АСТАНА, 20 ақпан — Sputnik. Ақмола облысында президент шыршасының сыйлығына қатысты тағы бір шу шықты. Сыйға берілген ноутбуктердің бірі дұрыс істемейді екен.
Видео үндеуді Facebook желісінде Атбасар ауданы Самарка ауылының тұрғыны жариялаған. Оның айтуынша, 2017 жылдың желтоқсанында қызы Бурабайдағы президент шыршасына шақырту алыпты. Бірақ сыйлықтың орнына ноутбук алуға сертификат берген екен, алайда жаңалықтарда балалардың бәріне компьютер таратылғаны айтылған болатын.
Сыйлыққа екі айдан кейін қолы тиіпті. Ауыл тұрғынының айтуынша, өкінішке орай, компьютер дұрыс істемейтін болып шыққан – аккумулятор қуатталмайды, тек тоққа қосқанда ғана істейді екен.
Атбасар білім беру бөлімі бұл деректі растады.
"Жаңа жыл сыйлығы ретінде берілген ноутбуктер облыс орталығынан жеткізілген. Кейін қызға басқа ноутбук берілді", — деп мәлімет берді білім беру бөлімінің өкілі Sputnik Қазақстан агенттігі.
