Лениннің ескерткіші

Мәжіліс депутаты Лениннің ескерткіштері сақталуы қажет екенін айтты

727
(Жаңартылды 13:45 13.02.2019)
Депутат заң жобасында тек көне тарихи мәдени ескерткіштер ғана емес, кеңестік замандағы ескерткіштерді сақтау тетіктері болуы тиіс екенін айтты

АСТАНА, 13 ақпан – Sputnik. Мәжіліс депутаты Владислав Косарев Лениннің ескерткіштерінің сақталуына алаңдады, деп хабарлайды Sputnik Қазақстан тілшісі.

Бүгін мәжілісте "Тарихи-мәдени мұра объектілерін қорғау және пайдалану туралы" заң жобасы бірінші оқылымда қаралды.

Сұрақ-жауап барысында мәжілістегі "Халық коммунистері" фракциясының мүшесі Владислав Косарев мәдениет және спорт министрі Арыстанбек Мұхамедиұлына кеңестік дәуірден қалған ескерткіштерді сақтауға қатысты сауал жолдады. Депутат заң жобасында тек көне тарихи мәдени ескерткіштер ғана емес, кеңестік замандағы ескерткіштерді сақтау тетіктері болуы тиіс екенін атап өтті.

"Бізде кеңестік уақыттағы ескерткіштерді сақтау үшін қандай моралдық жауапкершілік қарастырылған? Лениннің ескерткіші қоқыста жатқан қалада өмір сүруге болмайды ғой. Ал бізде қоғам мәдениетіне жауапты Мәдениет министрлігі бар", - деп ашуланды депутат.

Арыстанбек Мұхамедиұлы Косаревке "бірегей сұрақ" үшін рақмет айтты.

"Дұрыс айтасыз. Кезінде мынадай ұран болған: Ленин өмір сүрді, өмір сүріп жатыр және өмір сүре береді", - деп әзілдеді министр.

Мұхамедиұлы кеңес тарихының ескерткіштерін сақтау бойынша жұмыс жүріп жатқанына сендірді. Осы орайда ол мәжіліс депутатын Ленин ескерткіші орналасқан Алматыдағы Сарыарқа саябағына шақырды.

"Сіз сол саябаққа барып, гүл шоқтарын қоя аласыз. Әрине, 22 сәуір күні біз бәріміз сол жерде болуымыз керек (Лениннің туған күні – Sputnik Қазақстан)", - деп түйіндеді сөзін Мұхамедиұлы.

727
Кілт сөздер:
ескерткіш, Арыстанбек Мұхамедиұлы, Владислав Косарев
Тақырып бойынша
Депутат Үкімет басшысынан Мәлік Ғабдуллинге Астанада ескерткіш орнатуды сұрады
Ақтөбелік азамат 32 млн теңгеге Есет батырға ескерткіш орнатты
Мәскеуде Жамбыл Жабаевтың ескерткіші қалпына келтірілді
Загрузка...