Хиджаб киген әйел

"Құл секілді ұстады" Төрт күйеуінен де талақ естіген шымкенттік әйелдің жанайқайы

4140
(Жаңартылды 18:22 15.04.2019)
Ақботаны күштеп ұстаған бесінші күйеуі қасындағы жігіттермен қоса ұсталып, сотталды

АЛМАТЫ, 15 сәуір – Sputnik. Қаласа қосылып, қаламаса талақ айтып кете баратын деструктивті діни ағымдардың ықпалындағы жігіттердің құрбаны, бес рет күйеуге тиген Ақбота "Пендеміз ғой" бағдарламасына қатысып, басынан өткенін баяндады.

Оның айтуынша, соңғы рет ол күштеп тұрмысқа шыққан, бесінші күйеуі оны ұрып-соғып, қараңғы жерде ешкімге көрсетпей ұстаған. Ақбота одан үш бала туған, ал алдындағы төрт күйеуінен үш бала сүйіпті.

Ақбота алғаш рет оқып жүрген оқуын тастап, 17 жасында тұрмысқа шығады. Алайда, арада бала болмаған соң, ерлі-зайыпты ажырасып тынған. Бір жылдан кейінгі келесі некесі де көпке созылмапты. Бірақ, екінші күйеуінен бір қызы бар екен. Екі сәтсіз некеден соң, Ақбота дін жолына түсуді ойлап, осы бағыттағы жігітке күйеуге тиюді арман етеді. Ол арманы орындалып, әлеуметтік желі арқылы діндар жігітпен танысып, оған тұрмысқа да шығады. Алайда діни шектеу Ақботаның жеке кеңістігін тарылтып, әбден берекесін қашырған.

"Жеті шелпек пісірме, теледидар көрме деді"

"Күйеуге тиген соң уақыт өте келе ол кісі қатты өзгерді. Діни жағынан. Балағы қысқарды, сақалын өсірді. Маған толықтай жабық киін деді. Жеті шелпек пісірме, теледидар көрме деді, ақыры ішіп-жеген тамағымызға дейін тексеріп-зерттейтін болды.

Тағы оқыңыз: "Құдай халықтың ақшасына зәру". Қарағандылық қыз өзін арбамақ болғандар туралы айтты

Мен кейбір шартына қарсы шықтым. Сондай бір кезде қатты ұрсысып, жағымнан тартып жіберді. Жерге ұшып түстім. Сол кезде ол кісі: "Сен маған лайық жар емессің, талақ" деп үш рет айтты да кетіп қалды", - дейді Ақбота.

Үшінші жұбайынан бала болмапты.

Төртінші рет Ақбота отынын түсіріп берген діндар жігітке тұрмысқа шыққан. Ол кісіден екі бала туған. Екі баладан соң, ол да қатты өзгеріп кетіпті. Тағы да шектеулерге ұрынған. Арада кикілжің көбейе берген соң, әйел үш баланы Шымкенттегі әке-шешесіне апарып тастайды. Ал үйіне қайта оралғанда ұрыс қайта басталған.

Үлкен кісіге сыйлап жіберді

"Біз ұрсысып жатқанымызда, он шақты еркек топырлап үстімізге кіріп келді. Барлығының балағы келте. Арасында жасы да, үлкені де бар. Солардың көзінше үш рет "талақ" деп айтты. Содан "Мен сенімен ажырастым, бәрі бітті, енді мына кісіге сені сыйлаймын" деп біреуді сұқ саусағымен көрсетті. Ол шашы ағарған үлкен кісі екен", - дейді келіншек.

Әрине, Ақбота күйеуінің бұл әрекетіне қарсылық танытқан. Бірақ, әлгі жиналған қауым келіншекті қаумалап, жан-жақтан ақыл айтқан болады. Тіпті "Өз бетіңмен кетсең, балаң да харам, өзің де харам боласың. Бәрібір тауып алып, жазаңды береміз" деп қорқытып-үркітіп те көреді. Ақыры көнбеген соң, күшке салып, сол арадан Ақботаны "сыйлады" деген адам алып кетеді.

"Ол кісі мені құл секілді ұстады. Тамақ дайын болмаған кезде, тепкіледі. Оның үстіне сөзбен де тұқырды. Одан қатты қорықтым. Екі-үш адам үйде. Мені көздерінен таса қылмады. Сондықтан полицияға шағымданбадым. Менің қателігім сол болды. Төрт жыл бірге тұрдым. Одан үш бала тудым", - дейді алты баланың анасы қорқынышты күндерін еске алып.

Қазір бұл адам сыбайластарымен сотталған, түрмеде отыр екен. "Ол түрмеден босаған соң, менің күнім не болады" деген қорқынышпен өмір сүріп жатқан келіншек бағдарламаға көмек сұрап келіпті.

"Маған телефон ұстатпайтын. Бір күні сыртқа шыққанда, телефоны үстел үстінде қалып кетіпті. Соны пайдаланып, шешеме хабарластым. Құтқарыңдар деп айтып үлгердім. Барлық байланысты қосып, әке-шешем мені сол қапастан алып шықты. Ал ана еркектердің барлығы сыбайлас ретінде ұсталып, сотталды. Қазір қорқып жүрмін. Түрмеден босап, мені өлтіріп кетпей ме деп", - дейді Ақбота.

"Еркектер еліріп, әйеліне мінез көрсетеді"

Бағдарлама барысында дінтанушы Кеңшілік Тышқан ер адамның әйелдерге қатысты тыйымдарды қай жерден үйреніп келетінін айтты.

Тағы оқыңыз: "Жеңімнен жұлқылады": белгісіз ұшатын нысанды көрген алматылық жігіттің әңгімесі 

"Кез келген дін өкілінің қауымы, жамағаты болады. Олар бас қосып, ұстаздарын тыңдайды, өздерінің білмегендерін сұрайды. Осындай жиында, мәселен, діндегі әйелдің рөлі талқыланады. Әр діни бағыттың өз идеологиясы бар. Мәселен, бір жерде айтады: "Шариғат бойынша әйелдің құқығы жоқ. Оны қазірден қатты ұста, керек болса үстіне әйел ал" дейді. Осыны естіп алған еркек еліріп, үйінде әйеліне мінез көрсетеді", - дейді ол.

Ал Ақботаның өміріндегі ер адамдарды дінтанушы шариғаттың нормаларын өзіне бейімдеп алған ақылы тайыз міскіндер деп бағалады.

"Шариғатта отбасын бүлдіру, баланы жетім ету – үлкен күнә. Бұл адами-моральдық тұрғыда дұрыс емес нәрсе. Ал оны олар ойлап жүрген жоқ. Басы істесе, мұным қалай деп бір уақ ойланбай ма? Басы істемейді, ақылы жоқ.

Нәпсіқұмарлығын, қызығушылығын қанағаттандыру үшін шариғаттың нормаларын өзіне бейімдеп алған басбұзарлар олар. Басқалай не деп айтуға болады", - дейді дінтанушы.

"Теріс діни бағытқа түсетіндер - сауатсыз нәпсіқұмар жандар"

Ал әлеуметтанушы Қамажан Жұмақасова мұның бәрі құқықтық, діни сауатсыздықтан туындап, қоғамда кеңінен етек алып бара жатқан үлкен індет екенін айтты.

Тағы оқыңыз: "Денемнің қасына барып жаттым": Екі рет өліп-тірілген алматылық келіншектің әңгімесі

"Әке-шеше баласынан жамандық күтпейді. Сондықтан оның барлық әрекетін дұрыс деп бағалайды. Қара жамылса, таңдаған діні ғой дейді. Ал діндар еркек әйеліне неге теледидар көрсетпейді? Өйткені теледидар заңды, құқықты, біздің қандай мемлекетте өмір сүріп жатқанымызды насихаттайды. Біздің елде ешкімнің құқығы шектелмеуі керек. Адамдар осыны дұрыс түсінуі тиіс. Ал мынадай жағдайға тап болғанда, бірден айқайға көшу керек. Әйтпесе бәрі кеш болады", - деп кеңес берді ол.

4140
Кілт сөздер:
келіншек, деструктивті діни ағымдар, талақ
Қасым-Жомарт Тоқаев пен Асхат Аймағамбетов

Тоқаев білім министріне ұстаздарға қатысты екі маңызды тапсырма берді

2317
(Жаңартылды 17:58 05.08.2020)
Президент жаңа оқу жылын дұрыс ұйымдастырудың маңызды екенін ескертіп, қашықтан оқыту кезінде тұрмысы төмен отбасылардан шыққан балаларға қолдау көрсетуге көңіл бөлуді тапсырды

НҰР-СҰЛТАН, 5 тамыз – Sputnik. Білім және ғылым министрі Асхат Аймағамбетов президент Қасым-Жомарт Тоқаевқа министрліктің жаңа оқу жылына дайындығы және бұған дейін берілген тапсырмалардың орындалу барысы жайында есеп берді, деп хабарлады Ақорда сайты.

Президент жаңа оқу жылын дұрыс ұйымдастырудың маңызды екенін ескертті. Әсіресе, қашықтан оқыту кезінде әлеуметтік аз қамтылған отбасылардан шыққан балаларға қолдау көрсету қажеттігіне баса назар аударды.

"Мемлекет басшысы білім және ғылым министріне педагогтердің мәртебесін көтеру жөніндегі жұмысты жалғастыруды, ұстаздарды негізгі қызметінен бөлек жұмысқа жұмылдырмауды және 2021 жылғы қаңтар айына жоспарланған мұғалімдердің жалақысын 25%-ға арттыруды қамтамасыз етуді тапсырды, – делінген хабарламада.

Сондай-ақ, Қасым-Жомарт Тоқаев жоғары оқу орындарының академиялық дербестігін одан әрі кеңейту, жоғары білімнің сапасын арттыру және ЖОО-дағы ғылымды дамыту туралы тапсырма берді.

Оқи отырыңыз: "Ашық айтуымыз керек": білім министрі үкіметте маңызды мәселені көтерді

2317
Кілт сөздер:
ұстаздар, білім
Тақырып бойынша
Білім министрі Аймағамбетов сүйінші жаңалығын бөлісті
Депутат білім министріне ата-аналарды мазалаған мәселені жеткізді
Білім күні қалай өтеді – министр жауап берді 
Аймағамбетов жаңа оқу жылында білім алудың ерекшеліктерін атады
Білім министрлігі карантинге байланысты қандай өзгеріс болғанын хабарлады
Күнтізбе - 10 тамыз

Қазақстанда жаңа мереке пайда болды

1173
Үкімет "Қазақстан Республикасындағы мерекелік күндердің тізбесін бекіту туралы" қаулыға толықтыру енгізді

АЛМАТЫ, 5 тамыз – Sputnik. Қазақстанда жаңа мереке – Абай күні бекітілді, деп хабарлайды Sputnik Қазақстан премьер-министрдің сайтына сілтеме жасап.  

Үкімет "Қазақстан Республикасындағы мерекелік күндердің тізбесін бекіту туралы" қаулыға толықтыру енгізді. Осылайша, 10 тамыз Абай күні болып бекітілді.

Оқи отырыңыз: Қазақстандықтар тамыз айында неше күн демалады   

"Қазақстан Республикасындағы мерекелік күндердің тізбесін бекіту туралы" Қазақстан Республикасы үкіметінің 2017 жылдың 31 қазанындағы № 689 қаулысымен бекітілген Қазақстан Республикасындағы мерекелік күндердің тізбесі мынадай мазмұндағы 22-1-тармақпен толықтырылсын: "22-1. Абай күні – 10 тамыз", - делінген ақпаратта.

Қаулы ресми жарияланған күннен бастап қолданысқа енгізіледі.

1173
Кілт сөздер:
Қазақстан, мереке
Бейрутегі жарылыс

Тоқаев қазақстандықтардың қауіпсіздігі үшін Ливан президентіне қоңырау шалды

0
Ливанда 200-ге жуық Қазақстан азаматы, оның ішінде, қазақ дипломаттары мен әскери қызметшілер тұрып жатыр   

НҰР-СҰЛТАН, 5 тамыз – Sputnik. Қазақстан президенті Қасым-Жомарт Тоқаев Ливан президенті Мишель Аунға телефон арқылы көңіл айтты. Бұл туралы мемлекет басшысы Twitter-де хабарлады.

"Бүгін Ливан президенті Мишель Аунмен телефон арқылы сөйлесіп, Бейрут портындағы жарылыс кезінде қаза болған адамдардың отбасына көңіл айтып, зардап шеккендердің сауығып кетуіне тілектестік білдірдім", - деп жазды Тоқаев.

Ол Ливандағы 200-ге жуық Қазақстан азаматының, оның ішінде, қазақ дипломаттарының және БҰҰ-ның бітімгершілік күштері құрамында қызмет атқарып жүрген әскери қызметшілердің қауіпсіздігін қамтамасыз етуді өтінді.

Оқи отырыңыз: Сыртқы істер министрі Тоқаев қандай тапсырма бергенін айтты 

"Ливан президенті осындай қиын-қыстау кезеңде қолдау білдіргеніміз үшін алғыс айтып, Қазақстан азаматтарының қауіпсіздігін қамтамасыз етуге уәде берді", - деп атап өтті президент.

Бейрут қаласындағы жарылыс

4 тамыз күні Ливан астанасындағы теңіз порт базасында бірнеше жарылыс болды. Жақын маңдағы және бірнеше шақырым қашықтықтағы үйлер, ғимараттар қирады.

Ливандық БАҚ жүздеген адам зардап шегіп, ондаған тұрғын қайтыс болғанын айтты.

Жарылыс пиротехника қоймасында болуы мүмкін деген болжам жасалды. Алайда Ливан қауіпсіздік қызметінің басшысы генерал Аббас Ибрагим мұны жоққа шығарып, жарылғыш заттар орнатылғанын мәлімдеп отыр.

Жарылыс толқыны салдарынан Ливандағы Қазақстан дипломатиялық миссиясының ғимаратына зақым келді. Ол кезде жұмыс аяқталған. Сондықтан дипломатиялық миссия қызметкерлері кеңседе болмапты. Бірақ жұмыста қалған Қазақстанның Ливандағы консулы Бағлан Сыпабек жарылыс болған кезде жарақат алды.

0
Кілт сөздер:
қауіпсіздік, жарылыс, Қасым-Жомарт Тоқаев
Тақырып бойынша
Ақсайда тазартқыш ғимаратта жарылыс болып, бөлімше бастығы көз жұмды
Бейруттегі жойқын жарылыс: Қазақстан консулы жараланды