АСТАНА, 17 қаңтар — Sputnik. №2 Жетісу аудандық сотында Алматы-Қапшағай тас жолында қаза тапқан полицейдің ісіне қатысты үкім шығарылды, деп хабарлайды Sputnik Қазақстан тілшісі.
Алматы ішкі істер департаменті жедел әрекет ету жасағының аға инспекторы, полиция капитаны Жандос Нұрғазиев Алматы-Қапшағай жолының үшінші километрінде орналасқан полиция стационарлық постында қызметте болған. Кешкі бес кезінде "МАЗ-642208" көлігі оны қағып кетіп, полицей алған жарақатынан оқиға орнында көз жұмады.
Сот үкімі бойынша, сотталушы Рахымжан Есенбаев екі жарым жылға бас бостандығынан айырылып, көлік жүргізуіне 5 жылға тыйым салынды.
Бұдан бөлек, материалдық шығын ретінде 3,1 миллион теңге, адвокат қызметі үшін 340 мың теңге және моральдық шығын ретінде марқұмның отбасына 3 миллион теңге төлеуге міндеттелді.
