Фарит Зигангиров

Олимпиада жүлдегері Қонаевтан алған сыйлығы жайлы айтып берді

767
(Жаңартылды 16:31 30.07.2020)
Шөп үстіндегі хоккейден КСРО құрамасының капитаны Фарит Зигангиров Қазақстанға не үшін келгенін, қалай Олимпиада жүлдегері болғанын әңгімеледі  

НҰР-СҰЛТАН, 30 шілде – Sputnik. Артур Шишига. 1980 жылғы Мәскеу Олимпиадасында шөп үстіндегі хоккейден КСРО құрамасы жүлделі орынға ие болды. Сол кезде команда сапында Фарит Зигангиров та өнер көрсетті. Оны Алматыға сонау Киров қаласынан шақырып алған. Sputnik Қазақстан тілшісіне сұқбат берген танымал спортшы қазақ жеріне қалай көшіп келгенін және Олимпиададан кейін Қонаевтан қандай сыйлық алғанын айтып берді.

Алматыда жағдай жасалды 

Фарит Зигангиров Ресейдің Киров қаласында дүниеге келген. Бала кезінен хоккейге қатты қызығады. Шөп үстіндегі хоккейге де бейімі болды. Бірақ туған жерінде бұл спорт түріне көп көңіл бөлінбеді. Содан 1972 жылы Алматыдан шақыру келгенде көп ойланған жоқ, бірден келісімін берді.

"Ол кезде Кировта шөп үстіндегі хоккей сияқты спорт түрі қатты дамымаған. Алматыдағы "Динамо" болса, осы спорт түрімен тығыз айналысты, ал қыста допты хоккей ойнайтын. Сөйтіп, Қазақстанға көшіп келдім. Эдуард Фердинадович Айрих (КСРО құрамасының және шөп үстіндегі хоккей мен допты хоккейден Алматыдағы "Динамоның" бас бапкері – Sputnik) мені хоккейге үйренсін деп, жасөспірімдер тобына жіберді", - дейді Зигангиров.

Ол кезде жасөспірімдер құрамасы КСРО чемпионатына дайындалып жатқан. 17 жастағы Зигангиров бір ай бойы талмай жұмыс істеді. Соның арқасында чемпионатқа баруға мүмкіндік алды. Ал бір жылдан кейін спорт шеберлерінің командасына ауысты.

Олимпиадаға екі жыл қалғанда шөп үстіндегі хоккей мен допты хоккейден екі бөлек құрама жасақталды. Оған дейін аралас болды. Фарит Зигангиров бас бапкердің ақыл-кеңесімен шөп үстіндегі хоккейге ден қойды. 

"Динамо" – мықты команда

"Шыны керек, ол кезде "Динамо" ұлы клуб болды десем, артық айтқандық емес. Себебі ол 19 рет КСРО чемпионы атанды. Бұл – ғаламат жетістік. Әрине, Эдуард Фердинадович Айрихтің еңбегі зор. Ол тамаша ұйымдастырушы әрі мықты селекционер болды. Дарынды хоккейшілерді кәдімгідей сезіп отыратын", - деп еске алады Зигангиров.

Эдуард Айрих таңдаған жас спортшылардың көбісі негізгі құрамда ойнады. Ол хоккейшілерді таңдау жағынан бірде-бір рет қателескен жоқ.

"Әлбетте, бас бапкердің көмекшілері - Қазбек Дәулетбекұлы Байболов пен Борис Прокопьевич Казанцев те өз үлесін қосты. Оларға дейін Лодиар Никифорович Игнатьев деген мықты маман жұмыс істеді. Жасөспірімдерді шыңдаған  Владимир Антонович Алешин мен Иван Михайлович Рогачевтың еңбегі зор. Ол кезде хоккей мектебі мықты болған ", - дейді Зигангиров.

Міндет орындалды 

Мәскеу Олимпиадасы алдында қаржыландыру көлемі артты. Құраманың күнтізбесі де өзгерді. Спортшылар халықаралық жарыстарға жиі шыға бастады. Бапкерлер мен хоккейшілер тәжірибені көбірек жинауға тырысты.

"Бұрын күнтізбеде жыл сайын бір-екі халықаралық жарыс болған. Ал Олимпиаданың алдында біз Испания, Германия, Голландия және тағы басқа мемлекеттерге барып, өз дайындығымызды шыңдадық, тәжірибе жинадық. Мәскеуде тұрақты түрде жиындар өтті. Оған да қатыстық. КСРО-ның спорт комитеті тарапынан барлық жағдай жасалды", - деп атап өтті Зигангиров.

Ал Олимпиадаға бір апта қалғанда үлкен жиналыс өтеді. Сол жерде делегацияның басшысы Борис Майоров нақты міндет қойды. Команда жүлдегерлердің қатарына ілігуі тиіс. Спорт басшылығы бір нәрсені анық білді. Үндістан мен Испанияны жеңу қиынға түседі. Себебі шөп үстіндегі хоккей – үндістердің ұлттық ойыны. Сол кезде испандар да жақсы ойнады.

"Ашығын айту керек, үшінші орын біз үшін максимум болды. Иә, сәттілік серік болғанда испандарды жеңуге болатын еді. Дегенмен, олай болмады. Бірінші айналымда испандарға есе жіберіп қойдық –1:2. Ал үндістерден 2:4 есебімен жеңілдік. Поляктарды 5:0 есебімен ұттық. Сосын қола үшін тағы Польша құрамасымен кездестік. Қиын ойын болды. Бірақ біз 2:1 есебімен жеңіске жеттік. Қатты қуандық. Өйткені алдымызға қойған міндетті орындап шықтық", - дейді Зигангиров.

Оның айтуынша, Олимпиада кезінде қазақстандық делегация өте ұйымшыл болған. Күн сайын жарыстардан кейін жиналып тұрыпты. Олардың ішінде Серік Қонақбаев, Шәміл Серіков, Виталий Демьяненко, Татьяна Лесовая, Сергей Котенко және тағы басқа танымал спортшылар бар. Өкінішке қарай, Олимпиадаға Эдуард Айрих бара алмаған. Оған ота жасалды. Бірақ өз құттықтауын жолдайды. Сонда спортшылардың көбісі көзіне жас алған.

Қонаевтың сыйлығы

"Олимпиададан келгесін бізді Дінмұхамед Қонаев шақырды. Ертесінде үкімет үйінде үлкен кездесу ұйымдастырылды. Қонаев бәрімізді құттықтап шықты. Шамамен, он минуттай сөйлестік", - дейді Зигангиров.  

Кездесу соңында Қонаев Олимпиада чемпиондары мен жүлдегерлерінің барлық өтінішін орындауды жүктеді. Пәтер сұрағандарға пәтер, көлік таңдағандарға көлік берілсін деді.

"Әлі есімде, Қонаев шығып кеткеннен кейін бізге тарап кетпесін, барлығы төменде күтсін деді. Бөлім басшысы келіп, бір сағаттың ішінде мемлекет басшысы айтқан өтінішті қағазға жазып беруді сұрады. Бәріміз өтініш жаздық. Сонда барлық өтініш бірден орындалды", - деп еске алды Зигангиров.

Оның айтуынша, пәтер алғысы келгендердің мәселесі сәл-пәл ұзарған. Себебі құжат рәсімдеу керек және тағысын тағы. Ал көлік таңдағандарға бір аптаның ішінде су жаңа автокөліктің кілті табысталды.

"Енді, мен ол кезде бойдақпын ғой. Үйленбегендерге пәтер берілмейтін. Содан көлік таңдап, "Жигулидің" алтыншы моделін мініп кеттім", - деді Зигангиров.

Бапкерлік қызмет 

Олимпиададан кейін Фарит Зигангиров КСРО құрамасының капитаны қызметіне сайланды. Барлық команда оны құпия дауыс беру арқылы таңдады. Одан кейін талай жеңістер болды. Ал 1988 жылы команда капитаны спорттық карьерасын аяқтады.  

Эдуард Айрих оны бапкерлік штабқа шақырды. Соның өзінде жас маманды бірден команданы жаттықтыруға жібермеді. Алдымен студенттерді дайындасын деді. Зигангиров жарты жылдай дене шынықтыру және спорт институтында футбол және хоккей кафедрасының студенттерін дайындады. Ал кешке қарай жаттығу өткізді. Осыдан кейін ғана оған командамен жұмыс істеуге мүмкіндік берілді.

"Мен ширату жаттығуларын өткізе бастадым. Жоспар жасадым. Келесі сабақтарды қалай өткізуге қатысты конспект жаздым. Осылайша, біртіндеп бапкерлікке ауыстым", - дейді Зигангиров.

Назарбаевтың тапсырмасы

2012 жылы Алматыдағы "Медеу" мұз айдынында допты хоккейден әлем чемпионаты өтті. Ресейліктерге қарсы ойынға сол кездегі Қазақстан президенті Нұрсұлтан Назарбаев та келді.

"Нұрсұлтан Назарбаевқа допты хоккей қатты ұнап қалды. Ол Алматыдағы "Динамо" командасын жаңғыртуға тапсырма берді. Содан апыр-топыр болып кетті. Барлық ардагерді жинай бастады, әкімдік қызметкерлері келді. Бәріміз ақылдасуға кірістік", - дейді Зигангиров.       

Сол кезде ардагерлерден Борис Чехлыстов, Евгений Агуреев, Александр Ионкин, Николай Шмидт сияқты мамандар келді. Әкімдіктен бірнеше адам болды. Қалалық кеңес төрағасының орынбасары Аскар Омарқұлов та келді.

"Біз біраз отырдық. Кировтағы допты хоккей жайында сұрады. Сонда мен ол жаққа мен жыл сайын барып жүргенімді және жергілікті "Родина" командасының мықты ойыншылары ай сайын 4-5 мың доллар алатынын жеткіздім. Әкімдік қызметкерлері сенген жоқ", - деді Зигангиров.

Жиында Евгений Агуреев Мәскеудегі "Динамода" жалақы 15-25 мың доллар,  ал "Кузбас" командасында 25-30 мың доллардан төлейтінін айтты. Әкімдік қызметкерлері болса, демеуші іздеу керек деді. Ары кетсе, айына 120-140 мың теңге төлей алатынын жеткізді. Александр Ионкин ондай ақшаға тек жасөспірімдер командасын ғана ұстауға болатынын ашық айтты. Ал әкімдік адамдары бірден спорт шеберлерінің келгенін және жоғары жетістіктердің болғанын қалады. Бұл бастаманың аяғы сұйылып кетті. Артынан ардагерлерді де ешкім шақырған жоқ.

"Мысалы, Талдықорғанда Алматы облысының бұрынғы әкімі Серік Үмбетов, сосын Берік Сексенов пен Серік Қалымбаевтың арқасында біраз жұмыс атқарылды. Шөп үстіндегі хоккей үшін арнайы стадион салынды. Шыны керек, қазір демеуші табу қиын. Сондықтан мемлекеттің қолдауы қажет. Бүгінде Қазақстанда әйелдер арасындағы хоккейдің деңгейі төмен, ал шөп үстіндегі ерлер хоккейі мүлдем жоқ деуге болады. Республика бойынша бір ғана стадион бар. Егер жағдай жасап, команданы құрсақ, жанкүйер де келеді", - дейді Зигангиров.

Жастарға тілек

Фарит Зигангиров зейнетке шықса да, өз тәжірибесімен бөлісіп келеді. "Алатау" республикалық спорт орталығында қысқы спорт түрлері бойынша әдіскер болып жұмыс істейді. Шайбалы хоккей мен допты хоккейге жауап береді. Кәсіби маманның жастарға айтары көп.

"Әрине, еңбекқорлық қажет. Сосын адам өзі таңдаған спортты жақсы көруі керек. Мысалы, мен бапкер болып жұмыс істегенде біраз жастарды көрдім. Бірақ көбісі жаттығудан кейін бірден үйіне кете салады. Залда ешкім қалмайды. Бұрын олай болған жоқ. Нағыз мықтылар жаттығулардан кейін қалып, тағы өз шеберлігін шыңдап отыратын. Әлемнің бес дүркін чемпиондары болса да, залда қалып, жұмыс істеді. Қазір ондайды көрмейсің", - деп түйіндеді Зигангиров.

767
Кілт сөздер:
сыйлық, Дінмұхамед Қонаев, олимпиада
Зілтемір

400 килограмдық зілтемірді көтермек болған спортшы екі аяғын сындырды видео

1853
(Жаңартылды 14:39 13.08.2020)
Спортшы алдағы екі ай бойы ешбір қозғалыссыз жатып, содан кейін жүруді қайта үйренетінін айтады

НҰР-СҰЛТАН, 13 тамыз – Sputnik. Ресейлік спортшы Александр Седых Мәскеуде өткен Дүниежүзілік пауэрлифтинг федерациясының Еуропа чемпионатында өнер көрсетіп жатып, қос тізесін бірдей жарақаттап алды, деп хабарлайды Lad Bible.

Спортшы зілтемірді иығына қойып отырып-тұру тапсырмасын орындау керек болған. Қалақшаларымен қоса есептегенде зілтемірдің салмағы 400 келіні құрады. Бастапқы кезде Седых тепе-теңдікті сақтап, өзіне ыңғайлы кезде сәтті отырды.

Алайда, орнынан тұрып жатқанда, спортшының қос тізесі салмақты көтеруде шыдас бермеді. 

Жан дауысы шығып, алға ұмтыла құлаған атлетке дәрігерлер бірден көмекке келді.

Кейіннен ауруханаға жеткізілген спортшыға қос тізесінің буыны тайып, аяқ бұлшық етінің екі тұсы жарылған деп диагноз қойылған.

Алты сағатқа созылған операциядан кейін Седых өзіне тағайындалған емдеу процесі туралы айтты.

"Енді екі ай бойы ешбір қозғалыссыз жатып, содан кейін қайта жүруді үйренетін боламын", – деді ол.

Ауыр атлет мансабын қайта жалғастыра ма, ол жағы әлі белгісіз.

1853
Кілт сөздер:
зілтемірші, спортшы
Тақырып бойынша
Ауруханаға түсіп қалған Илья Ильин видео жариялады
"Қазасы қабырғама батты": президент желіде жазба жариялады
Спорттағы карьерасын аяқтаған Ильин қандай қызметке тағайындалды
Атыраулық чемпионның өліміне қатысты тың дерек шықты
Бекман Сойлыбаев: Ломаченкомен жұдырықтасатын күн алыс емес
Архивтегі фото

Қазақстан ескекшілері "Үлкен Мәскеу регатасына" қатысады

43
Ресей ескек есу федерациясы Қазақстан спортшыларының қандай талаптарды орындауы тиіс екенін хабарлады

НҰР-СҰЛТАН, 5 тамыз – Sputnik. Қазақстан спортшылары "Үлкен Мәскеу регатасы-2020" сайысына қатысатынын растады. Ресей ескек есу федерациясының президенті Алексей Свирин Sputnik Қазақстанға ұлттық құраманың ескекшілері өз елінде коронавирусқа тест тапсыратынын айтты.

Жарыс 7-9 тамыз аралығында Крылатское есу каналында өтеді. Үлкен Мәскеу регатасына ресейліктерден бөлек, Қазақстан, Молдова және Беларусь спортшылары қатысады.

"Біз барлық талапты жібердік, жарысқа қатысатындар оны орындауы тиіс. Олар өз елінде тест тапсырады", - деп мәлімдеді Свирин.

Ол шетелдік құрамалардың мүшелері тест тапсырғаннан кейін көп ұзамай Мәскеуге жететініне сенім білдірді.

"Бұл туралы ешқандай сұрақ туындамайды. Барлық құрама Есу каналында, бір жерде тұрады", - деп атап өтті Свирин.  

Сайыстар кезінде ұйымдастырушылар спортшылар мен делегация мүшелерінің денсаулығына күнделікті мониторинг жүргізіп, дене қызуын өлшеп тұрады. Егер күдік болса, шара қолданады.

43
Шәмші Қалдаяқовтың ескерткіші

Шәмші Қалдаяқовтың туғанына 90 жыл: композитордың өмірі жайлы қызықты деректер

0
Қазақстанның халық әртісі, композитор, қазақ мәдениетіне еңбегі сіңген қайраткер қазақ вальсінің королі Шәмші Қалдаяқовтың өмірбаянын Sputnik Қазақстан дерекқорынан оқыңыз

Шәмші Қалдаяқов 1930 жылы 15  тамызда қазіргі Түркістан облысы Отырар ауданы Шәуілдір ауылында дүниеге келген. Кіші жүздің Жағалбайлы руынан шыққан. Әкесі Қалдаяқтың шын аты Әнәпия болған, ал анасы төренің қызы  – Сақыпжамал. Әкесі дүниеге ұл келсе, оған Жәмшид патшаның атын қоямын деген екен. Бір күндері түсінде ұлының айдын көлден аққу құс болып жүзіп жүргенін көріп, жақсыға жорыпты.

Шәмшінің әкесі Қалдаяқ ауыл шаруашылығына қажет құрал-саймандарды жасайтын шебер, жаңқаға жан бітірер ұста болған, қобыз бен домбырада еркін ойнаған, қиссаларды жатқа айтқан. Композитордың әкесі мен анасы ән өнерінен құралақан болмаған, олар да туған жерінде той-думанның көркі болған деседі.

"Ежелгі заманда Жәмшид деген патша болған деседі. Патшаның ерекше айнасы болған екен. Сол арқылы бүкіл әлемді көре алған. Кейін келе қазақтар осы есімді өз ұлдарына берген. Шәмші Қалдаяқовтың шын есімі де Жәмшид болған. Фамилиясы да Қалдаяқов емес, басқа болған. Қазақта келіндер жолдасының бауырларын атымен атамаған. Ол кісінің аяғында қал болса керек. Содан Қалдыаяқов болып кеткен", - дейді есімтанушы Бердалы Оспан.

Шәмшінің анасы Естайдың "Құсни Қорлан" әнін ерекше ұнатып орындаған.

"Менің дауысым жоқ дейтін. Осы әнге ғана дауысым жетеді деп отырыс-жиындарда "Қорлан" әнін салушы еді",  - дейді Шәмші Қалдаяқовтың келіні Аманкүл Төрегелдиева естелігінде.

Шәмші Қалдаяқовтың өнер жолы

Шәмші Қалдаяқов мектепті бітірген соң Сарыағаштағы мал дәрігерлік техникумында білім алды. Оқуын бітірген соң 20 жастағы Шәмші Ақтөбеде сегіз ай еңбек етті. 1951-1954 жылдары Қиыр Шығыста әскери борышын атқарды.

"Әскери қызметте жүргенде 50 градус аязда ащы суды ішуді үйреніп кеттім. 1973 жылы ақпанда арақты қойдым" дейді Шәмшінің өзі. Оған біреулер сенеді, біреу сенбейді, бірақ шындық – сол. Одан кейін татып алған емес", - дейді Шәмшінің досы Еркінбай Әлімқұлов.

Ал Шәмшінің інісі Қадір Қалдаяқовтың айтуынша, әскерден келген соң Шәмші Мәскеудегі Чайковский атындағы училищеге оқуға түседі. 1954 жылы оны бітірместен, елге қайтып келеді. Анасы науқастанып жатып, баласын орыс болып кетеді деп қорқып, шақыртып алған.

Ауылға оралған соң үйірмелерге қатысып, клуб меңгерушісі болып қызметке араласа бастады. 1955 жылы Ташкенттегі Хамза Ниязи атындағы музыкалық училищеге музыка теориясы факультетіне қабылданды. Ол жерде іссапармен Ташкентке барған әнші Жамал Омаровамен танысады. Сөйтіп Шәмшіні Алматыға шақырады.Ташкенттегі оқуын бітірмей, Шәмші Алматыға көшіп келеді.

"Бойдақ кезінде мен Жамал апаның үйінде тұрдым. Ол кезде тұрмыс та нашар болатын. Тамақ, шай, су мәселесі студенттерге ауыр кез болатын. Жамал апаның үлкен баласы есебінде тұрдым", - дейді Шәмші Қалдаяқов бір естелігінде.

1956 жылы Қалдаяқов Құрманғазы атындағы консерваторияға оқуға түседі. Ол жерде алты жыл бойы бірінші курс студенті болып жүреді.

Екі мыңнан аса хат келді

Шәмші Қалдаяқов артынан 300-ге жуық ән жазып қалдырды. Сырға толы, мұңға толы нәзік, ырғақты әндері қазақ даласын алақанына салып аялап, әлі де тербетіп келеді.

"Арыс жағасында" әні бір жылдары радиодан беруге тыйым салынған. Бұрынғы әндеріне иірімдері ұқсайды деген желеумен көркемдік кеңестен өтпей қалады. Дегенмен сол кезде "Қазақ радиосының" музыкалық редакциясында жұмыс істейтін Нұрғали Нүсіпжановқа, Ескендір Хасанғалиевқа бұл ән ұнап қалады. Тәуекелге бел айлап, екеуі әнді жазуға кіріседі.

"Дыбыс режиссері шақырып алып, мына әнді өзіміз үшін жазып қояйық деген ой болды. Әнді жазып жатқанда, дауысын естіп қалып, есікті ашып, бірлі-жарым кісілер әннің тамаша екенін айтумен болды. Біз үндемей отырдық, себебі тәртіп қатаң болатын. Көркемдік кеңестен өтпеген ән эфирге жақындамауы керек", - дейді Нұрғали Нүсіпжанов.

Жазылып, дайын тұрған лирикалық ән байқаусызда радиодан беріліп кетеді.

"Ескендірге шаруамыз бітті, тәртіп бұздық, енді жұмыстан шығамыз деп айттым. Аптаның аяғында екі мыңнан аса елден хат келді. Әннің тамаша екенін айтып, жылы лебіздерін жазыпты, - деп еске алады Нүсіпжанов.

Саналы ғұмырында Шәмші Қалдаяқов Мұхтар Шаханов, Сабырхан Асанов, Қадыр Мырза Әли, Жұмекен Нәжімеденов, Нұрсұлтан Әлімқұлов, Төлеген Айбергенов, Зәкір Шүкіров, Тұманбай Молдағалиев, Ғафу Қайырбеков сынды қазақтың дарынды ақындарымен жұмыс істеді.

Сазгер әндері 60-70-жылдардагы жастардың аузында жүрді. Халық арасында әсіресе отаншылдық, елшілдік туралы "Менің Қазақстаным" туындысы айрықша болды. 1986 жылы желтоқсан көтерілісіне қатысушылар Алматы алаңы мен көшелерінде Шәмшінің осы әнін ұран етіп шырқап шықты. 2005 жылы "Менің Қазақстаным" әні Қазақстан Республикасының Мемлекеттік әнұраны болып бекітілді.

"Ол тұс – Ақмоланы "Целиноград" атап, сол жақтағы бес облысты бір өлке етіп, оны Ресей жаққа бермекші болып жүрген кез еді. Осының алдында ғана Оңтүстік Қазақстанның нағыз қазақи үш ауданы Өзбекстанға берілген болатын. Қазақ жері осылайша бөлшектелгелі жатқанда, оның асқақтығын жырлайтын әнұран қажеттігін сезіндім. "Менің Қазақстаным" солай туды. Өлеңін Жұмекен Нәжімеденов жазды. Әнді радиоға Жамал Омарова жаздырды да, ол ән біздің өтінішіміз бойынша күніне бірнеше рет беріліп тұрды. Бұл менің қасиетті қазақ жерін бөлшектеуге білдірген қарсылығым еді", - дейді Шәмші Қалдаяқов естелігінде.

Отбасы туралы не білеміз

Шәмші Қалдаяқов жары Жәмиләмен 31 жасында отау құрады. Бұған сол кезде студенттік қауымды селт еткізген Шыңғыс Айтматовтың "Жәмилә" повесі себеп болыпты.

"Шәкең бойжеткеннің есімін сұрайды. Ол Жәмилә десе, өзінің Шәмші Қалдаяқов деген композитор екенін айтады. "Құдай куә, Жәмилә деген қыз кездессе, үйленемін деген уәдем бар еді. Қарсы болмасаңыз, бас қосайық. Отбасын құрайық деген", - деп еске алды композитордың досы Еркінбай Әлімқұлов.

Осылайша Шәмші мен Жәмиләнің шаңырағында екі ұл дүниеге келді: Әбілқасым және Мұхтар.

"Әкем қазақтың табиғатына жақын әндерді жазғандықтан халық жүрегінен орын алды. Ол – өте мейірімді, ақкөңіл болатын. Айналасындағы адамдарға үнемі қол ұшын беруге асықты. Үйге қонақ шақырғанды жақсы көретін. Бір сөзбен айтқанда, кеңпейіл жан еді. Қыста ешқайда шықпайтын, үйде отыратын. Ал көктем шыға салысымен, туған-туыс, достарын аралап кететін", - деп еске алады ұлы Мұхтар Қалдаяқов.

Шәмші Қалдаяқов жан досы Төлеген Айбергенов дүниеден өткен соң ақынның жары Үрнисаға үйленеді. Ақынның артында қалған шиіттей бес баланы қамқорлығына алады. Алайда Шәмшінің бұл әрекеті көпшілікке ұнамай, достары да теріс айналған.

"Шәмші Қалдаяқов әкемнің жақсы жолдасы болған. Бізді жетілдіремін, жеткіземін деп анама үйленді. Екеуі көп тұрмаған. Шамамен екі жыл тұрған", - дейді Айбергеновтің қызы Салтанат Айбергенова.

Шәмші Қалдаяқов өмірінің соңында Жамбыл облысындағы Дүнген ауылында тұрды. 1991 жылдың 16 қара­шасында дерті асқынып, ауруханаға түсті. Сол жылдың 29 желтоқсанында композиторға "Қазақстанның Халық әртісі" атағы берілді. Халқын сүйген, халқы сүйген сазгер 1992 жылдың 29 ақпанында көз жұмды.

2020 жылы Түркістан облысы Отырар ауданында Шәмші Қалдаяқовтың 90  жылдық мерейтойы қарсаңында композиторға арналған Қазақстандағы алғашқы музей ашылды.

0
Кілт сөздер:
композитор, Шәмші Қалдаяқов
Тақырып бойынша
Алаш идеясы тығырыққа тірелді: Байтұрсынұлы кеңес өкіметі жағына не үшін өтті
"Бұл не деген масқара!": Бейімбет Майлин туралы қызықты деректер
Абай Құнанбайұлы ұрпағының шежіресі
"Қазақ поэзиясының құлагері" атанған Ілияс Жансүгіров туралы не білеміз?
"Халық тағдыры – карта ойыны емес": Міржақып Дулатұлы жайлы қызықты деректер
Қазақтың жері қалай заңдастырылды: Әлихан Бөкейхан туралы қызықты деректер