Геннадий Головкин - Сергей Деревянченко

Деревянченко Головкиннің соққысының салдары ауыр болғанын мойындап таңғалдырды  

2500
(Жаңартылды 16:23 09.10.2019)
Сергей Деревянченко жекпе-жектің басында нокдаунға түскеннен кейін бірден есін жиғанын атап өтті. Ол үшін басты проблема қабағының жарылып кетуі болған

НҰР-СҰЛТАН, 9 қазан – Sputnik. Украиналық боксшы Сергей Деревянченко орта салмақтағы IBF және IBO тұжырымдары бойынша әлем чемпионы титулы үшін өткен жекпе-жекте қазақстандық Геннадий Головкиннен жеңілуіне қатысты тағы да пікір білдірді, деп хабарлады Sports.kz. 

Естеріңізге сала кетейік, украиналық ширақ көрінген, бірақ бірінші раундта нокдаунға түсіп, қабағы жарылып кеткен жекпе-жекте төрешілер жеңісті бірауыздан танымал қазақстандық боксшыға берген еді – 114:113, 115:112, 115:112.

Тағы оқыңыз: Головкиннің жанкүйерлерінен не жасырғаны белгілі болды

Сергей Деревянченконың айтуынша, жекпе-жектің басында нокдаунға түскеннен кейін бірден есін жиған. Ол үшін басты проблема қабағының жарылып кетуі болған, өйткені жекпе-жек кезінде қарсыласының соққыларына жауап қайтаруына қан кедергі келтіріпті.    

"Нокдаун болған кезде, соққы жасауға әрекет жасап жатыр едім, оның жұдырығы желкеме тиді. Бірақ орнымнан тұрғанда өзімді сергек сезіндім.

Екінші раундта еңкейе бергенімде, Головкиннің апперкотына тап болдым. Жарақат келтірген бұл соққыны сездім. Содан кейін қан ара-тұра көзіме құйылып жатты, соның кесірінен тікелей және жанама соққыларды көрмедім. Мені дәрігерлерге апарған кезде, олар кездесуді тоқтатып тастайтын болды-ау деп алаңдадым.

Жекпе-жек аяқталғаннан кейін жеңісті маған береді деп үміттенген едім. Мен көп соққы жасадым, бірақ Геннадий олардың бәріне қарсы тұрды.

Реванш жөнінде ештеңе білмеймін, алдағы нәтижелерді күтеміз. Мен Головкиннің Альвареспен жұдырықтасып, белбеуге таласқысы  келетінін білемін. Егер жанкүйерлер қаласа, реванш өтуі мүмкін", - деді Деревянченко IFL TV-ға берген сұхбатында.

 

2500
Кілт сөздер:
Деревянченко, Геннадий Головкин
Тақырып бойынша
Деревянченко Головкиннен көп соққы жасады ма – жекпе-жектің көрсеткіші жарияланды
Головкин мен Деревянченко жекпе-жектен кейін ауруханаға жеткізілді
Зал шулап кетті: Головкин жекпе-жектен кейін мәлімдеме жасады
Екі боксшы да журналистер алдына шықпады: жекпе-жектен кейінгі баспасөз мәслихаты
"Тағы да дәлелдеді": Тоқаев Головкинді жеңісімен құттықтады
Головкинге рингке шығуға неге тыйым салынды?
Әділбек Ниязымбетов

Әділбек Ниязымбетов қазір немен айналысып жүргенін айтты

1391
(Жаңартылды 16:25 22.05.2020)
Ниязымбетов Токио Олимпиадасында 81 келі салмақта сайысқа түсетін Бекзат Нұрдәулетовке сенім білдірді

АЛМАТЫ, 22 мамыр – Sputnik, Айгерім Таубай. Қазақстанның еңбек сіңірген спорт шебері, "Құрмет" орденінің иегері, Олимпиада ойындарының жүлдегері Әділбек Ниязымбетов қазір Олимпиадалық дайындық орталығында әдіскер болып жұмыс істейді. Ол жас спортшылардың құжаты мен билетіне жауап береді. Спортшы Sputnik Қазақстан тілшісіне карантин кезінде немен айналысқанын, қолғабын шегеге ілгеннен кейін өмірінде қандай жаңалық болғанын және Токио Олимпиадасы жайлы ойын айтты.

"2019 жылдың қыркүйегінен бастап астанада Олимпиадаға дайындау орталығында методист болып қызмет етемін. Карантин кезінде елордада болдым. Үйде кітап оқып, үй шаруасына көмектестім. Үйдің шаруасы ешқашан бітпейді. Көктем кезінде аула тазалаудан бастап, гүл отырғызып, ағаш ектік. Уақыт осылай өтіп кетті",- деді Ниязымбетов.

Айтуынша, Олимпиада орталығында құжаттармен жұмыс істейді. Жас спортшыларды жарысқа жіберер кезде құжаттарын жинап, жол жүру билеттеріне дейін түгендеп отырады.

"Кезінде өзіміз спортшы ретінде жарыстарға барған болсақ, қазір қағаз жағына жауап беремін, әдіскермін. Ол бапкердің көмекшісі деген сөз. Жас спортшыларды сайыстарға жіберетін кезде құжаттарын, жол жүру билеттерін, неше күнге баратынын реттеймін. Оның алдында жинақтау жұмыстары жүргізіледі, ол жерде қандай құжат қажет екенін реттеп, соған жауап беремін", - дейді ол.

Спорт алаңынан кабинеттегі жұмысқа ауысу процесінің қалай жүргенін сұрадық. Ниязымбетов әр істің өз қиындығы бар екенін алға тартты.

"Ештеңе оңай келмейді. Спорт болсын, спорттан тыс жұмыстың да өз қиындығы бар. Қиындыққа төзу керек. Үйренісу қажет. Менде де дәл солай", - деді спортшы.

2018 жылы спорттан кеткен соң бапкер болудан бас тартқан Ниязымбетов әлі күнге дейін ол ойынан айнымағанын жеткізді.

"Жас кезімнен бастап бапкер болуды армандаған жоқпын. Әлі де болғым келмейді. Қазір өзімнің жұмысым бар. Ал бапкер болу үлкен жауапкершілік, өз балаңды қалай тәрбиелесең, алдыңа келген жас жеткіншекке де дәл солай қамқорлық жасап, өз балаңның жетістікке жеткенін қалай қаласаң, дәл солай жанкүйері болуың қажет. Ал бұл көпшілік ойлағандай оңай жұмыс емес, жауапкершілігі де жоғары",- деді ол.

Оқи отырыңыз: Карьерасын аяқтаған танымал қазақстандық спортшылар қазір қайда жүр?

Бала күнінен футболды жақсы көретін спортшы қазақ футболына көңілі толмайтынын жеткізді.

"Қазір де футбол ойнаймын. Ал қазақ футболына көңілім толмайды. Біздің мықты-мықты футбол ойнайтын жақсы спортшыларымыз бар, оларды құрамаға алмайды. Жоғарыда отырған бапкерлер алғысы келмейтін сияқты. Бұрынғыға қарағанда енді дамып, жақсы ойнап келе жатыр. Ішінде қазақ жігіттердің аз болғаны намысқа тиеді", - деді ол.

Сол футболды маған берсе өзім ақ көтерер едім, деп әзілдеді спортшы.

Ал бокс саласында аяқтан тарту, мүмкіндігің, кәсібилігің жетіп тұрса, сайысқа жібермеу, аренаға шығармау деген жоқ, дейді ол.

Айтуынша, бір спортты жақсы меңгерген адам басқа саланы да жетік меңгере алады.  

"Спортшы қай спорт түрімен айналысқанына қарамастан, сол саланың қиындығын, дайындығын көреді. Үлкен аренаға шыққан адамдар қай спорт болса да алып кете алды. Футболға қатты берілемін, бірақ бір құраманың қатарына қосылып, сол салаға ауысамын деп айта алмаймын", - деді Ниязымбетов.

Токио Олимпиадасы 2021 жылға кейінге қалдырылды, дей тұрғанмен спортшылар дайындығын тоқтатпай, өз қалпын сақтап қалатынына сенім білдірді.

"Токиода біздің спортшылардың біршама табысқа жететініне сенемін. Ал өзім алаңға шыққан 81 келі салмақта Олимпиадада сайысқа түсетін Бекзат Нұрдәулетов есімді спортшыны ерекше атай аламын. Жас та болса бокста үлкен жетістікке жетіп жүр, қанжығасына Олимпиаданың алтынын байласа деген тілегім бар", - деді ол.

Посмотреть эту публикацию в Instagram

Публикация от Adilbek Niyazymbetov (@niyazymbetovadilbek)

Спортшының әлеуметтік желісіне шолу жасап, ол жақтан елорда әкімі Алтай Көлгіновтің, мәдениет және спорт министрі Ақтоты Райымқұловамен бірге түскен фотоларын байқадық. Спортшы бұл әрекетінің лауазымды қызметке орналасу үшін жасалып жатпағанын айтты.

Посмотреть эту публикацию в Instagram

Публикация от Adilbek Niyazymbetov (@niyazymbetovadilbek)

"Жоғары жақтан бізге тапсырма келеді. Болып, өтіп жатқан іс-шараларға жібереді. Ол фотолар сондай шаралар кезінде түсірілген. Жалпы ұсыныс түсіп жатса, басшылық қызметке неге бармасқа?! Алайда бұл жағымпазданып, "мені көтерсінші" деген ойдан туып отырған жоқ. Тек жұмыс соны талап еткен соң жасалып жатыр", - деп түсіндірді ол.

2019 жылдың күзінде Әділбек Ниязымбетов "Екі жұлдыз" ән байқауына қатысқан болатын. Айтуынша, бұл сайысқа да басшылықтың тапсырмасымен қатысқан, алайда сахнада ән салу өзіне ұнағанын жеткізді.

"Спортта жүрген кезде бізге мұндай шараларға қатысуға рұқсат жоқ, өзіміздің де уақытымыз болмайды. Дауысым болмаса да, сахнаға шықтым. Маған ұнады. Ал сахнаға шығып ән айту мен алаңға шығудың арасы жер мен көктей", - деп түйіндеді сөзін спортшы.

1391
Кілт сөздер:
Токиодағы Олимпиада, Әділбек Ниязымбетов
Тақырып бойынша
"Оның бәрі - сатқындық" Әділбек Ниязымбетов кімді кешіре алмайтынын айтты
Қазақстандық төрт боксшы Венгрияда өтіп жатқан турнирдің финалына шықты
2019 жылғы Қазақстанның ең үздік спортшысы әскер қатарына алынды
Қазақстандық боксшылар Азия чемпионатында 6 алтын медаль жеңіп алды
Өткен жылы карьерасын аяқтаған қазақстандық танымал 10 спортшы
Нұрдәулетовтен жеңілген Хулио Ла Крус күтпеген мәлімдеме жасады
Геннадий Головкин

Головкиннің келесі қарсыласының есімі ресми түрде жария етілді

1369
Өткен жылы Головкин мексикалық Сауль Альвареспен үшінші рет жұдырықтасқысы келетінін айтқан. Алайда бұл жекпе-жек ұйымдастырылмады  

НҰР-СҰЛТАН, 20 мамыр – Sputnik. DAZN платформасы ресми түрде қазақстандық боксшы Геннадий Головкиннің келесі қарсыласының есімін атады.  

Matchroom Boxing промоутері және DAZN платформасының менеджері Эдди Хирн поляк боксшысы Камил Шеремета (21-0, 5 КО) қазақстандық Геннадий Головкинмен (40-1-1, 35 КО) жекпе-жек өткізу туралы келісімшартқа отырғанын мәлімдеді, деп хабарлайды Prosports.kz.

Оқи отырыңыз: Головкин "Канеломен" қыркүйекте жекпе-жек өткізуден бас тартты

"Өткен жылы Madison Square Garden-дағы Стив Роллсқа қарсы жекпе-жектен кейін Головкин Альвареспен жұдырықтасқысы келетінін айтқан. Алайда бұл жекпе-жек ұйымдастырылмады. Содан кейін Головкин мен DAZN алдымен Сергей Деревянченкомен жұдырықтасып, содан кейін Камил Шереметаға қарсы белбеуді қорғауды жоспарлап қойды. Бұл жекпе-жектің екеуіне де қол қойылды. Шеремета Головкинмен жекпе-жек өткізу туралы қол қойылған келісімшартты алды", - деді Хирн.

Головкин мен Альварес арасындағы үшінші жекпе-жек жыл соңында өтуі керекдеп түйіндеді ол.

1369
Кілт сөздер:
кәсіпқой бокс, Геннадий Головкин
Тақырып бойынша
"Канело" Головкинмен үшінші жекпе-жегіне қатысты мәлімдеме жасады
Головкин жарақат алып қалды
Эдди Хирн Головкиннің келесі жекпе-жегі Қазақстанда өтуі мүмкін екенін мәлімдеді
Головкинді әлем чемпионы жекпе-жекке шақырды
Майк Тайсон бокс тарихындағы ең ұлы боксшыны атады
Архивтегі фото

Биыл ауыл шаруашылығы дақылдары 22,5 миллион гектарға егіледі

1
(Жаңартылды 10:05 26.05.2020)
Министр дәнді дақылдар алқабы 14,9 миллион гектар болатынын атап өтті, бұл өткен жылмен салыстырғанда 191,6 мың гектарға кем

НҰР-СҰЛТАН, 26 мамыр – Sputnik. Биыл ауыл шаруашылығы дақылдарын 22,5 миллион гектар алқапқа егу жоспарланып отыр. Қазіргі таңда дәнді және дәнді-бұршақты дақылдар 9,6 миллион гектарға себілген. Бұл туралы ауыл шаруашылығы министрі Сапархан Омаров мәлімдеді, деп хабарлайды Sputnik Қазақстан тілшісі.

"2020 жылы ауыл шаруашылығы дақылдарын 22,5 миллион гектар алаңға егу жоспарлануда, бұл 2019 жылғы деңгейден 238 мың гектарға көп", - деді Омаров үкімет отырысында.

Оқи отырыңыз: Министр Сұлтанов азық-түліктің неге қымбаттайтынын айтты 

Импорттың орнын басу үшін егіс алқаптарының құрылымын әртараптандыруға ерекше назар аударылып отыр.

Осылайша, биыл майлы дақылдар алаңы 122,2 мың гектарға, көкөніс дақылдары – 10 мың гектарға, бақша дақылдары – 1,5 мың гектарға, картоп – 7,8 мың гектарға, азықтық дақылдар – 308,6 мың гектарға, қант қызылшасы 2,4 мың гектарға ұлғаяды.

Министрдің айтуынша, дәнді дақылдар алқабы 14,9 миллион гектарды құрайды, бұл өткен жылмен салыстырғанда 191,6 мың гектарға кем.

Омаров көктемгі егіс науқанына да тоқталды.

"Қазіргі уақытта ауыл шаруашылығы дақылдары республиканың барлық аймағында егіліп жатыр. Атап айтқанда, дәнді және дәнді-бұршақты дақылдар 9,6 миллион гектарға немесе жоспарланған алаңның 65%-не, майлы дақылдар 2,3 миллион гектарға (76%), көкөніс-бақша дақылдары мен картоп – 400 мың гектарға (85%), қант қызылшасы 20,5 мың гектарға (93%), мақта 118 мың гектарға (100%), көпжылдық шөптер 352 мың гектарға (100%) егілді", -деді ол.

Оңтүстік облыстарда, сондай-ақ Ақтөбе және Атырау облыстарында егіс жұмыстары аяқталуға тақау.

Министрдің айтуынша, синоптиктер мамырдың үшінші онкүндігі жаңбырлы болады деп болжап отыр. Негізінен, Қостанай, Батыс Қазақстан, Ақмола, Солтүстік Қазақстан, Шығыс Қазақстан және Павлодар облыстарында жауын-шашын түседі.

Осыған байланысты Омаров шаруаларға егіс науқанын уақытылы аяқтау үшін әрбір жаймашуақ күнді барынша жемісті пайдалануға кеңес берді.

1
Кілт сөздер:
ауыл шаруашылығы, егін
Тақырып бойынша
Оңтүстіктің қырыққабаты Беларуське экспорттала бастады
Қазақстанның бірнеше облысында аптап ыстықтан егіс алқаптарына зиян келді
Қазақстанда нан қымбаттай ма – министрлік мәлімдеме жасады
"Бұдан Құдай сақтасын": Қызылорда облысының жаңа әкімі Маминнен көмек сұрады
Назарбаев егін алқаптарын аралап көрген соң диқандарға не деді?