бітетіні тіпті белгісіз. Оны ешкім айта алмайды. Бармаған жерім жоқ. Қазір одақ мүшелері отырып жұмыс істейтін орын жоқ. Кейде "Қазақконцерт" ғимаратында, кейде мейрамханада кездесіп, жиналыс өткіземіз. Кейде "Қазақфильмнің" бірінші қабатындағы аядай бөлмеде жиналамыз", - дейді Тұрсынов.

Айтуынша, бұл мәселе кеше туындаған жоқ. Бір кездері одаққа басшылық еткен кісі "Кино үйінің" жартысын сатып жіберген. Одан кейін де басшылыққа келгендер қалған жарты бөлігін жалға беріп қойған. Содан бері сот процесі жүріп жатыр.

"Қазақфильм" басшылығы туралы

Ермек Тұрсыновтан бір салада жүрген әріптесі Ақан Сатаевтың "Қазақфильмге" басшы болып тағайындалғанына қатысты пікірін де сұрадық. Алайда режиссер бұл шешімнің артында жаман оқиға тұрғанын, алайда дәл қазір ашып айта алмайтынын жеткізді.

"Мұны дәл қазір ашып айта алмаймын. Себебі бұл мәселе қазір талқыланып жатыр. Қай жаққа шығаратынын айта алмаймын. Бірнеше аптада бұл мәселе шешіледі. Сатаевтың алдында "Қазақфильмді" Арман Әсенов басқарды. Оны бұл қызметте тоғыз ай қызмет істегеннен кейін орнынан алып тастау, меніңше, қате. Не болатынын көреміз", - дейді Тұрсынов.

Айтуынша, "Қазақфильмді" экономикадан хабары бар маман басқаруы керек.

"Қазақта "қисық аяққа қызыл кебіс не керек?" деген сөз бар. Режиссер – өнердің адамы, ал бұл қызметке есептің адамы, экономиканы білетін адам керек", - деді Ермек Тұрсынов.

"Істеп жүргені - мазақ"

"Тақиялы Періште", кешегі "Қыз Жібек" фильмдері ақша үшін жасалған жоқ. Бұл киноның авторлары ең алдымен елдің көңілін, елдің санасын ойлады. Ақша жағына келер болсақ, ол кейінгі заманның "модасына" айналып кеткен ұғым. Иә, ақшаға да мән беру керек, бірақ ақшадан басқа ешқандай мақсат болмаса, ол шедевр болмайды", - дейді Тұрсынов.

Премьера фильма Томирис
© Sputnik / Владислав Воднев
"Томирис" фильмінің премьерасы

"Ал арзанқол фильмнің миллиондап табыс табуы – көрерменнің надандығын көрсетеді, - деп жалғастырды Тұрсынов. - Қоянбаевтың түсіргенін кино деп айтуға болмайды, осыны адамдарға айтып түсіндіру керек. Баян Алакөзова да кітап жазды, бірақ ол әдебиет емес. Нұртас Адамбаев, Нұрлан Қоянбаев, Қайрат Нұртас пен Төреғалидің түсіріп жатқаны кино емес. Кино деп "Тақиялы періште", "Атамекен", "Қыз Жібекті" атауға болады. Ал бұлардың істеп жүргені – мазақ".

Сонымен қатар Тұрсынов "Томиристі" кино деп санамайтынын, бірақ оған әртістік құрамның еш кінәсі жоқ екенін айтты.

"Томирис" – кино емес. Бұған басқа алып-қосарым жоқ. Әртістердің еш жазығы жоқ, қойылған тапсырманы орындауға тырысты. Негізгі жауап беретін – режиссер", - деп түйіндеді сөзін Тұрсынов.

Режиссер Ермек Тұрсынов
© Photo : Ермек Тұрсыновтың жеке архивінен алынды
Ермек Тұрсынов режиссерлік мансабын "Келін" фильмінен бастаған. 2012 жылы режиссердің "Шал" фильмі шықты

Ермек Тұрсынов 1961 жылы Алматы облысында дүниеге келген. Режиссерлік мансабын "Келін" фильмінен бастаған. 2012 жылы режиссердің "Шал" фильмі шықты. Сонымен қатар Тұрсынов бірқатар фильмге сценарий жазған.

4067
Кілт сөздер:
Ермек Тұрсынов, режиссер
Тақырып бойынша
"Томиристің" қазақшасы қайда?": Ақан Сатаев халықтан кешірім сұрады
"Қыз Жібекті" үш жыл түсірдік": актер әрі режиссер Асанәлі Әшімов жайлы не білеміз
Тұрсынов Димаштың жетістігіне ортақтасатын шенеуніктерді сынап тастады
Режиссер Ақан Сатаев басшылық қызметке тағайындалды
Белгілі режиссер Ақан Сатаев тұңғышын ұзатты – фото 
Айдар Тұрғамбек

Айдар Тұрғамбек жағымды жаңалығын бөлісті

4708
(Жаңартылды 15:20 30.07.2020)
Әнші халыққа сапалы ән тыңдауға мүмкіндік беретін жаңалығымен бөлісті. Мұның арқасында өнер адамының да еңбегі бағаланады, дейді ол

АЛМАТЫ, 29 шілде – Sputnik, Айгерім Таубай. "Жігіттер" тобының әншісі Айдар Тұрғамбек қазақ әндері жүктелетін сайт туралы қуанышты хабарым Sputnik Қазақстан тілшісімен бөлісті. Карантин кезінде әншінің өзі де екі ән жазған.

"Карантин уақытында шығармашылықпен айналыстым. Енді бірнеше күннен кейін сайт та іске қосылады. 2002-2003 жылдары қазақ эстрадасында әндер кассета күйінде сатылатын, яғни өнер, шығармашылық бағаланатын. Қазір интернет арқылы әнді жазып алу тегін болып кетті", - дейді әнші.

Айтуынша, мұндай сайт ашуды ұзақ уақыттан бері ойланып жүрген. Себебі кей ән өзіне жұмсалған ақшаны ақтамайды.

"Той мен концерт өткізуге қашан рұқсат берілетіні белгісіз. Сол себепті біздің өнім сайт арқылы сатылуы керек. Соған сәйкес, қазақ эстрадасында сапалы әндер шығатын болады. Тойдың әндері, сапасыз әндер болмайды. Халық та сапалы ән тыңдайды, өнер адамының да еңбегі бағаланады", - дейді Тұрғамбек.

Әнші сұхбат барысында жас өнерпаздардың эстрадаға қандай мақсатпен келетіні жайлы айтып берді. Айтуынша, жас әншілердің үлкен қателігі – бір ән жазып танымал болуды ойлау.

"Қазір көп адам тойдың әнін жазып, тойға шығып қаржы табамын деп өнерге келеді. Ондай адамдар ұзаққа бармайды. Өнерге ақша үшін келуге болмайды. Біз өнерді университетте оқыдық, магистратураны да бітірдік. "Жігіттер" тобы құрылған кезде қаншама қиындық болды, түрлі байқауға қатыстық. Жетістікке жету үшін тер төгілді. Біз басында ақшаны ойлаған жоқпыз, ән айтқымыз келді", - деп еске алды әнші.

Айдар Тұрғамбек
© Photo : Айдар Тұрғамбектің жеке архивінен алынды
"Тойдың әндері, сапасыз әндер болмайды"

Ол өнер адамы халыққа қандай пайдалы ән сыйлаймын деп келу керек дейді. Алайда біздің қоғамда тойсыз да болмайтынын атап өтті. Тойда айтылатын ән де қажет, бірақ мақсат той болып кетпегені жақсы. Өнерге хобби ретінде қарау керек, негізгі табыс басқа жерден түсіп отырғаны жөн, дейді ол.

Әр адамның жеке қоры болуы керек

"Концерт пен тойдың ертерек басталғанын қалаймыз. Халықпен жүздескіміз келеді, концертке барып, өнер көрсеткіміз келеді. Алайда концерт пен тойдан бөлек қаржы түсіп тұратын жұмыстарым бар", - дейді әнші.

Ол әр отбасының табысы мен шығыны әртүрлі екенін де айтты. Кез келген жағдайға дайын болып, бір-екі жылға жететіндей қаржы қоры болғаны дұрыс, дейді ол.

"Карантин кезінде табысым әдеттегіден айтарлықтай азайды, бірақ білімге инвестиция құйып, қаржылық сауаттылық жағынан дамыдым. Қандай кәсіппен айналысу керек екені жайында көп оқыдым. Карантиннің арқасында отбасымның жанында көбірек уақыт өткізіп, балалардың қалай өсіп жатқанын көріп жатырмын", - дейді Тұрғамбек.

Әншінің арманы

Сұхбат барысында әнші той жасау мәселесі мен бағасына да тоқталды. Әнші өзін тойға шығатын танымал әншілердің ішінде ең арзан бағаны айтатын өнерпаз деп есептейді.

"Халық қай әншіні ұнатса, сол адамды тойына шақырады. Ұнамаса, қинап ешкім шақырта алмайды. Менің қойған бағам қымбат емес. Тойға шығып жүрген танымал әншілердің ішіндегі ең арзан баға десе де болады. Өйткені "Жігіттер" тобымен де тойға шығамын, жеке де өнер көрсетемін. Жеке шығатын бағам халыққа қолжетімді. Ол карантиннен бұрын да солай болды, карантиннен кейін де солай болып қала береді", – дейді Айдар Тұрғамбек.

Ал тойды әркім өз шама-шарқына қарап жасау қажет деген әнші өзінің де қыздарын ұзатып, той жасағысы келетінін жасырмады.

"Тойды шамасы келетін адам жасауы керек. Барлық ата-ана баласын үйлендіріп, қызын ұзатқысы келеді. Мен де қызымды қолымнан ұзатқым келеді. Сондықтан басқа адамға балаңды үйлендіргенде той жасауға болмайды деп қалай айтасың?", - дейді әнші.

Қазір бәсекелестік кезеңі, біреудің тойы үлкен мейрамханада өтті, менікі де солай өту керек деп ойлайды. Кредит алып, қарызға той жасаудың қажеті жоқ. Шамасы келетін деңгейде өткізу дұрыс деп санаймын, деп толықтырды Тұрғамбек.

4708
Кілт сөздер:
ән, той, әнші

Қақтығыс кезіндегі Минск қаласының видеосы жарияланды

0
Беларусь президенті сайлауынан кейін учаскелер жабылған соң дауыс беру нәтижесіне көңілі толмағандар санкцияланбаған наразылық акциясына шықты

Орталық сайлау комиссиясының соңғы мәліметіне сәйкес, Беларусь елінің қазіргі президенті 
Александр Лукашенконы сайлаушылардың 80 проценті қолдаған. Оның қарсыласы -  Светлана Тихановская 10 проценттен аз дауыс жинады. 

Санкцияланбаған наразылық акциясына қатысушылар үкіметке қарсы ұрандарды айтып, көшелерде жүрді. Алайда бұл ұзаққа созылмады. Күш құрылымдары тұрғындардың акциясын  тоқтатты. Олар жарық-дыбыстық граната мен көзден жас шығаратын газ қолданды.

Қақтығыс кезінде Минск қаласында болған жағдай бір видеода көрсетілді.

0