Қазақстан туы фонындағы адамдардың сұлбасы

Қазақстанда 1 мамырдан бастап не өзгереді

15130
(Жаңартылды 09:45 01.05.2020)
Көктемнің соңғы айының басты жаңалығы он бірінші мамырда төтенше жағдай режимінің аяқталуы болмақ, осы айда қазақстандықтар біртіндеп қалыпты өмірге оралады деген үміт бар

НҰР-СҰЛТАН, 1 мамыр – Sputnik. Бірінші мамырдан қалалар арасында әуе рейстері ашылады. Халыққа қызмет көрсету орталықтары мен валюта айырбастау пунктерінің жұмысы жанданады. Банктер жекелеген салаларда қолма-қол ақшасыз төлем қабылдағаны үшін алынатын комиссияны төмендетеді. Осы және өзге де өзгерістер туралы Sputnik Қазақстан материалынан оқыңыз.

Ұшақ қатынайды

1 мамырдан бастап Нұр-Сұлтан мен Алматы арасында әуе рейсі іске қосылады.

Ал 4 мамырдан бастап Нұр-Сұлтан мен Алматыдан Қызылорда, Петропавл, Өскемен және Семей қаласына ұшуға болады.

Рейстерде санитарлық талаптар күшейтіледі. Ал әуе жолаушыларына бірқатар талап қойылады.

Тағы оқыңыз: Сингапур ғалымдары Қазақстан індетті қашан жеңетінін болжады

Ұшақ бортына коронавирус табылмағаны туралы анықтамасы бар жолаушылар ғана кіргізіледі. Сонымен қатар, олар міндетті түрде маска тағып және араға бір орындық қалдырып отыруы тиіс. Вирусқа тексерілгеннен кейін берілетін анықтама жеті күнге жарамды.

Анықтаманы жекеменшік және мемлекеттік зертханалардан алуға болады. Жекеменшік зертханаларда тест 19-20 мың теңге, ал мемлекеттік орталықтарда 11 500 теңге тұрады.

Шаштараз бен тіс емханалары ашылады

4 мамырдан бастап еліміздің барлық өңірінде бірқатар нысанның жұмысы жанданады.

Олар:

  • аумағы 500 шаршы метрге дейінгі азық-түлік cатпайтын дүкендер (17:00-ге дейін ашық);
  • фотосалондар;
  • гүл сататын дүңгіршектер;
  • шаштараз (алдын ала жазылу бойынша);
  • медицина орталықтары (алдын ала жазылу бойынша);
  • тіс емханалары (алдын ала жазылу бойынша);
  • жылжымайтын мүлікке қатысты операцияларды жүзеге асыратын компаниялар, жарнама агенттіктері, адвокаттар, нотариустар;
  • шағын қаржы ұйымдары, сақтандыру компаниялары, ломбардтар, валюта айырбастау пунктері;
  • ақпараттық-коммуникациялық технологиялар компаниялары.

Сонымен қатар, 4 мамырдан бастап далада спортпен шұғылданып, жаттығу жасауға рұқсат етіледі.

Ал ойын-сауық және сауда орталықтары, кинотеатрлар, мейрамханалар,  саябақтар мен адам көп жиналатын басқа да орындар әзірге жабық болады. Жоғары оқу орындары, колледждер, мектептер қашықтан оқытуды жалғастыра береді.

Төтенше жағдай 11 мамырда аяқталуы мүмкін

Коронавирустың таралуына жол бермес үшін елімізде 16 наурыздан бастап төтенше жағдай жарияланды. Алғашында режим 15 сәуірге дейін созылуы тиіс еді. Індет өршігендіктен, төтенше жағдай 1 мамырға дейін ұзартылды.

Ал жуырда президент елдегі ахуалға байланысты режимді тағы да ұзарту туралы жарлық шығару жөнінде шешім қабылдағанын жариялады.

Тағы оқыңыз: "Қолдау көрсетеміз": Тоқаев тағы бір тізімнің жасалып жатқанын айтты

"Заңға сәйкес 11 мамырда төтенше жағдай режимі аяқталады. Әрине, эпидемия қайта өршіп кетпесе ғана режим тоқтайды. Ахуал күрделене қоймайды деп үміттенемін", - деді Қасым-Жомарт Тоқаев.

Осылайша мемлекет басшысының жарлығымен Қазақстанның барлық аумағындағы төтенше жағдайдың қолданысы 2020 жылдың 11 мамыры 00 сағат 00 минутқа дейін ұзартылды.

ХҚКО жұмысы жанданады

4 мамырдан бастап Нұр-Сұлтан қаласы, Батыс Қазақстан, Қарағанды және Маңғыстау облыстарында Халыққа қызмет көрсету орталықтары жұмысын бастайды.

Енді ХҚКО-да egov.kz порталында электронды форматта қолжетімсіз қызметтерді ғана алуға болады.

Астана мен үш облыстың тұрғындары ХҚКО-ға бару үшін 1414 нөмірі немесе egov.kz порталындағы арнайы сервис арқылы алдын ала кезекке тұруы тиіс.

Банктер комиссияны азайтады

1 мамырдан бастап банктер жекелеген салаларда қолма-қол ақшасыз төлем қабылдағаны үшін комиссияны төмендетеді.

Өзгерістер экономиканың әлеуметтік мәні бар жекелеген салаларын қамтиды: білім беру, медициналық қызметтер, дәріханалар, тұрақ орындарына, ақылы жолдарға ақы төлеу, ауыл шаруашылығы сервистері, жылжымайтын мүлікпен жасалатын мәмілелер.

Visa және Mastercard халықаралық төлем жүйелері банкаралық комиссияның мөлшерлемесін қазақстандық банктер үшін 2 есе –  1%-ке дейін, ал фармацевтика сегментінде 1,3%-ке дейін төмендетеді.

Тағы оқыңыз: Президент: мамыр айындағы мерекелерді үйде атап өтуге тура келеді

Сауда комиссиясын төмендету бастамасын "Қазақстан Халық банкі",  "Kaspi Bank", "Forte Bank", "Сбербанк", "АТФБанк", "Банк ЦентрКредит", "Jysan Bank", "Еуразиялық банк" қолдады. Бұл банктер сауда (эквайрингтік) комиссиясын орташа алғанда 35%-ке, ағымдағы орташа мәннен, яғни 2,3%-тен транзакция сомасының 1,5%-не дейін төмендетеді.

Балаларға екпе салу қайта басталады

Нұр-Сұлтанда 11 мамырдан бастап бір жасқа дейінгі сәбилерге екпе салуды жалғастыру жоспарланып отыр.

Мемлекеттік бас санитарлық дәрігердің қаулысына сәйкес, 2 сәуірден бастап бұл жұмыс уақытша тоқтатылған болатын. Екпені тек перзентханада ғана жасайды.

Дәрігерлер үйге барып екпе салмайды. Медициналық ұйымдар баланы емханаға алдырып, екпе егуді жоспарлап жатыр.

ҰБТ-ға қатысу туралы өтініш

ҰБТ-ға қатысатын түлектер 10 мамырға дейін ent2020.testcenter.kz сайтында онлайн өтініш тапсыруы керек.

Тіркеуден өткен кезде, заңды өкілдері 18 жасқа толмағандардың жеке мәліметтерін жинауға және өңдеуге келісім береді.

Әзірге ҰБТ мерзімі өзгеріссіз қалып отыр. Тестілеу форматы да өзгермейді, тек коронавирусқа байланысты қосымша санитарлық шектеулер енгізіледі. Тест тапсыратындар бір-бірінен алыс отырады. Жергілікті жерлерде барлық оқушының дене қызуы тексеріледі.

Сонымен қатар, биылғы тестілеуде 11-сыныпта 4-тоқсанда өткен бағдарлама сұрақтары болмайды.

15130
Кілт сөздер:
өзгерістер, 1 мамыр, мамыр
Аурухана палатасындағы медициналық аппаратура

Қазақстанда коронавирустан тағы бір адам қайтыс болды

109
Жұма, 29 мамырда Шымкент қаласында індетке шалдыққан 1945 жылғы науқас қайтыс болды, республикада вирустан көз жұмғандар саны 38 адамға жетті

НҰР-СҰЛТАН, 30 мамыр – Sputnik. Шымкентте коронавирустан бір адам көз жұмды, деп хабарлайды жедел штаб.

Науқас 29 мамырда қайтыс болған. Ол 1945 жылы туған әйел.

"Коронавирус жұқтырған науқастардың өлімін зерттеу жөніндегі комиссия пациенттің өліміне коронавирус инфекциясы себеп болды деген шешімге келді", - делінген хабарламада.

Қазақстанда осымен COVID-19-дан қайтыс болғандар саны 38 адамға жетті.

Республикада барлығы 10382 адамда коронавирус диагнозы расталды, 5057 адам жазылып шықты.

109
Кілт сөздер:
Шымкент, коронавирус
Тақырып:
Коронавирус эпидемиясы
Отырыстан түсірілген сурет

Саяси қуғын-сүргін құрбандарын ақтау комиссиясы немен айналысады

106
Қазақстан президенті әкімшілігінің мәліметінше, қуғын-сүргін құрбандарын ақтау жөніндегі алты мыңға жуық істі қарау қажет

НҰР-СҰЛТАН, 30 мамыр – Sputnik. Қазақстан президенті әкімшілігі басшысының бірінші орынбасары Дәурен Абаев мемлекет басшысы Қасым-Жомарт Тоқаев саяси қуғын-сүргін құрбандарын ақтау бойынша мемлекеттік комиссияның алдына қандай міндеттер қойғанын айтты.

"Бүгін президент Тоқаев өз үндеуінде саяси қуғын-сүргін құрбандарын ақтау бойынша мемлекеттік комиссияның құрылғанын жариялады. Жаңадан құрылған органның миссиясы –  саяси қуғын-сүргін құрбандарын толықтай саяси және заңды түрде ақтау мақсатында жүйелі жұмыстар ұйымдастыру", - деп түсіндірді Абаев.

Тағы оқыңыз: Тоқаев қазақстандықтарға үндеу жасады

Айтуынша, қуғын-сүргін құрбандарын ақтау жөніндегі алты мыңға жуық істі қарау қажет.

Мемлекеттік комиссия немен айналысады:

  • жаппай саяси қуғын-сүргін құрбандарын ақтау туралы заңнамаға ұсыныстар әзірлеу;
  • жаппай саяси қуғын-сүргін құрбандарына теңестірілетін және саяси ақтауға жататын тұлғалар санатын бекіту;
  • ақталғандарды мәңгі есте қалдыру, олардың жерленген жерлерін іздеу және күтіп-ұстауды ретке келтіру бойынша ұсыныстар әзірлеу;
  • ақталғандардың құқығын қалпына келтіру мәселелері бойынша өтініштер мен шағымдарды қарау.

Қазақстанда 31 мамыр – Саяси қуғын-сүргін құрбандарын еске алу күні.

106
Кілт сөздер:
саяси қуғын-сүргін құрбандары
Фонтан, бала

Қырық градус ыстық болады: ертеңге ауа райы болжамы

0
31 мамырда республиканың басым аумағында ауа райы жауын-шашынсыз, күн ыстық болады. Өңірлерде дабылды ескерту жарияланды

НҰР-СҰЛТАН, 30 мамыр – Sputnik. Қазақстан аумағында 31 мамырда ауа температурасы 41 градусқа дейін көтеріледі. Нұр-Сұлтанда жел күшейеді деп болжанып отыр. Қазгидромет жекелеген өңірлерде дабылды ескерту жариялады.

Қырық градус ыстық

Күндіз Қызылорда облысында 41 градусқа дейін аптап ыстық болады, солтүстік-шығыстан 15-20 м/с жел соғады.

Түркістан облысында да – 40 градус ыстық, кей жерлерде жылдамдығы 15-20 м/с жел тұрады. Түркістанда сынап бағанасы 40 градусқа дейін көтеріледі.

Қарағанды облысында 31 мамыр мен 2 маусым аралығында 35-39 градус ыстық күтіледі.

Тағы оқыңыз: Жаңбыр, бұршақ жауып, ыстық болады: маусымға ауа райы болжамы жарияланды

Қостанай облысында да аптап ыстық болжануда - 35-38 градус.

Қатты жел

31 мамыр күндіз Ақмола облысында желдің екпіні 15-20 м/с дейін барады.

Нұр-Сұлтанда оңтүстіктен және оңтүстік-батыстан соғатын желдің жылдамдығы секундына 15-18 метрге жетеді.

Мегаполистердегі ауа райы

Қазақстан астанасында сынап бағанасы 31-33 градусты көрсетеді деп күтілуде, көшпелі бұлт шығады, күн ашық. Желдің екпіні – 15-18 м/с.

Алматыда да ауа райы жауын-шашынсыз, 29-31 градус ыстық.

Шымкентте күн ашық, күндіз ауа температурасы 34-36 градусқа дейін жоғарылайды.

0
Кілт сөздер:
ыстық, ауа райы болжамы