Нығматулин

"Сілкілеп алыңдар": Нығматулин үкіметке шүйлікті

575
Антитеррористік орталықтың мәліметіне сүйенсек, қазір елімізде 3,5 мың білім және мәдениет нысаны террористік тұрғыдан осал болып шықты

НҰР-СҰЛТАН, 11 желтоқсан – Sputnik. Мәжіліс төрағасы Нұрлан Нығматулин әлеуметтік нысандарды терроризмге қарсы қорғау жұмысын ұйымдастыра алмай отырған үкіметке шүйлікті, деп хабарлайды Sputnik Қазақстан тілшісі. 

Бүгін мәжілістің жалпы отырысында кейбір заңнамалық актілерге қылмыстық жолмен алынған кірістерді заңдастыруға және терроризмді қаржыландыруға қарсы іс-қимыл мәселелері бойынша өзгерістер енгізу туралы заң жобасы қаралды. Отырыс барысында мәжіліс спикері Нұрлан Нығматулин террористік тұрғыдан осал нысандардың жай-күйін қозғады.

Осы тұста ол ұлттық қауіпсіздік комитетіне қарасты антитеррористік орталықтың деректерін келтірді. Оған сәйкес, елімізде 10 мың нысанның 35 проценті, яғни 3,5 мың объектісі терроризмге қарсы қорғалмаған. Олар мәдениет пен білім беру ұйымдары.

"Оған ақшаның жетпеуі себеп екен. Тағы бір мәрте қайталап айтамын, бұл антитеррористік орталықтың деректері", - деді спикер.

Нығматулиннің бұл уәжіне орталық штабы бастығының орынбасары Герман Диденко жауап берді. Айтуынша, қазір республикада 17 мыңға жуық нысан бар және олардың меншік формасы әртүрлі. Олардың арасында орталық аппараттың да, жергілікті деңгейде және жекеменшік иеліктегі террористік тұрғыдан осал объектілері бар.

Тағы оқыңыз: "Неге күлесіз?!": Нығматулин министр Атамқұловқа ескерту жасады 

"Сіз сөз етіп отырған нысандарға қаржы бөлуді бақылау, оның жұмсалуын қадағалау мәселесіне тоқталсақ. Әкімдіктердің жанында антитеррористік комиссия жұмыс істейді, оны облыс әкімі басқарады. Олар тоқсан сайын отырысқа жиналып, осы мәселелерді қарастырады. Ұсыныстар әзірленіп, ішкі істер министрлігі тарапынан кешенді тексеріс жүргізіледі. Жыл сайын әр нысан тексеріліп, ұсыныстар дайындалып, комиссия отырысына шығарылады. Ал содан кейін қаржыландыру мәселесі көтеріледі", - деп түсіндірді ол.

Диденко ақша әркімге бірдей бөлінбейтінін айтты.

"Герман Владимирович, біз де осыны айтып отырмыз. Бізде дәл осындай республикалық комиссия бар. Сіздер отырыс өткізген кезде, бұл мәліметтерді үкіметке бересіздер. Әлихан Асханұлы, дәл осы мәселеге сіз қаржы министрі ретінде емес, бірінші вице-премьер ретінде араласуыңыз керек. Әкімдіктер үкіметтен бөлек емес қой, әсіресе қаржыландыру мәселесінде. Әріптестермен жиналып, оларға мектептердің терроризмге қарсы қорғалмағанын айту керек. Ал нысандардың кімге тиесілі екені бұл екінші орындағы мәселе. Ертең ол ғимарат опырылып құлағанда, бізге оның кімнің меншігінде болғаны бәрібір болады", - деп ашуланды Нығматулин.

Тағы оқыңыз: Нығматулин депутаттармен санаспаған үкіметке шүйлікті

Мәжіліс спикері үкіметке бір тоқтамға келуге кеңес берді.

"Ақша бар. Егер де жергілікті немесе орталық мемлекеттік органның қандай да бір басшысы жауапкершілікті сезінбесе, онда үкімет оны шақырып, бір "сілкілеп" алсын. Мектептегі балалардың, халық көп жиналатын орындарда азаматтардың қауіпсіздігін қамтамасыз ету – біздің міндетіміз. Билік дегеніміз сіз бен біз. Бұл не деген бейқамдық?", - деді төменгі палата төрағасы.

Нығматулин бірінші вице-премьер Әлихан Смайыловқа үкіметке террористік тұрғыдан осал әлеуметтік нысандардың мәселесін назарда ұстауды тапсырды.

"Ұсыныстар бар, олар халықаралық талаптарға сай келеді. Қаржыландыру жағынан біз сіздерді қолдаймыз. Бірақ үкімет тарапынан бұл жұмысты ұйымдастыру жағы ақсап тұр. Білім мен мәдениеттің 3,5 мың нысаны талапқа сай емес деген мәселе күн тәртібінде тұрмауы тиіс. Мұндай нысандар мүлде болмауы керек", - деп қадап айтты мәжіліс спикері.

Смайылов мектептерде ең бастысы бейнекамера орнату қажет екенін атап өтті. Бұдан бөлек, тиісті офицер отыруы керек.

"Қазір үкімет терроризмге және діни экстремизмге қарсы жұмыстардың маңыздылығын ескере отырып, бес жылға тиісті бағдарлама қабылдады. Бағдарламаны қаржыландыру жағы да шешілді. Оның аясында терроризмге қарсы іс қимылды іске асыру қарастырылған. Биыл сол бағдарламаны жүзеге асыру үшін 58 миллиард теңге бөліп отырмыз. Келесі жылы 26 миллиард теңге, әрі қарай жыл сайын 36 миллиард теңге бөлеміз", - деді қаржы министрі мәжіліс кулуарында.

Бұдан бөлек, оның айтуынша, жергілікті атқарушы органдар өз бюджетінен жергілікті нысандарға терроризмге қарсы күрес үшін қосымша қаражат бөлуі керек.

575
Кілт сөздер:
Үкімет, Мәжіліс, Нұрлан Нығматулин
Тақырып бойынша
Назарбаевтың тапсырмасын уақытында орындамағандар Нығматулиннен сөз естіді
"Аллаху әкбар, ақша жоқ!": Нығматулин бәрі керемет деген министрді сөзден ұстады
"Бақылаудың қажеті қанша?": Нығматулин еңбек министрінің сөзін бөліп жіберді
Ұстаздардың жалақысын көтеруге 1,7 триллион теңге қарастырылды – министр
"Ұятқа қаламыз": министрдің сөзіне күмән келтірген депутат ашынып кетті
Ақорда, президенттің резиденциясы

Тоқаев Түркия президентін Қазақстанға шақырды

216
Ердоған коронавирустың таралуын болдырмау, азаматтарға ауқымды көмек көрсету жөніндегі Қазақстанның іс-қимылдарына жоғары баға берді

НҰР-СҰЛТАН, 25 мамыр – Sputnik. Мемлекет басшысы Қасым-Жомарт Тоқаев Түркия президенті Режеп Тайип Ердоғанмен телефон арқылы сөйлесті, деп хабарлайды Ақорда.

Мемлекеттер басшылары бірін-бірі барша мұсылманның қасиетті Ораза айт мерекесімен құттықтап, бауырлас қазақ-түрік халықтарына бақ-береке тіледі.

Әңгімелесу барысында тараптар COVID-19 індетіне қарсы күресте екі ел үкіметтерінің қабылдаған нақты шараларын талқылады. Режеп Тайип Ердоған коронавирустың таралуын болдырмау, азаматтарға ауқымды көмек көрсету, сондай-ақ, шағын және орта бизнесті қолдау жөніндегі Қазақстанның іс-қимылдарына жоғары баға берді.

Тоқаев Ердоғанға қолдау көрсеткені және гуманитарлық көмек ретінде медициналық жеке қорғаныш құралдарын бергені үшін ризашылық білдірді. Мемлекеттер басшылары аталған саладағы тығыз ынтымақтастықты жалғастыра беруге ниетті екенін нақтылады.

Тағы оқыңыз: Қазақстан мен Түркия арасындағы әуе қатынасы маусымда жандануы мүмкін

Сонымен қатар тараптар өзара тауар айналымын ұлғайтудың және бірлескен инвестициялық жобаларды жүзеге асырудың маңыздылығына тоқталып, қазақ-түрік қатынастарының қазіргі ахуалы мен даму перспективаларын талқылады.

Әңгіме соңында Тоқаев Түркия президентін Қазақстанға сапармен келуге шақырды.

216
Кілт сөздер:
Режеп Тайип Ердоған, Қасым-Жомарт Тоқаев
Компьютер, адамның қолы

Саяси партияларды тіркеу жеңілдеді: Қазақстанда жаңа заң қабылданды

75
(Жаңартылды 17:03 25.05.2020)
Саяси партияларды тіркеу үшін оның құрамында бұрынғыдай қырық мың емес, жиырма мың мүшесі болса жеткілікті

НҰР-СҰЛТАН, 25 мамыр – Sputnik. Қазақстан президенті Қасым-Жомарт Тоқаев "Сайлау туралы" Конституциялық заңға және "Саяси партиялар туралы" заңға өзгерістер енгізу туралы заңдарға қол қойды, деп хабарлайды Sputnik Қазақстан Ақордаға сілтеме жасап.

Енді Қазақстан парламентінде әйелдер мен жастар қатары артады.

"Сайлау туралы" конституциялық заңда саяси партиялар тіркеуге ұсынған партиялық тізімдерде әйелдер мен жастар үшін кемінде 30% квота енгізілді.

Бұл жастар мен әйелдердің парламентке және жергілікті өкілетті органдарға келуіне ықпал етеді деп күтілуде.

Ал "Саяси партиялар" туралы заңда саяси партияларды тіркеу жеңілдетілді.

Енді саяси партияны тіркеу үшін оның құрамында 40 мың емес, 20 мың мүшесі болса жеткілікті.

Тағы оқыңыз: Қазақстанда жеті бірдей саяси партия тіркеуден өте алмады

Жаңа нормалар әйелдер мен жастарды қоғамның саяси өміріне белсене қатысуға, сондай-ақ көппартиялық жүйені одан әрі қалыптастыруға оң ықпал тигізбек.

Қос заң да президент Қасым-Жомарт Тоқаевтың ұлттық қоғамдық сенім кеңесінің екінші отырысында берген тапсырмаларын іске асыру мақсатында әзірленген болатын.

75
Кілт сөздер:
сайлау, партия, заң, Қасым-Жомарт Тоқаев
Тұрғындар, жаз

Аптап ыстық болады - бейсенбіге арналған ауа райы болжамы

95
(Жаңартылды 23:33 27.05.2020)
Синоптиктер бейсенбі, 28 мамыр күні Қазақстанның алты өңірінде аптап ыстық болып, жел күшейетінін хабарлады

НҰР-СҰЛТАН, 27 мамыр - Sputnik. Қазгидромет синоптиктері бейсенбі күні ауа райы қандай болатынын айтты.

Елдің басым бөлігінде жауын-шашын болмайды. Солтүстік, солтүстік-батыста циклон әсерінен дауыл болып, жауын, бұршақ жаууы мүмкін.

Кей жерлерде жел күшейіп, оңтүстік, оңтүстік-шығыста - шаңды дауыл, солтүстікте - тұман.

Дабылды ескерту

28 мамырда Қызылорда облысында аптап ыстық болады, плюс 41 градус, желдің жылдамдығы - 15-20 м/с, шаңды дауыл.

Алдағы екі күнде Солтүстік Қазақстан облысында тұман болып, күн күркірейді. 29 мамырда күндіз бұршақ жауады, желдің жылдамдығы - 15-20 м/с.

Түркістан облысында шаңды дауыл болады, желдің жылдамдығы - 15-20 м/с. Күндіз сынап бағанасы 40 градусқа дейін көтеріледі.

Өңірлердегі ауа райы

Шығыс Қазақстан, Қарағанды, Қостанай облысында желдің жылдамдығы секундына 15-20 метрге дейін жетеді.

Түркістан, Қызылорда, Ақтөбе облысының оңтүстігінде, Атырау, Батыс Қазақстан, Маңғыстау облысында аптап ыстық болады.

Павлодар, Шығыс Қазақстан, Қызылорда облысында өрт қаупі жоғары болады. 

Ірі қалалардағы ауа райы

Елордада түнде плюс 8-10 градус, күндіз 24-26 градус жылы.

Алматыда түнде 17-19 градус жылы, күндіз сынап бағанасы 28-30 градусқа дейін көтеріледі.

Шымкентте түнде плюс 20-22 градус, күндіз 35-37 градус ыстық.

95
Кілт сөздер:
синоптиктер, ауа райы, мамыр