Алексей Цой

Цой балалар қай жастан кейін коронавирусты жылдам тарататынын айтты

2797
(Жаңартылды 12:53 10.09.2020)
Денсаулық сақтау министрлігі бірінші тоқсанда қашықтан оқыту форматын сақтауды ұсынып отыр. Себебі коронавирустың екінші толқыны басталады деген қауіп бар

НҰР-СҰЛТАН, 10 қыркүйек – Sputnik. Денсаулық сақтау министрі Алексей Цой қашықтан білім беру форматын енгізудің негізгі себептерін атады, деп хабарлайды Sputnik Қазақстан тілшісі.

"Біріншіден, наурыз айынан бері елімізде карантин мен адамдардың қарым-қатынасын барынша азайту шаралары қолға алынса да, 2 418 бала коронавирус инфекциясын жұқтырды. Олардың 98 проценті жазылып шықты. 34 бала әлі емделіп жатыр. Демек, жабық ұжымдардың ішінде инфекция таралу деңгейі жоғары", - деді Цой орталық коммуникациялар қызметінде өткен онлайн брифингте.

Министрдің айтуынша, 12 жасқа дейінгі балалар инфекцияны көп таратпайды. Дегенмен, ондай оқиғалар бар. Ал 12 жастан асқан балалар вирусты тез таратады. Ондайда отбасы мүшелеріне, әсіресе, үлкен адамдарға қауіп төнеді. Бұл – Дүниежүзілік денсаулық сақтау ұйымының мәліметі және қашықтан оқыту форматын енгізудің екінші себебі.

"Үшіншіден, мектептерде термометрия, арақашықтық, бетперде тағу, балалардың қозғалысын шектеу, сыныптағы оқушылар санын азайту сияқты шаралар қолға алынса да, бұның барлығын қатаң сақтап жүру оңай емес. Әсіресе, бастауыш сынып оқушыларын ұзақ уақыт бір жерде ұстау қиын. Ал жабық нысандарда адамдар көп жиналса, вирустың таралу қаупі күшейеді", - деп атап көрсетті Цой.

Айта кетсек, бүгінде денсаулық сақтау министрлігі бірінші тоқсанда қашықтан оқыту форматын сақтауды ұсынып отыр. Себебі коронавирустың екінші толқыны басталады деген қауіп бар. Оған қоса, ЖРВИ мен тұмау маусымы жақын. 

Қазіргі кезде шектеу шараларын жеңілдету шаралары қарастырылып жатыр. Бірақ бұның бәрі кезең-кезеңімен жасалатын болады.

2797
Кілт сөздер:
балалар, денсаулық сақтау министрлігі, коронавирус
Тақырып:
Коронавирус эпидемиясы (1523)
Тақырып бойынша
COVID-19 бен тұмауды бір уақытта жұқтыру қаупі бар ма – инфекционист жауабы
ДДҰ коронавирус туралы: бұл соңғы пандемия емес
Қазақстанда өткен тәулікте 86 адам коронавирус жұқтырды
Денсаулық министрі қашықтан оқыту туралы: бірінші тоқсан осы форматта өтеді
Қашықтан оқытуға 70 млн доллар бөлінгені рас па - Аймағамбетов жауап берді
Операторлар, иллюстративті фото

Журналистердің кәсіподағы құрылды

8
Жаңа ұйымның төрағалығына журналистика саласында 30 жылдық тәжірибесі бар танымал тележүргізуші Зейін Әліпбек сайланды

НҰР-СҰЛТАН, 22 қыркүйек – Sputnik. Қазақстанда бұқаралық ақпарат құралдары мен телерадио хабарларын тарату қызметкерлерінің "BAQ KASIPODAQ" салалық кәсіподағы құрылды. Бұл туралы бүгін ZOOM платформасында өткен бейнеконференцияда белгілі болды, деп хабарлайды Sputnik Қазақстан тілшісі.

Бейнеконференцияға танымал журналистер мен медиаменеджерлер қатысты. Сол жерде жаңа ұйымның төрағалығына журналистика саласында 30 жылдық тәжірибесі бар танымал тележүргізуші Зейін Әліпбек сайланды. Осыдан кейін кәсіподақ басшысы құрылымның жоспары мен алдағы бағыттары туралы жан-жақты баяндап берді.

Оқи отырыңыз: Қазақстанда митингтен хабар тарататын журналистер нені білуі тиіс 

"Алда журналистердің әлеуметтік-құқықтық жағдайын жақсартуды көздейтін көптеген шаруа, игі бастамалар тұр. Әсіресе, журналистердің шеберлігін шыңдап, кәсіби өсуіне бағытталған және қазақстандық БАҚ-тың әлеуетін күшейтуге арналған ілкімді жобалар бар. Оны тек қана кәсіподақ атқарады деуге болмайды. Оның барлығына сіздермен, құрметті әріптестер, бірлесе отырып қана қол жеткізе аламыз", - деді Әліпбек.

Айта кетейік, 2020 жылдың 10 қаңтарындағы мәлімет бойынша Қазақстанда 3669 БАҚ тіркелген. Республикада 2964 мерзімді басылым, 161 телеарна, 73 радио, 471 ақпарат агенттігі және желілік басылым бар.

8
Кілт сөздер:
журналистика
Шикі ет

Желіні шулатқан видео: полиция шикі ет жеп отырған баланың ата-анасын іздеп жатыр

84
Бүлдіршіннің заңды өкілдері табылғаннан кейін, олармен түсіндіру жұмысы жүргізіледі, қажет болған жағдайда балаға медициналық көмек көрсетіледі

НҰР-СҰЛТАН, 22 қыркүйек – Sputnik. Қазақстанның ішкі істер министрлігі Қазнетте тараған видеода шикі ет жеп отырған баланың әке-шешесін іздестіріп жатыр.

Бұл туралы білім және ғылым министрлігі балалар құқығын қорғау комитеті төрағасының орынбасары Юлия Овечкина хабарлады.

"Біз ақпаратты ішкі істер министрлігіне жолдадық. Баланың заңды өкілдері табылғаннан кейін, олармен түсіндіру жұмысы жүргізіледі. Қажет болған жағдайда балаға медициналық көмек көрсетіледі. Ата-аналар балаларының денсаулығына, физикалық, психикалық, рухани және моральдық дамуына қамқорлық жасау керек екенін ұмытпауы керек", - деді ол.

Овечкина ата-аналарға балалардың өмірі, денсаулығы мен қауіпсіздігі үшін әкімшілік және қылмыстық жауапкершілік қарастырылғанын ескертті.

Желіні шулатқан ролик 21 қыркүйекте жарияланды. Видеода бала шикі ет жеп отыр, кадр сыртынан әйелдің күлген даусы естіледі.

"Кәдімгідей тістеп отыр, жұлып алды әне. Бола берсін бе", - деп сұрайды бір әйел.  

"Не болады, жей берсін", - деп жауап береді екіншісі.  

Желі қолданушылары видеоны қызу талқылады. Бірі "мұнда тұрған ештеңе жоқ" десе, енді бірі баланың ішіне инфекция түседі деп алаңдаған.

84
Кілт сөздер:
ет, видео, бала