АСТАНА, 17 қараша — Sputnik. Осы жылы Бас прокуратураға қарасты департамент 191 тексеріс шарасын жүргізді. Нәтижесінде 12 прокурор жұмыстан шығарылды, деп хабарлайды ведомствоның баспасөз қызметі
Биыл маусым айында Бас прокуратураның Ішкі қауіпсіздік басқармасы Ішкі тергеп-тексеру департаменті болып қайта құрылған. Штат құрамындағы қызметкерлердің саны екі есеге, 6-дан 13-ке ұлғайды. Құрылымдық бөлімшеге тергеу саласында мол еңбек тәжирибесі бар қызметкерлер алынды. Департаментте қылмыстық істерді тергеумен айналысатын арнайы прокурорлар тобы құрылды.
Жоғарыда аталған шаралар негізінде ішкі қауіпсіздік саласы ұйымдастырушылық және кадрлық жағынан біршама нығайды.
40 қызметкер Ар-намыс кодексінің талаптарын бұзғаны үшін жауапқа тартылды.
«Бұған қоса, осы жылдың өзінде 10 қызметкерге қатысты қылмыстық іс тіркелді, оның 7-і – басшылық лауазымдағы тұлғалар. Қазіргі таңда 2-уі сотталды, 3 іс соттың қарауында, ал қалған 5-уін арнайы прокурорлар тергеуде. Өткен бес жылдың барлығын қоса алғанда, прокурорларға қатысты небәрі 7 қылмыстық іс қозғалған», — делінген хабарламада.
Прокуратура жұмысы мазмұнының түбегейлі өзгеруі мен қызметкерлерге қойылатын талаптардың күшеюіне байланысты көптеген қызметкер өз еркімен жұмыстан кеткен.
«Өз қатарымызды тазалау – прокуратура қызметінің жаңа үлгісінің бағыты. Оның басты мақсаты – әділ, тиімді әрі айқын прокуратура құру», — деп мәлімдеді баспасөз қызметі.
