Сайлау Батыршаұлы

"Не керегі бар?" Белгілі ғалым тегіне руының атын қоятындарға шүйлікті

947
(Жаңартылды 20:16 06.03.2019)
Қоғам қайраткері азаматтардың аты-жөнін рәсімдеуді бір жүйеге келтіру қажеттігін айтты

АСТАНА, 6 наурыз – Sputnik. Белгілі қоғам қайраткері, профессор, дипломат Сайлау Батыршаұлы руға бөлінбей, ұлттық мүддені бәрінен жоғары қою қажеттігін айтты, деп хабарлайды Sputnik Қазақстан тілшісі.

"Руханият алаңы" ғылыми-танымдық пікір-талас клубында өткен жиында қоғам белсенділері азаматтар аты-жөнін жазған кезде "ов", "ова", "ев", "ева", "ин" деген жалғаулардың орнына "ұлы" мен "қызы" жалғауларын пайдалануы қажет деген мәселе көтерді.

Осы орайда белгілі ғалым Сайлау Батыршаұлы бүгін де қазақстандықтар аты-жөнін әртүрлі жазып жүргенін айтып, оны бір жүйеге келтіру қажеттігін жеткізді.

"Азаматтарымыздың жартысы аты-жөнін түрікше, не орысша үлгіде жазып жүр. Ал кейбірі аты-жөнін қазақиландырып, "ұлы", "қызы" деген жалғауларды қосып жатыр. Бір күні ғалым Ақселеу Сейдімбек фамилиясын "Тарақты" деп өзгертіпті. Содан соң кейбір азаматтар фамилияларына руларының атын қойып, "Жалаири", "Албани" деп өзгерте бастады", - деді ол.

Сонымен бірге қоғам қайраткері руға бөлінбеу керектігін, бұл мәселеде ұлттық мүддені жоғары қою қажеттігін айтты.

"Біз ұлттық сана-сезімімізді оятудың орнына, қайта рулық деңгейде ойлап, төмен кетіп бара жатырмыз. Жүзіңді, руыңды біл, онымен мақтан. Бірақ фамилияға рудың атын қою қажет пе? Мен "керек емес" деп көлемді мақала жаздым. Кейін бір жиында Ақселеу Сейдімбекпен кездесіп қалдым. Ол маған қарай берді. Сосын жаныма келіп: "Сәке, мақалаңызды оқыдым. Мен туралы жазыпсыз, онымен келісемін. Фамилиямнан "Тарақтыны" алып тастаймын" деді де, алып тастады. Ал кейбір азаматтар маған өкпелеп, жау көреді", - деді Сайлау Батыршаұлы.

Жиында Байқоңыр ауданының халыққа қызмет көрсету орталығы 5-бөлім басшысының орынбасары Дана Атымтаева құжаттарды рәсімдеген кезде заң бойынша әрбір азаматтың құқығы ескерілетінін атап өтті.

"Заң бойынша әрбір азамат аты-жөнін қалай жазғысы келсе, солай жазуға құқығы бар. Халыққа қызмет көрсету орталығы тұрғындарға тек қызмет көрсетеді. Ал құжаттарды рәсімдеумен АХАЖ бөлімі айналысады", - деп ол сөзін түйіндеді.

947
Кілт сөздер:
ұлт, рухани жаңғыру, латын графикасы, қазақша есімдер, аты-жөні
Тақырып бойынша
"Күлкі етеді" Танымал режиссер неге қазақша сөйлемей жүргенін айтты
"Ауыл ортасымен тыр жалаңаш күйінде жүріп өткен": Сал-серілер туралы не білеміз?
Загрузка...