АСТАНА, 7 ақпан — Sputnik. Әлемде алғашқы рет науқастың жүрегіне сымсыз қанайналым құрылғысы орнатылды. Ота Астанада өтті. Бұл туралы операцияға жетекшілік еткен елдің бас кардиохирургы Юрий Пя мәлімдеді.
Ота 15 желтоқсан күні Астанадағы "Ұлттық ғылыми кардиохирургия орталығында" өткен. Оған 20-ға жуық маман қатысты, деп хабарлады "Астана" арнасы.
"Мен оны ғарышкерге теңейтін едім. Себебі, оған әлем бойынша алғаш рет инновациялық құрылғыны орнату операциясы жасалды. Науқас өз бөлмесінен шыға алмайтын, қатты демікпесі болды. Қазір барлығы жақсы. Жаңа аппараттың батареясы оның кеуде тұсында орнатылған. Арнайы белбеу арқылы сымсыз зарядталады. Ал, қолындағы арнайы қолсағат арқылы ол өзінің денсаулығы жайлы керекті ақпаратты алып отырады", - дейді Юрий Пя.
Астаналық дәрігерлер босанып жатқан әйелдің жүрек клапанын ауыстырды
Ал, 24 жастағы Исмаил Тұрсынов қалыпты өмірге қайта оралғанына қуанышты. Бірінші болып осындай ота жасату қорқынышты болғанымен, өмірге деген құштарлығы одан жоғары болғанын айтады.
"Ауырмай тұрып 94 келі болған едім. Қазір 67 келімін. Операцияға дейін көп жүріп-тұра алмайтынмын. Қазір еркін қозғаламын, бассейінге де түсем. Импланттың бар жоғы білінбейді. Ауруханаға да күнде келе бермеймін. Аптасына бір-екі рет қана қан тапсыруға келіп тұрамын", - дейді Исмаил Тұрсынов.
