АСТАНА, 21 шілде — Sputnik. Алматыда Балуан Шолақ атындағы спорт кешенінде қазақстандық мәнерлеп сырғанаушы Денис Тенмен қоштасу рәсімі өтті, деп хабарлайды Sputnik Қазақстан тілшісі.
Спортшыны ақтық сапарға шығарып салуға мәдениет және спорт министрі Арыстанбек Мұхамедиұлы, Алматы қаласы әкімдігі мен Нұр Отан партиясының өкілдері, Ұлттық Олимпиада комитетінің мүшелері, спортшылармен қатар мыңға жуық тұрғын жиналды.
"Бүгін талантты балаларды тәрбиелеп, өсірген ата-ана өзінің сүйікті ұлын жоғалтып отыр. Ал біз жан–жағындағыларға мейіріммен қарайтын жарқын достан айырылып отырмыз. Талантты спортшы өзінің 25 жасында спорт саласындағы жеңістерімен қатар, ұйымдастырушлық қабілетімен де есімізде қалды. Денис Тен әлемді мейірімділікке толтырып, шуақты еткісі келетін жеке тұлға еді", – деді министр Арыстанбек Мұхамедиұлы.
Министр өз сөзінде Денис Тенді соңғы сапарға шығарып салуға Геннадий Головкиннің келгенін де айтып өтті.
Сөз соңында Мұхамедиұлы Денис Теннің ата–анасына ҚР президенті Нұрсұлтан Назарбаевтың көңіл айту хатын оқып берді.
Сонымен қатар Халықаралық олимпиада комитетінің директоры Томас Бах пен Ұлттық Олимпиада комитеті жолдаған телергамм Денис Теннің туыстарына табысталды.
"Денис Тен қазақтың кім екенін дүние жүзіне танытты. Сочида өткен қысқы олимпиадада өзім куәгер болып, жанынан табылдым. Бүгін Денисті соңғы сапарға шығарып салуға мыңдаған адам жиналып отыр. Барлығымыз жүрегімізге пышақ салғандай сезімде тұрмыз. Денистің есімі жүрегімізден ешқашан өшпейді. Дениске еліктеп, Қазақстанды танытамын дейтін жасарымыз көп болсын", – деді Жақсылық Үшкемпіров.
Қазақстан спортшыларның атынан Серік Сәпиев Денис Тенің ата–анасы мен бауырына, туған–туыс, жақындарына көңіл айтты.
"Денистей азаматтан айырылғанымызға қабырғамыз қайысып отыр. Теледидардан көргенде қуанып отырушы едік. Сүйкімді әрі сыпайы, көздері күлімдеп тұратын жап–жас жігіт қала орталығында кісі қолынан қайтыс болды. Жүрегі елім деп соққан аяулы ұлымыз әрдайым жүрегімізде", – деді Фатима Зубаирова есімді қала тұрғыны.
Таңғы 9-да басталған спортшымен қоштасу шарасы 11.30-да аяқталды.
Жиналған мыңға жуық қала тұрғын мен қала қонақтары Денис Теннің орындауындағы She won’t be mine әнімен орындарын тұрып спортшыны ақтық сапарға шығарып салды.
Қайғылы оқиға Алматының орталығында 19 шілдеде болды. Спортшы Денис Тен тұрақта тұрған автокөлігіне келе жатып, көліктің айнасын ұрламақ болған қаскөйлерді көреді. Ұрылардың соңынан қуып, тоқтатпақ болғанда, пышақ жарақатын алған.
Көп қан жоғалтқан спортшы ауруханаға түскеннен кейін екі сағаттан соң көз жұмды.
