АСТАНА, 3 ақп – Sputnik. Қыстыгүні жалаңаш күйінде көшеде суретке түскен Астана тұрғыны әкімшілік жауапкершілікке тартылды деп хабарлайды Астана ІІД баспасөз қызметі.
Бұл айрықша фотосессияның суреттері WhatsApp және әлеуметтік желілер арқылы таратылған. Суреттерде жас қыз қара түсті жол талғамайтын көліктің қасында жалаңаш күйінде бой түзеп тұр.
Бүгін Астана ІІД баспасөз қызметі хабарлағандай, жергілікті полиция қызметі қыздың кім екенін анықтаған, бұл оқиға 31 қаңтар күні сағат сегіз жарым кезінде Ш. Қалдыаяқов көшесінде орналасқан үй маңындағы көлік тұрағында болыпты.
Ол қыз 20 жасар қала тұрғыны болып шықты, қазір ҚР ӘҚБК 434 бабы бойынша әкімшілік жауапкершілікке тартылған. Істің деректері Астана қаласы мамандандырылған ауданаралық әкімшілік сотына жіберілді.
