Осы аптадағы айшықты фотосуреттер

Жергілікті метеорологтар кеңес бергендей, өңірлердегі аптап ыстық кезінде күн көзінен сақтанып, көбірек су ішу керек.

Осы аптадағы тура мағынадағы жалынды сәттердің бірі "Шымкент мұнай өнімдері" АҚ мұнай базасының өртенуі болды. Өртті сөндіруге 28 техника мен 120 адам, сондай-ақ нысандық өрт сөндіру бөлімшесінің жеке құрамынан 16 адам мен алты су тасығыш көлік жұмылдырылған.

Күн ыстықта шаршаған жұмысшы тал көлеңкесінде демалып жатыр. Оңтүстік астанамызда қала орталығында жөндеу жүргізіліп, трамвай жолдары алынып тасталмақшы.

ЭКСПО көрмесін тамашалап, қатысу үшін ең ыстық құрлықтан келген қонақтарымыз. Көңілдері көтеріңкі, ән салып жүр.

Мұндай экзотикаға біздің қазақтар да үйір. Жапырақтар мен қамыстан киім киген папуастарды шын өмірде кім көрген? Бәрі суретке түсіріп әлек.

Халықаралық "жасыл" көрменің павильондары келушілерді таңғалдырудан жалықпайды. Қытайдың неон павильонына кірсеңіз, ғарыш кемесіне тап болғандай әсерде қаласыз.

ЭКСПО-ның тағы бір кереметі. Қазақстанның ұлттық павильоны "Нұр Әлем" сферасында әйнек көпір орналасқан.

Мына кісілер – Алматыда өткен "Ұлы дала рухы" халықаралық фестивалінің қонақтары. Аталар заманауи байланыс құралдарын пайдаланып, қойылым үстінде телефонмен тілдесіп отыр.

Ақ шаңқан үйлер, алтыбақандар, биік таулар мен жалындаған жастар. "Ұлы дала рухы" әдеттегідей жоғары деңгейде өтті.

Елбасы мен Монако князьі Альбер ІІ заманауи велосипедтерге мініп, ЭКСПО-2017 аумағын аралап шықты.

Әлемдегі бай мемлекеттердің бірі Катардан келген қонақ.

Осы аптада "Астана Аренада" өткен Димаш Құдайбергеннің алғашқы концерті жанкүйерлерге ерекше көңіл күй сыйлады.

Осы аптада тілшілеріміз тағы бір қызық суретті түсіріп алыпты: атышулы Мақсат Үсенов өз туған күнінде қамаудан шығып келеді.

Үндістанның павильонын айрықша дәмдеуіштердің иісінен бірден білуге болады.

Соңғы сурет ЭКСПО-2017 аясында өткен Сербия Ұлттық күнінде түсірілген. Бойжеткен қанық қызғылт түсті виолончелмен сахна төрінде музыка ойнап, әсем сазға жан дүниесімен беріліп кетіпті.