Ақша, теңге

Зейнетақы жинағын пайдалану: кім, қашан және қалай жұмсай алады

2607
(Жаңартылды 13:05 07.09.2020)
Мемлекет басшысы зейнетақы жинағын пайдалануға қатысты барлық нормативтік-құқықтық актіні жыл соңына дейін қабылдауды тапсырды

НҰР-СҰЛТАН, 6 қыркүйек – Sputnik. 2021 жылдан бастап қазақстандықтар зейнетақы жинағының бір бөлігін пайдалануға мүмкіндік алады. Зейнетақы қорындағы ақшаны кім, қандай мақсатта және қалай жұмсай алатынын Sputnik Қазақстан шолуынан оқыңыз.

721 мың қазақстандық ілігіп тұр

Еңбек және халықты әлеуметтік қорғау министрлігінің ақпаратынша, келесі жылдан бастап зейнетақы жинағының бір бөлігін жұмсау мүмкіндігіне 721 мың азамат ие болады.

Олар:

  • зейнетақы жинағы бар, қордағы ақшасы "жеткіліктілік шегінен" асатын еңбекке жарамды жастағы азаматтар – 529,7 мың адам;
  • Бірыңғай жинақтаушы зейнетақы қорында жинағы бар зейнеткерлер – 178,4 мың адам;
  • зейнетақы аннуитетін рәсімдеген және шотында жинағы қалған қазақстандықтар – 13,3 мың адам.

Үкімет күштік құрылымдар мен құқық қорғау органдарының зейнеткерлеріне де зейнетақы қорындағы ақшаның бір бөлігін пайдалану мүмкіндігін ұсынып отыр. Олар 178 мың адамның ішіне кіреді.

Айта кететін жәйт, қорда зейнетақы жинағы бар зейнеткерлер қалған соманың 50%-ін ала алады. Бұл ретте жиынтық зейнетақы (жасына байланысты зейнетақыны, базалық зейнетақыны және БЖЗҚ төлемдерін қоса алғанда) зейнетке шыққанға дейін алған жалақысының кемінде 40%-ін құрауы тиіс.

Тағы оқыңыз: Экономистер зейнетақы жинағын қай салаларда жұмыс істейтіндер алатынын айтты

Ал қалған азаматтар үшін шектеу қарастырылмаған. Яғни, олар жеткіліктілік шегінен асқан соманың түгелін өз қажетіне жарата алады.

Жеткіліктілік шегі деген не?

Жеткіліктілік шегі – Бірыңғай жинақтаушы зейнетақы қорында шоты бар салымшыға қажетті ең төменгі сома. Егер шоттағы жинақ сол сомадан асса, қалған ақшаны мақсатты түрде пайдалануға болады.

Жеткіліктілік шегінің негізгі параметрлері:

  • әйелдер мен ерлер үшін бірдей;
  • кірістілік, инфляция, ең төменгі төлем мөлшері және тағы басқа параметрлерге сүйене отырып, жыл сайын қайта есептеліп отырады;
  • 20 жастан бастап әр жас үшін бөлек есептеледі.

Еңбек министрлігі жуырда әртүрлі жастағы адамдар үшін жеткіліктілік шегінің мөлшерін жариялады.

Жеткіліктілік шегінің мөлшері
© Photo : Еңбек және халықты әлеуметтік қорғау министрлігінің Facebook парақшасынан
Жеткіліктілік шегінің мөлшері

Мәселен, 20 жастағы қыз-жігіттің шотында ең кемі 1 миллион 720 мың теңге болуы керек. Ал 30 жастағы азамат үшін жеткіліктілік шегі 2 миллион 518 мың теңге, 40 жас үшін 3 миллион 437 мың, 55 жастағы адам үшін 5 миллион 84 мың теңге белгіленген.

Баспана, ипотека және қымбат ем

Үкімет қазақстандықтарға зейнетақы жинағын бірнеше мақсатқа пайдалануға беруді жоспарлап отыр.

Біріншісі. Жеткіліктілік шегінен артылған ақшаны адамдар баспана немесе жер учаскесін сатып алуға жұмсай алады. Айта кетерлігі, пәтерді жаңа үйден ғана емес, қолданыстағы тұрғын үйлерден де алу жағы қарастырылған.

Екіншісі. Ипотеканы қайта қаржыландыру немесе өтеу мүмкіндігі. Бұл жерде салымшының ипотеканы қай банктен және қандай бағдарламамен алғаны ескерілмейді. Зейнетақы қорындағы ақшамен кез келген бағдарлама бойынша, кез келген екінші деңгейлі банктегі қарызды жабу мүмкіндігі бар.

Үшіншісі. Жеке тұрғын үй салу, жөндеу немесе кеңейту.

Еңбек министрінің айтуынша, тұрғын үйге қатысты бір ғана шектеу болуы мүмкін. Оған сәйкес, зейнетақы жинағына сатып алынған үйді бес жылдың ішінде сатуға болмайды.

Төртіншісі. Ем ақысын төлеу. Кез келген азамат зейнетақы жинағын өзінің, әйелінің немесе күйеуінің, жақын туысқандарының еміне жұмсай алады.

Бесіншісі. Зейнетақы жинағын қаржы компанияларына басқаруға беру.

Ақша қолға берілмейді

Зейнетақы қорындағы ақша адамның жеке шотына аударылмайды және қолма-қол да берілмейді. Бірыңғай оператор арқылы іске асырылады. Тұрғын үй саласында бірыңғай оператор Отбасы банкі болмақ.

Мәселен, сіз пәтер сатып алғыңыз келді делік. Отбасы банкіне зейнетақы жинағымның бір бөлігін баспана сатып алуға жұмсағым келеді деп өтініш жазасыз. Отбасы банкі Бірыңғай жинақтаушы зейнетақы қорына хабарласып, сіздің шотыңызда артық ақша бар-жоғын тексереді. Осыдан кейін зейнетақы қорынан сіз сұратқан соманы алып, баспана сататын тұлғаның шотына аударып береді.  

Тағы оқыңыз: Министр зейнет жасын төмендетуге қатысты пікір білдірді

Ипотеканы жабу немесе қайта қаржыландыру мәселесі бойынша да Отбасы банкіне жүгіну керек болады.

Зейнетақы жинағын ем-домға пайдалануға беру тетігі де денсаулық сақтау жүйесіндегі бірыңғай оператор арқылы іске асады. Өңірлердегі денсаулық сақтау басқармасының жанынан арнайы комиссия құрылады. Сол комиссиялар емдеу қажеттілігін айқындайды. Ал емделуге баратын адам клиниканы таңдағаннан кейін, өз өтінішін бірыңғай операторға тапсырады. Оператор зейнетақы жинағының бір бөлігін сол емханаға аударып, ем шығынын өтейді.

Яғни, азаматтар қағаз-құжат жинап, әр мекеменің табалдырығын тоздырып жүрмейді. Бәрі бірыңғай оператор арқылы шешіледі.

Бір отбасының ақшасын біріктіру

Зейнетақы жинағының бір бөлігін бір емес, бірнеше рет алу құқығы беріледі.

Салымшы ақшаны өзі үшін, жұбайы және жақын туыстары үшін пайдалана алады. Заң бойынша жақын туыстарына ата-әжесі, ата-анасы, балалары, немерелері, бауырлары жатады.

Сондай-ақ, үкімет бір отбасы мүшелерінің қаражатын біріктіру мүмкіндігін де қарастырмақшы. Яғни, отбасы мүшелері зейнетақы жинақтарын қосып, белгілі бір мақсатта пайдалануға өтініш бере алады.

Жаңа норма қашан күшіне енеді

Ел президенті зейнетақы жинағына қатысты барлық нормативтік-құқықтық актіні жыл соңына дейін қабылдауды тапсырды. Егер бәрі ойдағыдай іске асса, 2021 жылдың 1 қаңтарынан бастап қазақстандықтар зейнетақы шотындағы ақшаны өз қажетіне жұмсау мүмкіндігіне ие болады.

2607
Кілт сөздер:
зейнетақы жинағы, зейнетақы
Тақырып бойынша
Зейнетақы шотындағы ақшаны бір емес, бірнеше рет алуға болады
Зейнетақы жинағына баспана алу шарттары белгілі болды
Зейнетақы қорындағы ақша емделуге қалай берілетіні жарияланды
Зейнетақы жинағын пайдалану: әр жас үшін жеткіліктілік шегінің мөлшері жарияланды
Айзат Молдағасымова

Сынақ мерзімінен өтпеді: Молдағасымова тағы да жұмыссыз қалды

697
Молдағасымова Гигиена және эпидемиология ғылыми орталығының басшысы қызметінен төрт айдан кейін босатылды

НҰР-СҰЛТАН, 21 қыркүйек – Sputnik. Жұматов атындағы Гигиена және эпидемиология ғылыми орталығын басқарған Айзат Молдағасымова тағайындалғаннан кейін төрт ай өткен соң жұмыстан босатылды.

Денсаулық сақтау министрлігі ол осы уақыттың басым бөлігінде жұмыста болмағанын хабарлады.

Сынақ мерзімінен өтпеуіне байланысты оны жұмыстан босату туралы бұйрыққа 14 қыркүйекте қол қойылды, деп түсіндірді денсаулық сақтау министрлігі.

"Айзат Молдағасымова 2020 жылдың 3 маусымында қойылған міндеттерді тиімді орындау мақсатында Жұматов атындағы гигиена ғылыми орталығының директоры қызметіне қабылданды. Алайда ол уақытша еңбекке жарамсыздық парағын алып, 1 шілде мен 14 қыркүйек аралығында жұмыста болмады. 14 қыркүйектен бастап сынақ мерзімінен өте алмауына байланысты онымен еңбек шарты тоқтатылды", - деп  түсіндірді ұлттық денсаулық сақтау орталығының директоры Дамир Көпжасаров.

Оның айтуынша, онымен еңбек шарты сынақ мерзімі кезінде нашар жұмыс істеуіне байланысты бұзылған.

Оқи отырыңыз: Алматының бас санитары дәрігерлердің қалай ауру жұқтырғанын айтты 

Айзат Молдағасымова бұған дейін Алматының бас санитар дәрігері қызметін атқарды. Оның кезінде Орталық қалалық клиникалық аурухананың қызметкерлері жаппай коронавирус жұқтырды. Қаланың бас санитары бұған дәрігерлердің  қауіпсіздік шараларын сақтамауы себеп болуы мүмкін деп мәлімдеген болатын. Алайда ақхалаттылар Молдағасымованы жала жапты деп айыптап, президенттің атына хат жазды.

Осы жағдайдан кейін, 18 сәуірде Айзат Молдағасымова қызметінен кетті, оның орнына Жандарбек Бекшин тағайындалды.  

697
Тақырып бойынша
Жаппай індет жұқтыру оқиғасы: Алматыда аурухананың бас дәрігері қызметінен кетті
Алматының бас санитары 12 дәрігерден коронавирус табылғаннан кейін мәлімдеме жасады
Алматыда коронавирус табылған дәрігерлер 300-ден аса адаммен байланыста болған
Жандарбек Бекшин жаңа қызметке тағайындалды
Қабан, архивтегі фото

Нұр-Сұлтан қаласына жабайы қабандар кіріп кетті видео

154
Экология министрлігі орман шаруашылығы және жануарлар дүниесі комитетінің инспекторлары мән-жайды анықтап жатыр

АЛМАТЫ, 21 қыркүйек – Sputnik. Елорда тұрғындары түнде қалада жүрген бірнеше жабайы қабанды видеоға түсіріп алды. Қазір экология, геология және табиғи ресурстар министрлігі жануарлардың Нұр-Сұлтанға қалай кіріп кеткенін анықтап жатыр.

Қаланың орталық даңғылында жүрген қабандар жайлы видеоны Instagram желісіне zhaloby_astana паблигінің қолданушылары жариялады. Видеодан топтасқан жануарлардың жол бойымен жүгіріп бара жатқанын көруге болады. Автордың айтуынша, бұл Тұран даңғылында "Астана Арена" стадионының жанында болған.

Елорда тұрғындары Нұр-Сұлтанға жабайы қабандар қайдан келгенін біле алмай дал.

Sputnik Қазақстан экология министрлігінен жағдайды түсіндіруді сұрады. Ведомствоның баспасөз қызметі орман шаруашылығы және жануарлар дүниесі комитетінің инспекторлары мән-жайды анықтап жатқанын хабарлады.  

154
Архивтегі фото

Қарағанды облысында ұрланған көлік өртеніп кетті

0
Полицияға ауылдан шығаберісте қатты жылдамдықпен жүрген көлік аударылып, өртеніп кеткені туралы хабарлама түскен

НҰР-СҰЛТАН, 21 қыркүйек – Sputnik. Қарағанды облысында біреудің көлігін айдап әкеткен азамат жол апатына ұшырады, деп хабарлады Polisia.kz.  

20 қыркүйек күні Қарағанды облысы Бұқар жырау аудандық полиция басқармасына 47 жастағы Қарағанды қаласының тұрғыны хабарласып, аудан орталығына туысының үйіне келгенде түнгі сағат 1.00 шамасында белгісіз біреу аулада тұрған автокөлігін айдап әкеткенін жеткізген.

Арада біршама уақыт өткенде полицияға ауылдан шығаберісте қатты жылдамдықпен жүрген көлік аударылып, өртеніп кеткені туралы хабарлама түскен. Оқиға орнына келген полиция қызметкерлері өртенген ұрланған көлік екенін анықтады.

Оқи отырыңыз: Ордабасы тұрғыны көшеде келе жатып, ұрланған көлігін танып қойды 

Куәгерлер көлік аударылғанда оның ішінен белгісіз азамат шығып, оқиға орнынан ізін суытқанын айтқан.

Автокөліктің қатты өртенгені сондай, қайта жөндеуге жарамсыз болған. Жәбірленушіге келтірілген шығын көлемі үш миллион теңгеден асқан.

Жедел іздестіру іс-шаралары барысында полиция қызметкерлері аталған іске қатысы бар деген күдікпен 28 жастағы ер адамды ұстап, оған қатысты Қазақстан Қылмыстық кодексінің 200-бабына сәйкес қылмыстық іс қозғады.

Қазіргі уақытта тергеу амалдары жүргізіліп жатыр.

0
Кілт сөздер:
ұрлық, көлік
Тақырып бойынша
Түркістанның екі тұрғыны ұрланған көлікпен жол апатына түсті
Денис Теннің өліміне күдікті өз өмірі туралы шындықты айтты
Алматыда 350-ге жуық көлік айнасын ұрлаушы ұсталды
Ұрланған ақшаға көлік алған: Шымкент тұрғынын өртеп жіберген қаскүнем ұсталды
Алматыда көлік айдап әкеткен қос ұры өлім аузынан қалды - фото
Жоғалған автокөлік нөмірін үйден шықпай-ақ қалпына келтіруге болады