Тұлым шаш

Айдар, тұлым, кекіл: қазақ халқының балаға шаш қою дәстүрінің сыры неде?

5330
(Жаңартылды 19:00 18.06.2019)
Этнограф-ғалым қазақ халқы балаға айдар, тұлым, желке шаш, кекілді неге қоятынын түсіндірді

НҰР-СҰЛТАН, 18 маусым — Sputnik, Дәурен Ерболат. Әл-Фараби атындағы Қазақ ұлттық университетінің профессоры, этнограф-ғалым Тәттігүл Қартаева Sputnik Қазақстан тілшісіне берген сұқбатында қазақтың балаға айдар, тұлым, желке шаш, кекілді неге қоятынын түсіндіріп, бұрынғы қазақ қыздары шашын қалай күткенін айтып берді. 

Этнограф-ғалым қазақ халқы ер мен әйелдің шашына, оның күтіміне ерекше мән бергенін атап өтті.

Этнограф-ғалым Тәттігүл Қартаева
© Photo : Тәттігүл Қартаеваның жеке архивінен
Этнограф-ғалым Тәттігүл Қартаева

"Шаштың күтімі мен оны өсіруге қатысты ұғымдар ерте кезден қалыптасты. Қазақ халқында жас ерекшеліктеріне қарамастан шашты жерге тастамаған. Мысалы, жерге түскен шашты отқа тастаған немесе ошақтағы қуыстарға тыққан. Яғни, саз кірпіштен жасалған ошақты алайық. Оның қабырғасында тесік қуыстар болса, бұрынғы кездері сонда шашты тыққан. Біз этнографиялық экспедицияларға көп шығамыз. Сонда осындай жағдайларға куә болдық", - дейді Тәттігүл Қартаева.

Қарын шаш деген не?

Сұқбат барысында профессор сәби қырқынан шыққан кезде шашы алынатынын және оны жерге тастауға болмайтынын айтты.

"Баланың қырқынан шыққан кездегі алынған шашын қазақ халқы "қарын шашы" дейді. Ол "қар", қары" деген байырғы түркі сөзімен тығыз байланысты. Тіпті, қазақта "қарын шашыммен қарғаймын" деген қарғыс болған. Оны әжелер қатты ызаланғанда айтқан. Сондықтан қарын шашты жерге тасмамай, оны адамның аяғы баспайтын жерге көмген немесе сақтап қойған", - дейді этнограф-ғалым.

Тағы оқыңыз: Мүшел жас туралы деректер

Оның айтуынша, қырқынан шыққан сәбидің шашын кез келген адам алмаған.

"Қазақтар сәбидің қарын шашын алуға ерекше мән беріпті. Баланың шашын үбірлі-шүбірлі болған, отбасында беделі бар, жасы үлкен кісі алған", - дейді ол.

Тәттігүл Қартаеваның пікірінше, "шашты жерге тастаса, бас ауырады", "адамның бір жаны шашында" деген сөздер шашты жерге тастауға болмайды деген ұғымнан туындаған.

Айдар, тұлым және желке шаш

Сонымен қатар этнограф-ғалым балаға айдар, тұлым, желке шаш не үшін қойылатынын түсіндірді.

"Қазақ халқы кішкентай баланы тіл-көзден сақтау үшін оған айдар, тұлым, желке шаш қойған. Айдар, тұлымды қыз балаға да қойған. Ұл баланың айдары төбесінен қойылған немесе желке тұсынан бір ғана шаш қалдырған. Оны "желке шаш" дейді. Кейін бұл шашты өсіріп, өрген. Айдар, тұлымды, желке шашты бала сүндеттелгенге дейін немесе алғашқы мүшел жасқа (13 жас) дейін алмаған", - дейді Қартаева.

Тағы оқыңыз: Ат тергеу дәстүрі туралы не білеміз?

Айтуынша, айдар, тұлым мен желке шашты кез келген балаға қоймаған екен.

Тұлым шаш
© Sputnik /
Тұлым шаш

"Егер баласы көп шетінесе, бірнеше рет түсік жасаса, бесікте жатқан сәби аурушаң болса, "көз тимесін" деп айдар, тұлым, желке шаш қойған. Сондай-ақ, әйел кілең ұл туып, соңында қыз баланы дүниеге әкелген кезде, "тіл-көзден сақтасын" деп сәбиге тұлым қойған. Қыздың тұлымы екі самайынан қойылған. Қыздың айдар, тұлымын түбінен кесіп тастамаған", - дейді ғалым.

Кекіл қою

Тәттігүл Қартаеваның сөзіне сүйенсек, ұлға да, қызға да кекіл қойылған. Баланы "тіл-көзден сақтасын" деп кекілін өсірсе керек.

"Бізде қыз баланың тарихи суреттері бар. Онда қыз баланың бой жеткенше кекілмен жүргені бейнеленген. Фото ХІХ-ХХ ғасырдың бас кезінде түсіріліпті. Бірақ бұл – өте сирек кездесетін жағдай. Қазақ халқында "кекілді қыз", "кекілді бала" деген ұғым бар. Кекілді де балаға жоғары аталған себептермен қойған. Сонымен қатар, бала есейгенге дейін кекілмен жүрмеген. Жалпы айдар, тұлым, желке шаш, кекіл – жас баланың шаш қою үлгісі болып саналады", - дейді профессор.

Тағы оқыңыз: Қазақты сырға салу дәстүрінің мәні неде?

Қолаң шаштың құпиясы

Әңгіме барысында этнограф-ғалым ерте заманда қазақ қыздарының шашы ұзын болғанын айтып, шаш күтімі туралы сөз қозғады.

"Қыз бала бой жеткенде шаш қою үлгісін өзі таңдаған. Олардың шашы ұзын болған. Шашының ұшын ғана бастырып отырған. Қазақта "шаштың ұшын бастыру" деген сөз бар. Демек, шаштың ұшы ұштанып, екіге бөлінген кезде шаштың ұшын майлап, оны тегістеп, ұштанған жерін алып тастауды "бастыру" дейді. Шаш ұштанған кезде оны маймен сылап немесе ашыған айранмен жуып, күтім жасаған. Негізі, қазақтың қыздары мен әйелдері шашын қимаған", - дейді Қартаева.

Қазақ халқы "шашы кесілген қыздың бақыты кесіледі" деп ырымдап, кішкентай күнінен қыздың шашын алмапты.

Әйелдің бұрымын неге кескен?

Сонымен қатар, энциклопедиялық деректерге сүйенсек, бағзы заманда қарабет болған қыздың шашын кесіп, бетіне күйе жағып масқаралаған. Еріне опасыздық жасаған немесе өте ауыр қылмыс істеген әйелдерге ел алдында бұрымын кесу жазасы қолданылыпты. Ол кезде әйелдер үшін жазаның ауыр түрі бұрымын кесу еді. Шаш, бұрым әйелдің сәні, салтанаты, әйелдік белгісі болғандықтан, одан ажырау масқара болып саналған екен.

5330
Зират, архивтегі фото

Әлеуметтік желіде зираттардың видеосы қызу талқыға түсті

155
(Жаңартылды 08:26 15.07.2020)
Алматыда жерлеу рәсімімен айналысатын орталықтың бірі күніне орташа 80 адамды соңғы сапарға аттандырамыз деп отыр

НҰР-СҰЛТАН, 14 шілде – Sputnik. Әлеуметтік желіде бірнеше аптада кенет лық толған зираттардың видеосы қызу талқыға түсті. Көңіл жабырқатар көріністі көпшілік коронавируспен байланыстырады.

Жерлеу рәсімімен айналысатын орталықтар да тапсырыстың бірден үш есеге артқанын айтып отыр, деп хабарлады КТК.

"Мынаны қара! Ана жақта көміп жатыр. Міне, тағы қазып жатыр".

Желіде тараған видеолардағы қаз-қатар тізілген, топырағы кеппеген ондаған мола кімнің де болмасын денесін түршіктереді.

"Болды, толды. Толды, орын жоқ енді, ары кетсе, бір жиырма адамдық қана жер қалды", - дейді тағы бір видеоның авторы.

Бұл зират Талдықорған шетіндегі Еркін ауылында орналасқан деп көрсетілген. Қазір мұндай бейнероликтер желіде желдей еседі.

Алматыдағы Кеңсай зиратының етегі де жаңа қабірлерге толған. Жер қазып жатқан қабіршілер көп. Бейітке ескерткіш тас дайындайтын шеберлер де мұнда беттеген қаралы көштің көбейгенін растап отыр.

Оқи отырыңыз: Діни басқарма індеттен көз жұмғандарды жерлеуге қатысты пәтуа шығарды 

Алматыдағы жерлеу рәсімімен айналысатын орталықтың бірі қазір күніне орташа 80 адамды соңғы сапарға аттандырамыз деп отыр. Бұрын бұл көрсеткіш екі жарым есе аз болған екен.

"Бұрын күніне 27-28 адам, 25 адам қайтыс болса, бүгін, мысалы, 80 адам көз жұмды. Бұрын арнайы қорым, бөлек зират болған. Қазір кез келген зиратқа қойып жатырмыз", - дейді Жерлеу рәсімі орталығының өкілі Марат Исмаилов.

155
Кілт сөздер:
коронавирус, видео, зират
Тақырып:
Коронавирус эпидемиясы
Тақырып бойынша
Індеттен көз жұмғандар жерленген зиратта 32 қабір бар – әкімдік жағдайды түсіндірді
Тоқаев карантин режимі қашанға дейін жалғасатынын айтты
Маман өзін-өзі емдеуде антибиотик несімен қауіпті екенін айтты
Қытайдан әкелінген маскаларға инфекция жұқтырылған - министрлік түсініктеме берді
Бас санитар дәрігер вирус жұқтырғандар саны неге артып жатқанын түсіндірді
Дезинфекция жүргізу

Нұр-Сұлтанда ауқымды дезинфекция жұмыстары жүргізіледі

121
(Жаңартылды 22:05 14.07.2020)
Бас санитар дәрігердің қаулысына орай, сауда үйлері мен базарлар, ойын-сауық орталықтары мен басқа да көпшілік жиналатын орындардың басшылары жұмыс орындарында дезинфекция жүргізуі тиіс

НҰР-СҰЛТАН, 14 шілде – Sputnik. 15 шілде күні Нұр-Сұлтан қаласында халық көп жиналатын орындарда (саябақ, сквер, гүлзар, жағалау және т.б.) ауқымды дезинфекция жүргізіледі, деп хабарлайды қала әкімдігінің баспасөз қызметі.

"Дезинфекция таңғы сағат 6-7-де басталады. Өңдеу кезінде қала тұрғындары адамдар көп жиналатын орындарға бармағаны жөн. Қаланы өңдеуге коммуналдық сала қызметтерімен бірге төтенше жағдайлар жөніндегі департаменттің және мамандандырылған компания қызметкерлері қатысады", - делінген хабарламада.

Дезинфекция жұмыстары жаяу және арнайы машиналардың көмегімен жүргізіледі.

Қалалық бас санитар дәрігердің қаулысына сәйкес, сауда үйлері мен базарлар, ойын-сауық орталықтары мен басқа да көпшілік жиналатын орындардың басшылары да жұмыс орындарында дезинфекция жүргізуі тиіс.

Осы кезге дейін қалада барлығы 20 миллион шаршы метрден астам аумақта дезинфекция жасалды. Дезинфекциялау тұрақты түрде жүргізіледі.

Оқи отырыңыз: Тоқаев дезинфекция жасап жүрген жігітті таныды - видео

Айта кетейік, 5 шілдеден 2 тамызға дейін елімізде шектеу шаралары енгізілді. Қала тұрғындары санитария нормаларды қатаң сақтап, маска тағып, антисептик қолданып, әлеуметтік қашықтық сақтауы қажет.

121
Кілт сөздер:
Нұр-Сұлтан, тазалық
Тақырып:
Төтенше жағдай және карантин
Тақырып бойынша
Жұртты дүрліктірген видеодағы тікұшақтардың не істеп жүргені белгілі болды  
Арыста дезинфекция жұмыстары басталды
Алматыда қоғамдық көлік уақытша тоқтатылды
Елордада дезинфекция шаралары қалай жасалды – видео
Нұр-Сұлтанда демалыс күндері ауқымды дезинфекция жұмыстары жүргізіледі